ⅬⅩⅫ
Ogosabera omorwoti bw’abaanto ba Nyasae
(Ogoteera gwa Sulemani)
Ⅰ Nyasae, kae omorwoti okobua gw’okogamba buna aye okogamba,
na omwana bw’omorwoti agambe ase oboronge buna aye.
Ⅱ Erio amanye konachera abanto bao ebiina bi’oboronge
na gokora ekeene ase abataka.
Ⅲ Ebitunwa na ebigoro mbirentere abanto omorembe goetera ase oboronge.
Ⅳ Tiga omorwoti abe okorwanerera abataka,
na atoorie abana b’abaremeire,
korende asenyente abanto bagokorera abande bobe.
Ⅴ Abanto mbakoiroke,
koreng’ana buna erioba na omotienyi bigendererete kobao,
ebiaare ase ebiaare.
Ⅵ Ere tiga aike korwa igoro buna
embura egotwa ase obonyansi oborere,
na buna omonyirira ogotwa igoro ase riroba.
Ⅶ Tiga omonyaboronge asesenigwe ase amatuko aye,
na omorembe ogenderere kobao goika ekero omotienyi otabeo.
Ⅷ Tiga omorwoti abe okogamba korwa ase enyancha eyemo goika eyende,
na korwa ase orooche rw’Eufarati goika ase ensinyo y’ense.
Ⅸ Abanto bamenyete ase erooro mbatugame ase obosio bwaye bamosike,
n’ababisa baye bamene orotu.
Ⅹ Abarwoti ba Tarisisi na ab’ebisinka ’mbabe bakomorentera ebiegwa;
naboigo nabarwoti ba Sheba na Seba mbamorentere ebango.
Ⅺ Abarwoti bonsi ’mbatugame ase obosio bwaye bamosike,
na abanto b’ebisaku bionsi mbamokorere.
Ⅻ Ere nigo agotooria oyoremeire gakorangeria,
naboigo nomotaka na oyotabwati onde okomokonya.
ⅩⅢ Nigo are omwororo ase omoremerwa na ase omotaka,
boigo nigo agotooria emioyo y’abaremeire.
ⅩⅣ Nigo akobooria emioyo yabo korwa ase abachandi babo
na korwa ase obotindi.
Amanyinga abo nigo are nengencho enene asare.
ⅩⅤ Tiga omorwoti agenderere koba moyo.
Chitaabu chi’ense ya Seba chirentwe asare,
tiga abanto babe bakomosabera botambe,
boigo tiga abe okona-gosesenigwa kera rituko.
ⅩⅥ Tiga endagera yame enyinge ase ense,
nonya nase ebitunwa igoro.
Chindagera echio tiga china-konyegerigwa buna emete ya Lebanoni.
Abanto b’emechie tiga babuche babe buna obonyansi bw’ense.
ⅩⅦ Erieta riaye tiga rigenderere kobao botambe,
rikume koreng’ana buna erioba rigendererete kobao.
Abanto mbabe bagosesenigwa ime yaye;
abanto b’ebisaku bionsi tiga bamoroke oyosesenirie.
ⅩⅧ Omonene, Nyasae bw’Abaisraeli, tiga atogigwe,
nere bweka ogokora amakumia.
ⅩⅨ Tiga erieta riaye ri’obonene ritogigwe goika kare na kare;
obonene bwaye tiga boichore ase ense yonsi.
Amina, Amina!
ⅩⅩ Oyo noro omoerio bw’ogosaba gwa Daudi, mosinto o Yese.