ⅬⅩⅩⅨ
Ogosaba ase engaki y’emechando y’egesaku
(Ogoteera gw’Asafu)
Ⅰ Aye Nyasae, abanto batakomanyeti bachire basoire ase omwando oo,
barabwo bakorire Hekalu yao Enchenu yabeire eyetachenegeti,
bakorire Yerusalemu obeire chitui chi’amagena.
Ⅱ Baeire chinyoni emebere y’abasomba bao chiyerie,
ee, chinyama chi’emebere y’abachenu bao ase ching’iti chi’orosana.
Ⅲ Baiteire amanyinga abo buna amaache
ase chinsemo chionsi chia Yerusalemu,
abakobatindeka baborire.
Ⅳ Intwe twabeire okogechia ase abanto bamenyete ang’e naintwe,
abanto batoetanaine nigo bagotochecheria na gotosekerera.
Ⅴ Aye Omonene ngoika ririri oragenderere koba nendamwamu ase tore?
Inee! Ribero riao, ngoika ririri rigochia gwoka buna omorero?
Ⅵ Umora endamwamu yao igoro ase abanto b’ebisaku batakomanyeti,
na igoro ase amagambi ayio atari gokorangeria oyakonye.
Ⅶ Naki abanto abwo basiririe abanto b’ororeria rwa Yakobo,
naende basaririe aase bamenyete.
Ⅷ Tobaisa gotoa intwe egesusuro ase engencho y’ebibe bie chisokoro chiaito;
otorotote namaabera ao bwango,
ekiagera twabeire bosa kegima.
Ⅸ Aye Nyasae ore ogotooreka gwaito,
ase engencho y’obonene bw’erieta riao, tokonye;
naende ase engencho y’erieta riao otoboorie, otwabere ebibe biaito!
Ⅹ Nase ki abanto b’ebisaku bakoboria, “Ng’ai Nyasae oyio obo are?”
Ase amasio aito tiga abanto b’ebisaku bamanye
buna okorusia egesiomba ase engencho y’ogoiterwa kw’amanyinga ’abasomba bao.
Ⅺ Tiga ekerero ki’abasibire geike ase obosio bwao;
tooria abanto abwo banacheirwe ekiina bakwe,
ekiagera aye nobwate okobua okonene.
Ⅻ Aye Omonene, abanto abwo bamenyete ang’e bagochecheirie na kogochaaya,
obairanerie amabe ayio abo ara gatano na kabere.
ⅩⅢ Erio intwe, abanto bao, abatore abe riicho ri’oborisia bwao,
natokoiranerie ng’a mbuya mono kogenderera botambe,
na ebiaare ase ebiaare natobe tokogotogia.