ⅬⅩⅩⅩ
Ogosabera Abaisraeli ng’a bairanerigwe amaya abo
(Ogoteera gw’Asafu)
Ⅰ Aye omorisia bw’Abaisraeli, tegerera oigwe,
aye okoraa abanto b’ororeria rwa Yusufu buna riicho rikoraagwa!
Aye oyore ase oboikaranso bw’obonene igoro y’ebitongwa bibwate chimbaba, tomorekere!
Ⅱ Orokia chinguru chiao ase abanto b’Efraimu,
na Ababenjamini, na Abamanase,
na oche ototoorie!
Ⅲ Aye Nyasae, otokore tobe abayia,
otoraberie obosio bwao, erio nario toratooreke.
Ⅳ Aye Omonene, Nyasae bw’Emeganda,
ngoika ririri orabe gokogechigwa nogosaba kw’abaanto bao?
Ⅴ Aye gwakorire amariga ’omoichano koba endagera yabo,
kwabanyoisirie amariga amange mono.
Ⅵ Aye gwatokorire twabeire abakwomanerwa ase egati y’abanto bare ang’e naintwe,
na ababisa baito nigo bagendererete gotochecheria.
Ⅶ Aye Nyasae bw’Emeganda, otoonchore tobe abayia,
otoraberie obosio bwao, erio nario toratooreke.
Ⅷ Aye Omonene nigo kwarentete omosabibu korwa ase ense ya Misiri,
erio ogaseria abanto b’ebisaku korwa aase abo, okayosimeka aroro.
Ⅸ Aye nigo kwayoraberetie aase na koaroisia,
noro ogakina okaira emeri inse, okaranda ase ense eyio engima.
Ⅹ Ekiriri ki’omosabibu oyio nigo giatubete ebitunwa,
ne chinsagia chiaye chikaranda gochia aase emecharake ya Nyasae ere.
Ⅺ Chinsagia echio chikaranda chigaikeera Enyancha Enene,
na emeseboka yaye gochia ase orooche rw’Eufarati.
Ⅻ Nase ki rende aye gwatagoire chindwaki chiaye,
erinde bonsi abagoeta ase enchera batabora amasabibu aye?
ⅩⅢ Chimbeche chie rinani nigo chigosaria omosabibu oyio,
ne ching’iti chi’orosana nigo chikoyotakuna.
ⅩⅣ Aye Nyasae bw’Emeganda, yoiranere naende,
rigereria korwa agwo igoro orore;
bwechandere omosabibu oyio.
ⅩⅤ Renda omote oyo gwasimegete nokoboko kwao gw’okorio,
orosagia orwo gwechoreire na korobeka chinguru.
ⅩⅥ Abanto bayosambire nomorero na koyogecha.
Osirie abanto abwo ase okobea kwao!
ⅩⅦ Orende nokoboko kwao omonto oyio gwachorire nokoboko kwao gw’okorio,
Mwanyabaanto abwo aye gwechoreire.
ⅩⅧ Erio titokoonchoka togotige;
torende togenderere koba moyo, na intwe ntobe togotogia erieta riao.
ⅩⅨ Aye Omonene, Nyasae bw’Emeganda, tokore tobe abayia,
otoraberie obosio bwao, erio nario toratooreke.