Ⅸ
Okoiraneria Nyasae ng’a mbuya mono ase engencho y’oboronge bwaye
(Ogoteera gwa Daudi)
Ⅰ Aye Omonene, ningoakere mbuya mono kegima n’enkoro yane yonsi.
Nindarie emeremo yao yonsi y’ogokumia.
Ⅱ Ningoke na gochenga mono kegima ase engencho yao,
nintere na gotogia erieta riao, aye Omonene Ore Igoro Mono Kegima.
Ⅲ Ekero ababisa baane bakoirana magega,
bagwe inse na gosirigwa bosio bwao.
Ⅳ Aye nigo okonacha ekiina kiane ase oboronge;
noikaransete ase ekerogo kiao ki’obonene kore omonachi ebiina omooronge.
Ⅴ Aye gwatogonyeire abanto b’ebisaku na gosiria abakori amabe,
gwasiririe amarieta abo kegima, tibakoinyorwa goika kare na kare.
Ⅵ Ababisa baerire, basirigwe kegima,
gwatagoire emechie yabo,
barabwo bebirwe, tibakoinyorwa nonya ng’ake.
Ⅶ Korende Omonene nigo are omorwoti o kare na kare,
obekire ang’e ekerogo kiaye ki’obonene, erinde anache ekiina.
Ⅷ Omonene nigo aragambie ense ase oboronge
na konachera abanto ekiina gi’ekeene atari gwanchereria.
Ⅸ Omonene nigo are obotamero ase abwo bagokorerwa bobe,
nere obotamero ase chingaki chi’emechando.
Ⅹ Abwo bonsi bamanyete erieta riao, nigo bagosemeretie,
ekiagera aye Omonene togotiga abwo bagokorigia.
Ⅺ Tera amatera ase ogotogia Omonene oyomenyete Sayoni!
Teebia ebisaku bionsi buna ogokora kwaye gokumete!
Ⅻ Ere oyo okorusia egesiomba ase okomocha kw’ogoitera amanyinga
na koinyora abaichanete,
Omonene tari kweba ekerero ki’abwo bagokorerwa bobe.
ⅩⅢ Aye Omonene ndorere amaabera!
Rora emechando eye abanto bangechete bakondetera.
Aye kwandusirie korwa ase ebiita bi’amakweri,
ⅩⅣ erinde intenene ase abanto ba Sayoni,
ase ebiita biabo nimbatebie amang’ana onsi agerire nkogotogia;
ningokere ogotooreka kwao.
ⅩⅤ Abanto b’ebisaku bagure ase eirima bakunyete,
na ase oboreba babisete bombwate, babwatirwe barabwo abanyene.
ⅩⅥ Omonene bwemanyekanirie ase okonacha ebiina bia boronge;
abakori amabe babwatirwe ase ogokora kwabo abanyene.
ⅩⅦ Abakori amabe nigo bakogenda gochia aase abakuure,
naboigo gochia ase nabaanto bonsi b’ebisaku abwo bebire Nyasae.
ⅩⅧ Abanto abaremerwa tibakwebwa kogenderera botambe,
na ogosemeria kw’abagokorerwa bobe tikogosira nonya ng’ake.
ⅩⅨ Omonene, gaki ’nchuo! Totiga abanto babue,
tiga abanto b’Ebisaku banacherwe ekiina ase obosio bwao.
ⅩⅩ Omonene, obaondokie!
Tiga bamanye ng’a barabwo botaambe nigo bare Mwanyabaanto.