EGETABU GIA KANE
ⅩⅭ
(90—106)
Okoba kwa Nyasae na okwa Mwanyabaanto
(Ogosaba kwa Musa, omonto o Nyasae)
Ⅰ Omonene, aye nigo ore obotamero bwaito
ebiaare ase ebiaare.
Ⅱ Ritang’ani ebigoro bitarabao,
gose konya otaratonga ense,
korwa kare na kare aye naye Nyasae.
Ⅲ Aye nigo okoonchorana abanto bairana,
baba amaroba naende, gwateba,
“Inwe Mwanyabaanto, irana!”
Ⅳ Asore aye, emiaka elifu eyemo
nigo ere buna rituko ria igoro koriaetire,
buna engaki enke y’okorenda botuko.
Ⅴ Nigo ogokorobanania Mwanyabaanto buna eooro,
baeta bwango buna chindoto.
Barabwo nigo bare buna obonyansi bokomera mambia;
Ⅵ mambia nigo bogokina bwasicha,
mogoroba bwanachwa bwoma.
Ⅶ Intwe nigo togosirigwa nendamwamu yao,
twaondokigwa nekeririanda kiao.
Ⅷ Amabe aya twakorire nigo oyabegete ase obosio bwao,
na ebibe biaito bia bobisi nigo bire maiso marore asore.
Ⅸ Obogima bwaito bwonsi nigo bokoera bwango inse y’ekeririanda kiao,
nigo togokoora emiaka yaito buna ogoita egekoe
Ⅹ Emiaka y’obogima bwaito nemerongo etano na ebere;
onye tore ne chinguru, eba emerongo etano na etato;
na obogima obo nigo boichire nobokong’u na emechando,
nigo bogoeta bwango, na intwe tweiruruka twasira.
Ⅺ Ning’o omanyete okobua kw’endamwamu yao,
na ogw’ekeririanda kiao, erinde akoiroke?
Ⅻ Tworokererie, tomanye obweng’e bw’obogima bwaito,
erinde chinkoro chiaito chibe nobong’aini.
ⅩⅢ Omonene, irana ase tore! Ngoika ririri orabe kogoteebana?
Otororere intwe, abasomba bao, amaabera!
ⅩⅣ Kobogokia mambia, otoisanekie nobwanchani bwao botari koera,
erinde tochenge na kogoka amatuko aito onsi.
ⅩⅤ Otogokie amatuko ang’ana buna ayio twachandegete,
na emiaka eng’ana buna eria twanyorete amabe.
ⅩⅥ Tworokie intwe, abasomba bao, ogokora kwao,
na abana baito oborokie obonene bwao.
ⅩⅦ Obosiani bw’Omonene, Nyasae oito, bobe igoro yaito,
na emeremo y’amaboko aito oyesesenie ase tore,
ee, osesenie emeremo y’amaboko aito!