ⅩⅭⅥ
Nyasae ore omorwoti omonene na omogambi ebiina
Ⅰ Moterere Omonene ogoteera okoyia,
aye ense yonsi, moterere Omonene!
Ⅱ Moterere Omonene, motogie erieta riaye,
mobe mokoraria ogotooreka kwaye rituko ase rituko.
Ⅲ Raria obonene bwaye ase egati y’ebisaku,
na ogokora kwaye kw’ogokumia ase abanto bonsi!
Ⅳ Omonene nigo are omonene mono, goika atogigwe,
goika airokwe goetania chinyasae chinde.
Ⅴ Chinyasae chionsi chi’abaanto b’ebisaku nemegwekano y’ogosasimwa rioka,
korende Omonene nere otongete igoro chionsi.
Ⅵ Ogosikwa na obonene nigo bire ase obosio bwaye,
chinguru na oboseera nigo bire ase obomenyo bwaye obochenu.
Ⅶ Inwe abe chiamate chi’abaanto, togia Omonene!
Motogie ase obonene bwaye na okobua kwaye.
Ⅷ Mobake Omonene ase obonene bw’erieta riaye,
moche ase chigoora chiaye, morentane ebiegwa.
Ⅸ Mosasime Omonene mweboetie obochenu!
Inwe abanto b’ense yonsi, mobe mokoiguswa ase obosio bwaye.
Ⅹ Teebia abanto bonsi b’ebisaku, “Omonene nere okogamba.
Ense nigo eteneine bokong’u, tekonyegerigwa.
Omonene nanachere abanto ekiina atari gwanchereria.”
Ⅺ Tiga igoro chibe nomogooko,
tiga enyancha echenge ase okoeera, amo na bionsi ebire ime yaye!
Ⅻ Emegondo echenge amo n’ebinto bionsi bire ime yabo!
Erio emete yonsi ye rinani netere nomogooko,
ⅩⅢ ase obosio bw’Omonene, ekiagera ngocha are,
ee, ngocha are konachera ense ekiina.
Nigo aranachere ense ekiina ase oboronge,
na anachere abanto ekiina ase obwegenwa.