ⅩⅭⅦ
Nyasae nere Omogambi Omonene
Ⅰ Omonene nere omorwoti.
Aye ense, goka!
Na inwe ebisinka ebinge, chenga!
Ⅱ Amare na omosunte ekerima nigo bimoetanaine;
oboronge na ekeene nabio bire oboroso bw’ekerogo kiaye ki’obonene.
Ⅲ Omorero nigo otang’aine bosio bwaye,
oro nigo ogosamba ababisa baye abwo bamoetanaine.
Ⅳ Okomesa kwaye gwe chinkoba nigo gokomoreka ense eye;
ense nigo ekorora okomesa okwo yatengechigwa.
Ⅴ Ebitunwa nigo bikonyititoka buna obochoe ase obosio bw’Omonene,
ee, ase obosio bw’Omonene bw’ense yonsi.
Ⅵ Igoro chionsi nigo chikoraria oboronge bwaye,
na abanto bonsi barora obonene bwaye.
Ⅶ Abanto bonsi abagosasiima emegwekano nigo bagosookigwa,
ee, abwo bagwetogeria emegwekano y’ogosasimwa ere bosa;
inwe chinyasae chionsi, tung’ama ase obosio bwaye.
Ⅷ Abanto ba Sayoni nigo bakoigwa ayio bagoka,
na ab’emechie ya Yuda bachenga,
ekiagera aye Nyasae kwanachire ebiina.
Ⅸ Aye Omonene, naye ore omonene goetania ense yonsi,
aye kwaimokererigwe igoro kobua chinyasae chionsi.
Ⅹ Inwe abamwanchete Omonene, gecha obobe!
Ere nigo akorenda emioyo y’abachenu baye;
nigo akobatooria korwa ase amaboko ’abakori amabe.
Ⅺ Oborabu nigo bokomocheera oyore omooronge,
na omogooko obachera abare ne chinkoro chindonge.
Ⅻ Inwe mwensi abamore abaronge, goka ase Nyasae,
moake ng’a mbuya mono ase erieta riaye richenu.