Ⅺ
Okwangwa kw’Abaisraeli tikori okw’oboikeranu
Ⅰ Ase igo nkoboria ’nde: Inee! Nyasae nigo angete abanto baye? Yaya, taibo! Inche omonyene n’Omoisraeli inde, oyomo bw’oroiboro rwa Aburaamu, omonto bw’ororeria rwa Benjamini.
Ⅱ Nyasae tangeti abanto baye baria amanyete korwa kare. Gose timomanyeti aya amariiko agoteeba igoro y’Elija, buna akweng’ereria ase Nyasae igoro y’Abaisraeli?
Ⅲ “Omonene, baitire ababani bao, batagoire egesasiimero kiao, ninche bweka natigaire, na barabwo nkorigia bare obogima bwane babosirie.”
Ⅳ Korende okoiraneria kwa Nyasae inaki gokomoteebia? “Ninde nabaanto chilifu isano na ibere batabegete amaru inse ase Baali.”
Ⅴ Nabo ekero kia bono ’mbare abatigari abachoorirwe ase obuya bwa Nyasae.
Ⅵ Korende onye nase obuya, rirorio tibokoba ase ogokora, onye taibo, obuya tibokoba obuya.
Ⅶ Inaki rende abeire? Egento keria Abaisraeli baare korigia tibakenyorete, Baria bachoretwe, mbarabwo bakenyorete, korende abatigarete bagakorwa koba abakong’u ase chinkoro chiabo,
Ⅷ buna eriikire,
“Nyasae akabaa omoika bwe chitoro,
na amaiso atanyare korora,
na amato atanyare koigwa,
goika reero iga.”
Ⅸ Na Daudi nigo agoteeba,
“Tiga endagera yabo ebe egesugunia na oboreba,
na egento gekobagocha, na ogoakanwa kwabo.
Ⅹ Tiga amaiso abo abekwe omosunte tibarora.
Obakumbe emegongo yabo botambe!”
Ⅺ Bono nkoboria nde, “Inee! Nigo bagochirwe goika baguure kegima?” Yaya, taibo! Korende ase ogosaria kwabo ogotooreka gwaikeire abanto b’Ebisaku, erinde Abaisraeli bakorwe babe ne ribero.
Ⅻ Bono onye ogosaria kwabo kwaeire abanto b’ense eye obonda, na onye okobugwa kwabo kwaeire abanto b’Ebisaku obonda, Inee, tari kobua mono oboikeranu bwabo?
Ogotooreka ase abanto b’Ebisaku.
Okworokereria korwa ase ogochomwa gwe chinsagia
ⅩⅢ Bono ’ngokwana nde nainwe abanto b’Ebisaku. Koreng’ana buna inde omotomwa bw’ abanto b’Ebisaku, nabarire ng’a obosomba bwane n’egento ekenene,
ⅩⅣ erinde inyare kobeeka abare amanyinga ayamo nainche ribero, na gotooria abande babo.
ⅩⅤ Inaki onye okwangwa kwabo gokorenta okobwatania ase ense, Inee, ogwancherwa kwabo inki koraarente? Nigo gokorenta obogima ribaga ri’ogokwa.
ⅩⅥ Naende onye ensemo ye ritang’ani ye ribomba ri’obosie ere enchenu, naboigo ne ribomba rionsi rire; na onye ritina rire richenu, naboigo ne chinsagia chire.
ⅩⅦ Korende onye chinsagia chinde chiabunekire, na aye oyokwarwete ase omozeituni bw’orosana gwachomirwe ase ribaga riabo, okaba oyomo bwe ritina ri’omozeituni, na konyora obonoru bwaye,
ⅩⅧ tibwetogia igoro ase chinsagia chiria. Onye kogwetogia, inyora ng’a tari aye oimogetie ritina, korende neritina rikoimogetie aye.
ⅩⅨ Bono noteebe, “Chinsagia nigo chiabunegete, erinde nchomwe aroro.”
ⅩⅩ Ee, ayio namaene. Barabwo mbabunegete ase ogot’egena kwabo, korende aye nigo oteneine ase okwegena kwao. Ase igo toenena, korende oiroke.
ⅩⅪ Inaki onye Nyasae tarorerete chinsagia chi’omote omonyene amaabera, nonya naye tagokororera amaabera.
ⅩⅫ Inyora obuya na obotindi bwa Nyasae, obotindi ase baria baguure; korende ase ore obuya bwa Nyasae, korabeere ase obuya bwaye. Onye taibo, naye boigo nonachwe korwa aroro.
ⅩⅩⅢ Nonya nabwo bande, onye tibakogenderera ase ogot’egena kwabo, rirorio nabachomwe, ekiagera Nyasae n’are n’okobua kobachoma naende.
ⅩⅩⅣ Inaki onye aye kwanachetwe korwa ase omozeituni bw’orosana, ogachomwa ase ogochomwa gotanaretwe bo, ase omozeituni oy’osimekire, tari kobua mono chinsagia chie ritina rinyene chichomwe ase omozeituni obo omonyene.
Ogwancha kw’oboikeranu kwa Nyasae nigo gokorentera bonsi amaabera
ⅩⅩⅤ Inaki baminto, timwerora ng’a nigo more abanyene obong’aini; nindigetie momanye obobisi obo. Obokong’u bwanyorire abande b’Abaisraeli, goika ogoikerana kw’Ebisaku goike.
ⅩⅩⅥ Na igo Abaisraeli bonsi inabatoorigwe, buna eriikire,
“Ere Omosibori naache korwa Sayoni.
Narusie obobe bore ase Yakobo;
ⅩⅩⅦ na oko nakwo okobwatana kw’ane nabarabwo,
ekero ’ndaache kobaruseria ebibe biabo.”
ⅩⅩⅧ Naboigo ase amanag’ana y’enchiri babeire ababisa ba Nyasae ase engencho yaino; korende ase ogochoorwa babeire abanchwa ase engencho ye chisokoro chiabo.
ⅩⅩⅨ Inaki Nyasae tari gweiteria ebiegwa biaye na okorangeria kwaye.
ⅩⅩⅩ Inaki buna inwe kare motarenge koigwera Nyasae, korende bono mwanyorire amaabera ase engencho y’ogotaigwera kwabo,
ⅩⅩⅪ naboigo na barabwo bono bataigwereti, erinde ase amaabera aya mwanyorire inwe, nabarabwo boigo banyore amaabera.
ⅩⅩⅫ Inaki Nyasae osibire bonsi ase ogotaigwera, erinde aborokie bonsi amaabera.
ⅩⅩⅩⅢ Aa! Obonge bw’obonda, na obong’aini, ne chisemi bire ase Nyasae! Tibikorengeka. Ebiina biaye tibikomanyekana ne chinchera chiaye tichikoriigeka!
ⅩⅩⅩⅣ “Inaki ning’o omanyete ebirengererio bia Omonene?
Gose ning’o okomotebereria buna agwenerete agaambe?
ⅩⅩⅩⅤ Gose ning’o omoete ekeegwa ritang’ani, erinde akeiranerigwe?”
ⅩⅩⅩⅥ Ekiagera ebinto bionsi nigo bikorwa ase are, nigo bire ase okobua kwaye, naende nigo biteneine ase are. Ogotogigwa nokwaye goika kare na kare. Amina.