Ⅻ
Obogima oboyia
Ⅰ Gaki baminto, nabasoroire mono ase amaabera a Nyasae, morue emebere yaino ebe ekeng’wanso kere moyo, egechenu, ekeranyare gwanchwa na Nyasae, nakio ogosasiima kwaino gw’ekeene.
Ⅱ Gose timwereng’ania ne chingencho chi’ense eye; korende moonchorwe, mokorwe koba abayia ase emioyo yaino, monyare korigia na komanya boronge ogwancha kwa Nyasae, na erire rigiya, na eriranchwe, na oboikeranu.
Buna etogwenerete tokore nebiegwa bi’Omoika
Ⅲ Inaki ase obuya naetwe nigo ngoteebia kera omonto oyore ase more, tabaisa kweenenia ere omonyene ase ebirengererio biaye kobua buna emogwenerete korengereria; korende abe n’ebirengererio ebironge koreng’ana buna Nyasae aeire kera omonto ekerengo gi’okwegena.
Ⅳ Inaki buna ase omobere tore nebiimo ebinge, na birobio tibiri gokora omoremo oyomo;
Ⅴ naboigo naintwe, nonya tore abange, nigo tore omobere oyomo ase Kristo, na intwe twensi nigo tore buna ebiimo kera oyomo ase oy’omwabo.
Ⅵ Nigo tore nebiegwa ao ao koreng’ana n’obuya twaeirwe; onye n’obobani tobane koreng’ana n’okwegena gwaito;
Ⅶ onye n’ogokorera, tobeo ase ogokorera gwaito; oyo okworokereria abe ase okworokereria kwaye;
Ⅷ oyo okoremia abe ase okoremia kwaye; oyo okorua arue ase omoyo omorabu; oyo ogotenenera atenenere ase omokia; oyo okororera amaabera arorere amaabera n’omogooko.
Emeroberio y’obogima bw’obokristo
Ⅸ Obwanchani bobe botari n’obong’ainereria. Gecha erire riibe, bwatana n’erire rigiya.
Ⅹ Obwanchani bw’obomino bobe ase egati yaino; mobe ab’eritang’ani kworokia abamino amasikani.
Ⅺ Ase omokia oino timoba aboro; mobe n’Omoika ogwoka, mogokorera Omonene.
Ⅻ Mogoke ase ogosemeria, moremererie ase emechando, mogenderere n’ogosaba.
ⅩⅢ Mobe ang’e gokoonya abachenu ase okoremerwa kwabo, mobe abanyamokia ase okoroisia abageni.
ⅩⅣ Mosesenie abwo bakobachaanda; basesenie, timobaragereria.
ⅩⅤ Goka amo nabwo bakogoka; rera amo nabwo bakorera.
ⅩⅥ Mobe n’omoyo oyomo inwe ase inwe. Timorengereria ayare amanene, korende mosange n’abare n’oboitongo. Timoba abanto bakoenenera obong’aini.
ⅩⅦ Timoakana omonto obobe ase obobe, tang’ania ayare amaya ase amasio y’ abanto bonsi.
ⅩⅧ Keranyarekane ase ensemo yaino, mobe n’omorembe n’abanto bonsi.
ⅩⅨ Abanchwa, timorigia kweruseria egesiomba, tiga ribaga ase endamwamu ya Nyasae, ekiagera neriikire, “Omonene oteebire: Egesiomba n’ekiane; inche ning’akane.”
ⅩⅩ Naboigo, “Omobisa oo karabe nenchara, moragerie, kar’abe n’erang’o, moe anywe, ekiagera korakore ayio, nomobekere amakara y’omorero ase omotwe oye.”
ⅩⅪ Tobugwa n’obobe, korende obue obobe ase obuya.