ⅩⅧ
Okogwa kwa Babiloni
Ⅰ Magega ase aya nkarora omomalaika onde ogoika korwa igoro. Oyo nigo arenge nokobua okonene, na ense ekamorekwa nobonene bwaye bokomeka‐meka.
Ⅱ Akarera neriogi rie chinguru, ogoteeba,
“Babiloni ogure!
Babiloni, omochie oria omonene, ogure!
Obeire obomenyo bw’ebirecha,
na oboagacho bwa kera omoika bw’eubi,
na obwa kera enyoni etachenegeti na ey’okogechia.
Ⅲ Naki abanto b’ebisaku bionsi
banyure edivai y’endamwamu y’obotomani bwaye,
na abarwoti b’ense batomanire nere,
na abaonchoreria b’ense betenenkirie
ase obonda bwaye obonge.”
Ⅳ Erio nkaigwa eriogi rinde korwa igoro, rigoteeba,
“Inwe abanto baane, karue asare,
erinde timobwatana nere ase ebibe biaye,
na konyora amaakwa amo nere.
Ⅴ Naki ebibe biaye biaikire igoro,
na Nyasae oinyoire obobe bwaye.
Ⅵ Mokorere buna ere abakorerete inwe,
moakane ara kabere koreng’ana nogokora kwaye.
Ase ekenyugwa ekio ere abasang’ananeirie,
mosang’anerie na ere ara kabere.
Ⅶ Na buna ere etogirie na kwegokia
atari gwetanga ase okorigia kwaye,
moe obororo na ogoichana koreng’ana boigo.
Nigo agoteeba ase enkoro yaye ime:
Inche ning’ikaransete eting’ana, tindi omoboraka,
gose tinkoba nomoichano nonya ng’ake!
Ⅷ Ase engencho eyio, ase rituko erimo rioka amaakwa aye nache,
naboigo namakweri, na omoichano, na enchara.
Ere nasambwe kegima nomorero,
ekiagera Omonene Nyasae Omobui, oyokomogambia, nare ne chinguru.”
Ⅸ Abarwoti b’ense, abwo babwatanire nere ase obotomani na okogania okobe nabamoreere na komweumeria ekero bararore erioki ri’okoyia kwaye.
Ⅹ Barabwo nigo baratenenere aare, ekiagera bare nokoiroka ase ogoakwa kwaye, na goteeba,
“Obobe, obobe nobwao, omochie oria omonene,
Babiloni, omochie ore ne chinguru,
naki ase ensa eyemo yoka okogambigwa kwao gwachire!”
Ⅺ Na abaonchoreria b’ense bakorera na komweumeria, ekiagera onde tari oragore ebinto biabo naende:
Ⅻ Ebinto bie chitaabu, na ebie chifeta na ebi’amagena e rigori rinene, na ebie chiruru; chianga chi’egatani, na echimonyinga, na echi’ariri, na echire chimbariri mono; kera omote bw’ogotioka okuya, na kera egento keroisirie korwa ase amaino ’enchogu, na kera egento ki’omote bw’erigori rinene, na egi’etai, na egi’ekioma, na eki’amagena akomeka‐meka;
ⅩⅢ omodalasini, na ekarafuu, na manemane, na amaguta akweakwa, na ubani na edivai, na amaguta, na obosie obonuke, na engano, ne chiombe, ne ching’ondi, ne chibarasi, ne chigari, na emebere ya Mwanyabaanto na emioyo yabo.
ⅩⅣ “Okwama koria omoyo oo oganetie kwagosireirie,
na ebinto bionsi ebiterere.
Na ebinto bikomeka‐meka biagosireirie,
gose tokonyara kobinyora naende nonya ng’ake!”
ⅩⅤ Na abaonchoreria b’ebinto ebio, abwo betenenkirie ase engencho yaye ere, nigo baratenenere aare, ekiagera bare nokoiroka ase ogoakwa kwaye, bakorera na kweumia,
ⅩⅥ bagoteeba,
“Obobe, obobe nobwaye, omochie oria omonene,
oyoboirie egatani engiya,
na eanga emonyinga, na eyere embariri mono,
ochabeire chitaabu, na amagena e rigori rinene, ne chiruru.
ⅩⅦ Naki ase ensa eyemo yoka obotenenku obonge buna iga bwabeire bosa.”
Na abateneneri bonsi be chimeeri, na bonsi ababogorigwa ne chimeeri, na abagendia be chimeeri, na abwo bonsi bagokora emeremo ase enyancha bagatenena aare,
ⅩⅧ bakorera mono ekero bachia korora erioki ri’okoyia kwaye, bagateeba,
“Omochie ki ogwekaine omochie oyio omonene?”
ⅩⅨ Bagasiara ebuse igoro ase emetwe yabo, bakorera, na gokuura, na kweumia, bagoteeba,
“Obobe, obobe nobwaye, omochie oria omonene!
Ase chinibo chiaye bonsi ababwate chimeeri ase enyancha betenenkirie.
Ase ensa eyemo yoka obeire bosa.
ⅩⅩ Goka igoro yaye, inwe aba igoro,
inwe abachenu, na abatomwa, na ababani,
naki Nyasae namogambetie ere, ekiagera ere abagambetie inwe!”
ⅩⅪ Erio omomalaika oyomo bw’echinguru akaimokia rigena rire buna orogena oronene rogosia, akariruta ase enyancha ime, akabora,
“Buna iga, ase chinguru na ekerundo,
Babiloni, omochie oria omonene, norutwe inse,
gose tokonyara kororekana nonya ng’ake.
ⅩⅫ Amariogi ’abakobugia amakano na ebiroria, na ebitureeri,
takoigugwa nonya nomooroisia o gento kende gionsi
takororekana ime ase ore naende nonya ng’ake;
nonya neriogi ri’orogena rogosia tirikoigugwa ime ase ore naende nonya ng’ake; ime ase ore naende nonya ng’ake;
ⅩⅩⅢ nonya noborabu bw’etaya tibokomoreka ime ase ore naende nonya ng’ake;
nonya neriogi ri’omonywomi na eri ’omoriakari takoigugwa ime ase ore naende nonya ng’ake.
Abaonchoreria bao nigo barenge abanene b’ense,
na abanto b’ebisaku bionsi bang’ainetwe ase oborogi bwao.
ⅩⅩⅣ Ime y’omochie oria akanyorekanao amanyinga y’ababani,
na ay’abachenu, na aya baria bonsi abaitetwe ase ense.”