ⅩⅨ
Ⅰ Magega ase aya nkaigwa egento buna neriogi rinene ri’omoganda omonene igoro, rigoteeba,
“Haleluya! Ogotooreka, na obonene, na okobua, nebia Nyasae oito.
Ⅱ Okogamba kwaye nogw’ekeene, na okw’oboronge,
naki omogambirie oria omotayayi omonene,
oyosaririe ense ase obotomani bwaye.
Nyasae orusirie egesiomba ki’amanyinga ’abasomba baye
korwa ase amaboko ’omotayayi oria”
Ⅲ Eria kabere bagateeba,
“Haleluya! Erioki ri’okoyia kwaye nigo rirachongororoke
gochia igoro goika kare na kare.”
Ⅳ Na abagaaka baria emerongo ebere na baane amo ne ching’iti chiria inye chire moyo bagatung’ama, bagasasiima Nyasae oyoikaransete ase ekerogo ki’obonene, bagoteeba, “Amina. Haleluya!”
Omoyega bw’enyangi y’Emanwa y’Eng’ondi
Ⅴ Eriogi rikarua ase ekerogo ki’obonene rigateba,
“Motogie Nyasae oito, inwe abasomba baye bonsi,
inwe abamomoirogete, abake na abanene!”
Ⅵ Erio nkaigwa buna neriogi ri’omoganda omonene, na buna eri’amaache amange, na buna eri’enkoba ye chinguru rigoteeba,
“Haleluya! Omonene Nyasae Omobui nkogamba are.
Ⅶ Togoke na gochenga, tomotogie ase obonene bwaye,
ekiagera rituko ri’enyangi y’Emanwa y’Eng’ondi riaikire,
na omoriakari oye bwebekire ang’e.
Ⅷ Ere oeirwe eanga y’egatani engiya endabu, ekomeka‐meka, akobeeka.”
Egatani eyio nogokora kw’oboronge kw’abachenu.
Ⅸ Omomalaika oria aganteebia, “Riika aya: Mbasesenirie abarangerigwe ase omoyega bw’enyangi y’Emanwa y’Eng’ondi.” Naende aganteebia, “Amang’ana aya namang’ana ay’ekeene a Nyasae.”
Ⅹ Erio ngatung’ama ase amagoro aye nkamosasiima. Na ere aganteebia, “Tokora igo! Inche nomosomba omogisangio oo na oyo bw’abamino abare noborori bwa Yeso. Osasiime Nyasae! Naki oborori bwa Yeso nabwo omoika bw’obobani.”
Omoriini ase ebarasi endabu
Ⅺ Erio nkarora igoro amaanokire. Agwo nkarora ebarasi endabu, na ere oyoyeriinete okorokwa Omwegenwa na Omonyakeene; ere nigo are kogamba na gokora esegi ase oboronge.
Ⅻ Amaiso aye nigo arenge buna ekebemberi ki’omorero, na igoro ase omotwe oye nchiarengeo chigutwa chinyinge. Narenge nerieta riarikire asare ritamanyiri na onde, otatiga ere omonyene.
ⅩⅢ Ere obekeire eganchwa etobekire ase amanyinga, na erieta riaye are korokwa Ring’ana ria Nyasae.
ⅩⅣ Na emeganda y’esegi ere igoro ekamotunyana, na abwo bariinete chibarasi chindabu, babeekeire chianga chi’egatani engiya endabu.
ⅩⅤ Korwa ase omonwa oye okaruao omoyio o birende ore omwoge, na ase oyio naake abanto b’ebisaku. Ere nabagambere nenyimbo y’ekioma, naende natiringe ekemitero ki’edivai y’endamwamu entindi ya Nyasae Omobui.
ⅩⅥ Naende nare nerieta ase eganchwa yaye na ase eriagati riaye ririikire iga: Omorwoti bw’abarwoti n’Omonene bw’abanene.
ⅩⅦ Erio nkarora omomalaika oteneine ase erioba ime, okorera ase eriogi rinene, ogoteebia chinyoni chiare koiruruka ase igoro gati, “Inchuo mosangererekane ase omoyega omonene o Nyasae.
ⅩⅧ Monyare koria chinyama chi’abarwoti, na echi’abatang’ani b’esegi, na echi’abaanto bare ne chinguru, ne chinyama chi’echibarasi, na echi’abariini babo, ne chinyama chi’abaanto bonsi, abatari abasomba, abake na abanene.”
ⅩⅨ Erio nkarora eng’iti eria, na abarwoti b’ense amo nemeganda yabo y’esegi basangererekanete amo bamorwanie ere oyoriinete ebarasi eria na omoganda oye.
ⅩⅩ Eng’iti eria ekabwatwa amo nomobani oria bw’oborimo, ere oyokorete ebikone ase obosio bwaye. Ase ebikone ebio nigo are kong’aina abanto baria baetwe ekemanyererio ki’engiti eria na gosasiima omogwekano oye. Abwo babere bakarutwa bare moyo ase enyancha y’omorero egwoka ekebiriti.
ⅩⅪ Na baria batigarete bagaitwa nomoyio o birende bw’oyoikaransete igoro ase ebarasi eria, omoyio o birende, oria okorua ase omonwa oye. Ne chinyoni chionsi chikaigota ase chinyama chiabo.