ⅩⅩⅧ
Ⅰ Ase engaki eyio Abafirisiti bagasangereria abarwani babo amo, erinde barwanie Abaisraeli, na Akisi agateebia Daudi: “Goika omanye ng’a aye amo n’baanto bao nigo mogochia kondwanesia esegi.”
Ⅱ Daudi akamoiraneria: “Ayio mbuya kegima; aye nomanye egento inche, omosomba oo, ndakore.”
Akisi agateebia Daudi: “Ningokore obe omorendi bw’obogima bwane kogenderera botaambe.”
Saulo okogenda ase omokungu korigia ogosemigwa korwa ase emeika y’Abanto bakuure
Ⅲ Bono Samweli konya okuure na Abaisraeli bonsi konya bamoreereire, bamotindekire ase omochie oye Rama. Boigo Saulo konya oseririe Abanto baarenge koboria amang’ana korwa ase emeika y’Abanto bakuure, amo nabaringoria bonsi.
Ⅳ Abafirisiti bagasangererekana, bagatoora agwo Sunemu; Saulo nere agasangereria Abaisraeli bonsi amo, nabarabwo bagatoora agwo Giliboa.
Ⅴ Ekero Saulo aroche abarwani b’Abafilisti agasogwa nomoondoko, na enkoro yaye ekaiguswa mono.
Ⅵ Saulo akabooria komanya korwa ase Omonene, korende Omonene tamoiraneretie gento kende, nonya goetera ase chindoto, gose goetera ase Urimu, gose goetera ase ababani.
Ⅶ Erio Saulo agateebia abasomba baye: “Indigerie omokungu okoboria amang’ana korwa ase emeika y’abanto bakuure, nimochiere, ndigie ogosemigwa korwa asare.”
Abasomba baye bakamoiraneria: “Naama! Agwo Eni‐Dori omokungu buna oyio nareo.”
Ⅷ Erio Saulo agekona, akabeeka chianga ching’ao, akagenda amo n’baanto bande babere, bagaika ase omokungu oyio botuko. Saulo agateebia omokungu oria: “Indagore ase omoika, ondetere omonto oria ndatore erieta riaye asore.”
Ⅸ Omokungu oria akamoiraneria: “Amaene, aye nomanyete aya Saulo akorire, buna asiririe korwa ase ense eye abakungu abakoboria emeika y’Abanto bakuure amo nabaringoria bonsi. Nase ki rende okombeeka ase oboreba, mbwatwe na gokwa?”
Ⅹ Erio Saulo agatiana ase engencho y’omokuungu oria, agateeba: “Ekeene, buna Omonene are moyo, aye tokonyora egesusuro ase engencho y’amang’ana ayio.”
Ⅺ Omokungu oria akamobooria: “Ning’o oganetie nkorangererie arorekane?”
Saulo akamoiraneria: “Indangererie Samweli.”
Ⅻ Korende ekero omokungu oria aroche Samweli, agakuura neriogi rinene agateebia Saulo: “Nase ki kwang’aina? Aye n’Saulo.”
ⅩⅢ Omorwoti oria akamoteebia: “Tibwoboa! Ninki kwarora?”
Omokungu oria akamoiraneria: “Narorire enyasae egotiira korwa riroba inse.”
ⅩⅣ Saulo akamobooria: “Naki ekerorekana?”
Omokungu oria akamoiraneria: “Nomogaka omogotu bwetubete egetambaa gi’okwambara.”
Erio Saulo akamanya ng’a oyio ’Samweli, agatugama inse, akaorokia amasikani.
ⅩⅤ Samweli akabooria Saulo: “Nase ki gwanchandire okondeta korwa ase omotimoko one.”
Saulo akairaneria: “Inche nigo nchandegete mono; Abafirisiti nkondwania bare esegi, na Nyasae onyangire, tari kong’iraneria, goetera ase ababani, gose ase chindoto. Ase ayio nigo nakorangeirie, erinde onteebie eki ndakore.”
ⅩⅥ Samweli akairaneria: “Nase ki okomboria inche, onye Omonene okwangire na obeire omobisa oo?
ⅩⅦ Omonene ogokoreire ayio akwanete goetera ase ’nde; okourire oborwoti korwa ase amaboko ao, oboeire omonto omoao, nere Daudi.
ⅩⅧ Tikwaigwerete eriogi ri’Omonene, gose goikerania egesusuro ki’endamwamu yaye entindi igoro y’Abaameleki. Ekio nakio kiagera Omonene akorire amang’ana ayio asore reero iga.
ⅩⅨ Boig’Omonene nache abeeke Abaisraeli amo naye ase amaboko ’Abafilisti. Ankio aye amo nabamura bao moche kobeera amo nainche, n’Omonene nache abeeke abarwani b’esegi b’Abaisraeli ase amaboko ’Abafilisti.”
ⅩⅩ Erio agwo Saulo agaaka inse, akarambereria ore nobwoba obonene ase amang’ana ayio a Samweli. Chinguru chikamoerera kegima, ekiagera tariete kende ase omobaso bwonsi na obotuko boigo.
ⅩⅪ Erio omokungu oria akamochera Saulo akarora ng’a osoirwe nomoondoko, akamoteebia: “Rora inche omosomba oo omokungu nigo nakoigwera na tinaegerete obogima bwane, nakora buna kwaganetie.
ⅩⅫ Gaki bono koranche inyigwe inche omosomba oo omokungu, tiga nkorentere endagera orie, erinde onyore chinguru, ogenderere norogendo rwao.”
ⅩⅩⅢ Ere akaanga, akabora: “Tinganeti koria,” korende abasomba baye amo nomokuungu oria bakamosorora goika akaigwera amang’ana abo. Erio akaimoka korwa inse agwo, agaikaransa borere.
ⅩⅩⅣ Omokungu oria nabwate emori enoru nka bwoye, akayenyenya bwango. Boigo akaimokia obosie, akabokonya, agakora emegati etabekiri memera, akayegekera.
ⅩⅩⅤ Erio akarenta endagera eyio ase Saulo na abasomba baye, nabarabwo bakayeria. Magega y’ayio bakaimoka, bakagenda ase obotuko obwo.