EGETABU GIA KABERE GIA
SAMWELI
Ogochaakera
Egetabu eke, nigo gekobwatia keria gia Samweli yeritang’ani. Kerokio nigo kebwate omogano bw’oborwoti bwa Daudi; ritang’ani ase egesaku kia Yuda agwo ase ensemo ya sugusu (1-4) naboigo ase egesaku ekegima kia Abaisraeli (5-24). Omogano oyo nigo okoorokia maiso marore omokia o Daudi ase okorwana na ababisa ime y’egesaku kia Abaisraeli naboigo ababisa korwa chinse namarwoti a isiko ase okogareyia chimbebe chi’oborwoti bwaye. Ere omorwoti Daudi nigo akoorokigwa koba omwegenwa ase Omonene Nyasae oye, naboigo chinchera anyorete ogwancherwa n’oboigweri korwa ase abanto b’egesaku kia Israeli ase oborwoti bwaye. Nonya nabo, Daudi boigo nkoorokigwa are koba omotindi chingaki chinde ase engencho yokwerigeria ayaye omonyene. Omorwoti Daudi, boigo ngwancherana are egesusuro ki’Omonene Nyasae ase amamocho aye ekero Nathani omobani bw’Omonene Nyasae akomoenekeria ogosaria kwaye. Oborai bwa Daudi nigo bwagogetie Abaisraeli mono goika ekero bakogania na gosemeria konyora omorwoti orabarae naende, nigo bakomorigia korwa ase ororeeria rwa Daudi—omorwoti omuya.
Okobagwa kw’egetabu eke:
Daudi okogaambera Abayuda 1:1—4:12
Daudi okogaambera Abaisraeli bonsi 5:1—24:25
a. Emiaka ye ritang’ani 5:1—10:19
b. Daudi na Batiseba 11:1—12:25
c. Emechaando na obokong’u 12:26—20:26
d. Emiaka y’omoerio 21:1—24:25
Ⅰ
Daudi ogotebigwa ng’a Saulo okuure
Ⅰ Magega Saulo gakuure, Daudi akairana korwa ase ogoita Abaameleki, akabeera agwo Sikilagi ase engaki y’amatuko abere.
Ⅱ Ase rituko ria gatato, omonto agacha korwa ase egetwori gia Saulo; chianga chiaye nigo chiatandoire, na amaroba are ase omotwe oye. Ekero aigete ase Daudi, akagua inse maumama ase okoorokia amasikani.
Ⅲ Daudi akamobooria, “Ng’ai okorwa”?
Ere akamoiraneria, “Nigo natoorekire korwa ase egetwori ki’Abaisraeli.”
Ⅳ Naende Daudi akamobooria, “Amoteebie buna amang’ana agendererete aria.”
Omonto oria akamoiraneria, “Abanto abange batamire korwa ase esegi eria, na abande abange mono baitirwe bakuure. Boigo Saulo amo na Yonathani, momura oye, baitirwe bakuure.”
Ⅴ Daudi akaboria omomura oria, “Inaki gwakorete okamanya ng’a Saulo na Yonathani, momura oye, bakuure?”
Ⅵ Omomura oria akamoiraneria, “Nigo yabete ng’a nao narenge ase egetunwa kia Giliboa, na aroro ’nkarora Saulo osigamerete riitimo riaye; chigaari konya chiamoikereire ang’e, na abanto bariinete chibarasi bakomominyokia.
Ⅶ Agachia korigereria magega, akandora, akandangeria, na inche ngaitaba: Nao inde aa.
Ⅷ Erio akamboria: Naye ng’o? Nkamoiraneria ng’a n’Omoameleki inde.
Ⅸ Ere aganteebia: Koranche, ong’ike ang’e ong’ite, ekiagera nonya ngendererete koba moyo, nigo inde nobororo bw’ogokwa.
Ⅹ Ase ayio ’nkamoika ang’e, ’nkamoita, ekiagera nigo namanyete ng’a tare koba moyo magega kaguure. Nkamorusia eguutwa y’obogaambi yare motwe oye na egetange kiarenge koboko kwaye, narentire ebinto ebio aa ase ore, aye omonene one.”
Ⅺ Erio Daudi akabwata chianga chiaye, agachitandora, na abanto bonsi abarenge amo nere bagakora bo.
Ⅻ Bakarera na kweumia, na kweng’ata goika mogoroba ase engencho ya Saulo na Yonathani, omwana oye, na ase engencho y’abanto ba Omonene na ey’Abaisraeli, ekiagera barabwo konya baitirwe nemioro.
ⅩⅢ Daudi akaboria omomura oria omoteebia amang’ana ayio, “Aye noyo o arari ore?”
Ere akamoiraneria, “Inche nigo inde omwana bw’Omoameleki ore omomenyi aa.”
ⅩⅣ Daudi akamobooria, “Inaki yabete otairogete korambora okoboko kwao ase ogoita omoakwa amaguta bw’Omonene”?
ⅩⅤ Erio Daudi akarangeria omomura oyomo, akamoteebia, “Inchuo omoite!” Omomura oria agaaka Omoameleki oria, akamoita,
ⅩⅥ ekiagera Daudi konya oteebirie Omoameleki oria, “Okomocha kw’ogoiterwa kw’amanyinga ao, tiga kobarwe igoro yao, ekiagera kwebereire kirori aye omonyene, ekero gwateba ng’a gwaitire omoakwa amaguta bw’Omonene.”
Daudi Okoreera Saulo Na Yonathani
ⅩⅦ Daudi akareera Saulo na Yonathani, momura o Saulo, n’ogoteera oko gw’okweumia.
ⅩⅧ Agachiika ng’a abanto b’egesaku kia Yuda borokererigwe ogoteera okwo kw’obota koriikire ase Egetabu kia Yashari.
ⅩⅨ “Inwe Abaisraeli, obonene bwaino
bwasireire igoro ase ebigoro biaino!
Chituoni chi’eseegi chiaitirwe.
ⅩⅩ Timoteeba amang’ana aya ase Gati,
timoyararia ase chinchera chi’Askeloni.
Timotiga abaiseke b’Abafilisti bachenge;
timotiga abaiseke b’ abanto baria batarogeti bagoke!
ⅩⅪ “Inwe ebigoro bia Giliboa,
ogotoora kwe riime tikoba igoro ase more,
gose embura tetwa,
gose emegondo teeba ekwama endagera ekoruegwa ase Omonene,
ekiagera aroro agwo nao chinguba chie chituoni chiasareretigwe,
na enguba ya Saulo etaagetwe amaguta naende.
ⅩⅫ Obota bwa Yonathani nigo bwaitete abanto abange,
nigo bwaiterete amanyinga,
bogaita abanto chituoni abarenge abanoru;
naboigo omoro o Saulo torenge koirana bosa.
ⅩⅩⅢ Saulo na Yonathani barenge abanchwa baito, barenge gotogokia.
Ase obogima na ase amakweri tibaatananetwe.
Barabwo nigo barenge abaango kobua ebiongo,
nigo barenge ne chinguru kobua chindo.
ⅩⅩⅣ “Inwe abakungu b’Abaisraeli, reera Saulo,
nere obaboyetie chianga chie rigori rinene,
chianga chimbariri chi’okwegokeria,
agachichabera ebinto bi’etaabu.
ⅩⅩⅤ “Chituoni chiaitirwe ase esegi!
Yonathani nao araire ase ebigoro igoro, oitire.
ⅩⅩⅥ “Aye Yonathani ominto,
nigo inde nomoichano omonene ase engencho yao,
aye nigo konya ongogetie mono.
Ase inde obwanchani bwao nigo bwarenge obonene
kobua obwanchani bw’abakuungu.
ⅩⅩⅦ Chituoni chiaitirwe,
na ebirwanero bi’eseegi biasiriigwe.”