ⅩⅫ
Ogoteera kw’obobui
Ⅰ Oko nogoteera Daudi atererete Omonene, ekero Omonene amotooretie korwa ase amaboko y’ababisa baye na aya Saulo.
Ⅱ Agateeba:
Omonene nere egetare kiane na eburi y’ane enkong’u;
nere Omotooria one.
Ⅲ Nyasae one nere egetare kiane, ase are nao nyebisete,
ere n’enguba y’ane enkengerete,
na orogunchara rwane rwandeterete ogotooreka,
naende nere eburi y’ane enkong’u, na obotamero bwane.
Ere n’Omotooria one, oy’ogontooria korwa ase obotindi.
Ⅳ Nindangerie Omonene, oyo ogwenerete gotogigwa,
nigo arantoorie korwa ase ababisa bane.
Ⅴ Emerindo y’amakweri konya yang’etananire,
chiooro chi’obobe chikandetera obwoba.
Ⅵ Obobe bw’amakweri nigo bwang’etananete,
emeeto y’amakweri egantega na kombwata.
Ⅶ Ase emechando y’ane ’nkarangeri’Omonene;
’nkarera ase Nyasae one.
Korwa ase Hekalu yaye akaigwa eriogi riane,
ekerero kiane gekamoikera, ere agakeigwa.
Ⅷ Erio ense ekanyegerigwa na koondoka,
amaroso a igoro agatengechigwa.
Ee, ense ekaiguswa,
ekiagera Omonene areenge n’endamwamu.
Ⅸ Erioki rigasoka korwa ase chimioro chiaye,
na omorero ogosaamba korwa ase omonwa oye:
ee, omorero bw’amakara ogasooka korwa ase are.
Ⅹ Akang’usa igoro goocha inse aa, nere agacha,
riire rimwamu rikaba inse y’amagoro aye.
Ⅺ Akariina egetongwa kebwate chimbaba, akairuruka;
akarorekana igoro ye chimbaaba chi’embeo.
Ⅻ Agetuba ere omonyene n’omosunte,
na amare amarito aichire amaache.
ⅩⅢ Korwa ase obomeka‐meku obwo bwareenge bosio bwaye
okomesa gokaruta ebibembeeri bi’omorero.
ⅩⅣ Omonene agaaka enkoba korwa igoro,
na eriogi ri’Oyore Igoro Mono rikaiguugwa.
ⅩⅤ Akaruta chinsara, agaserebania ababisa baye,
akabaaka nokomesa.
ⅩⅥ Erio ebiambokero bi’enyancha bikarorekana,
na oboroso bw’ense bokaorokigwa aarabu,
ekero Omonene abatogonyerete
ase okwoga kw’omoika bwe chimioro chiaye.
ⅩⅦ Omonene akarambora okoboko kwaye korwa igoro, akambwata,
akandusia ase amaache amaange.
ⅩⅧ Agantooria korwa ase ababisa bane bare ne chinguru,
na korwa ase abwo bangechete;
barabwo nigo bareenge ne chinguru kombua.
ⅩⅨ Ekero nareenge nemechando bakandwania,
korende Omonene akaba egekengero kiane.
ⅩⅩ Akang’ira aase areenge aagare,
agantooria, ekiagera namogoogetie.
ⅩⅪ Omonene nigo ang’ete eng’eria y’obuya, ekiagera inde omooronge;
nigo ansesenetie, ekiagera inde n’amaboko atari na komocha.
ⅩⅫ Inche nabeire ’nkobwatia chinchera chia Omonene,
tintigeti Nyasae one ase ogokora amabe.
ⅩⅩⅢ Nabeire ’nkoreenda amachiiko aye onsi,
na timbeti ’ngotiga emeroberio yaye echiikire.
ⅩⅩⅣ Nigo nareenge omoikeranu ase are,
’nkereenda korwa ase obobe.
ⅩⅩⅤ Omonene ong’akanire, ekiagera ’ngokora ayare boronge,
na ekiagera arooche ng’a nomochenu inde.
ⅩⅩⅥ Aye Omonene nigo ore omwegenwa ase abwo bare abegenwa;
nigo okweorokia ng’a nomoikeranu ore ase abwo bare abaikeranu.
ⅩⅩⅦ Aye nigo ore omochenu ase abwo bare abachenu,
nigo okwanga abwo bare abakorekanu.
ⅩⅩⅧ Aye nigo ogotooria abanto bare abaitongo,
korende amaiso ao nigo arigereretie abare abaenenu
ase okobairania inse.
ⅩⅩⅨ Aye Omonene nigo ore etaya y’ane;
Omonene one, nigo okoonchora omosunte one oba omobaso.
ⅩⅩⅩ Konde amo naye, nigo ndasirie omogaanda bw’eseegi,
na ekero inde na Nyasae one nincharoke chindwaki igoro.
ⅩⅩⅪ Enchera ya Nyasae neng’ikeranu;
amang’ana aye ateemirwe na gotenena.
Ere nenguba ase bonsi abakomotamera.
ⅩⅩⅫ Inee! Ning’o ore Nyasae, otatiga Omonene?
Ning’o ore egetare, otatiga Nyasae oito?
ⅩⅩⅩⅢ Nyasae nere eburi y’ane ye chinguru,
nigo akoraa omonto omooronge ase enchera agoeta.
ⅩⅩⅩⅣ Ere okorire amagoro ane abeire buna ay’egesia,
onkong’irie na gontenenia ase ebitunwa.
ⅩⅩⅩⅤ Ere bworokereirie amaboko ane korwana esegi, erinde amaboko
ane anyare gokumba obota bw’etai.
ⅩⅩⅩⅥ “Aye kwang’eire enguba yao ase ogontooria,
na ogokonywa kwao gwankorire nabeire omonene.
ⅩⅩⅩⅦ Kwang’eire aase aagare ngotaara,
na amagoro ane tagotererigwa.
ⅩⅩⅩⅧ Nkabwatia ababisa bane, nkabasiria,
gose tinairanete goika nkabakoora.
ⅩⅩⅩⅨ Nkabaakera inse nkabasenyenta, tibanyara koimoka,
bakagwa inse y’amagoro ane, bakabugwa.
ⅩⅬ Aye nigo kwambeegete chinguru chi’okorwana esegi;
okabeeka ababisa bane inse y’amagoro ane.
ⅩⅬⅠ Ogaseeria ababisa bane bagatama korwa ase inde,
abangeechete ’nkabasiria kegima.
ⅩⅬⅡ Barabwo bakarigereria,
korende onde tarenge obatooretie;
bakarangeri’Omonene,
korende ere tabaigwa.
ⅩⅬⅢ Nkabasunyunta bakaba ebuse ye riroba,
nkabamionogora na kobatiringa buna esike egotachwa ase chinchera.
ⅩⅬⅣ “Aye gwantooririe korwa ase okoamererania n’abanto bane,
kwandendire nabeire omogambi bw’abaanto b’ebisaku;
abanto ntamanyete, bono babeire abasomba bane.
ⅩⅬⅤ Abamenyi nigo bebeegete inse y’ane,
na ekero baigure chinkuma chiane, banyigwera.
ⅩⅬⅥ Abanto b’ebisaku ebiaao berusirie moyo,
kobagosooka korwa ase chiburi chiabo, nigo bakoiguswa.
ⅩⅬⅦ “Omonene nigo are moyo!
Ere oyore egetare kiane atogigwe!
Nyasae, egetare ki’ogotooreka kw’ane, aimokererigwe igoro.
ⅩⅬⅧ Nyasae nigo akonduseria egesiomba,
nabeeke abanto b’ebisaku inse y’ane.
ⅩⅬⅨ Ere nigo antooretie korwa ase ababisa bane,
akanyimokereria igoro ase abare mamincha y’ane,
naende agantooria korwa ase abanto abatindi.
Ⅼ “Aye Omonene, ase ayio ningotogie ase egati y’abanto b’ebisaku,
ninterere erieta ria’o ase okoritogia.
ⅬⅠ Nyasae ong’eire inche, omorwoti oye, obobui obonene,
oorokirie obwanchani botari koera ase ’nde, inche omoakwa amaguta oye,
inche Daudi, na ororeria rw’ane, goika kare na kare.”