ⅩⅩⅢ
Amang’ana y’omoerio A Daudi
Ⅰ Aya naro amang’ana y’omoerio a Daudi, mosinto o Yese, omonto oyo oimokereretigwe igoro, omoakwa amaguta o Nyasae o Yakobo, omoteri bw’amatera agwansa ase Abaisraeli:
Ⅱ Omoika bw’Omonene ogokwana goetera ase inde,
ring’ana riaye nigo rire ase omonwa one.
Ⅲ Nyasae bw’Abaisraeli okwanire,
ere oyore egetare ki’Abaisraeli onteebirie:
“Oyo okogaambera abanto ase oboronge,
oyo okogaambera ase okoiroka Nyasae,
Ⅳ nigo anga buna omobaso o mambia ase bare,
buna erioba rikobara emambia etari namare.
Nigo anga buna obonyansi bogokiina magega embura koyatuure.”
Ⅴ “Inee! Ororeria rw’ane tirori boronge ase Nyasae?
Takorete nainche okobwatana gwa kare na kare,
okwo korobeirie gotari koonchoka?
Inee! Nyasae tagonsesenia na gontooria,
naende ang’e aya ’nganetie?
Ⅵ Korende abanto ababe nigo bare buna amagwa atugutire,
atari gokunwa namaboko.
Ⅶ Omonto takoyakuna otatiga abe obwate ebioma
na orotanga rwe riitimo,
barabwo ’nabasaambwe n’omorero aroro agwo.”
Abarwani chituoni ba Daudi
(1 Amg 11:10-41)
Ⅷ Aya n’aro amarieta y’abarwani chituoni Daudi abwate: Yosebe‐Basebeti korwa Takemoni. Ere nigo areenge omonene bw’abwo batato, chituoni chi’abarwani. Ere agaita abanto amagana atan’atato ase engaki eyeemo, ase okona‐kong’wana‐ng’wania ne riitimo ria’ye.
Ⅸ Na oyo o kabere bw’abwo batato n’Eleazari, mosinto o Dodai bw’eamate y’Ahohi. Ere nigo arenge na Daudi ekero baramete Abafirisiti aase basangererekanete amo barwane esegi, na Abaisraeli bakairana magega.
Ⅹ Korende ere agatenena, agaita Abafirisiti goika okoboko kwaye gokarosa gokananterera ase omoro.
Omonene akabanyorera obobui obonene mono ase rituko riria. Erio abanto bakairana bagatunyana Eleazari, bagasakora ebisakorwa.
Ⅺ Na oyo o gatato ase abwo nere Sama, mosinto bw’Agee korwa Harari. Abafirisiti konya basangererekanire agwo, Lehi, ase omogondo orenge oichire ne ching’ende chi’egatani. Abaisraeli bagatama korwa ase Abafirisiti,
Ⅻ korende Sama agatenena ase omogondo gati, akayorwanerera, agaita Abafirisiti, n’Omonene akarenta obobui obonene mono.
ⅩⅢ Rituko erimo, ekero kie rigesa, abanto batato ase abwo abanene emerongo etato bakageenda ase Daudi maate ase rikuruma ri’Adulamu, na Abafirisiti konya batoorire ase ense omweya y’Abarefai.
ⅩⅣ Ase engaki eyio Daudi nigo areenge ase eburi ime, na abarwani b’Abafilisti nigo bareenge agwo Bethlehemu.
ⅩⅤ Daudi akaba okogania amaache anywe, akabora, “Ntare konyora omonto andetere amaache inywe korwa ase ensoko eyio ere ase egeita kia Bethlehemu!”
ⅩⅥ Erio abanto baria batato bakabinya‐binyia egati y’Abafilisti aase batoorete, bakabuucha amaache korwa ase ensoko eria yareenge ase egeita gia Bethlehemu, bakayairera Daudi. Korende Daudi tayanywa, otatiga ayaiterete koba ekeng’wanso gi’ekenyugwa ase Omonene,
ⅩⅦ akabora, “Omonene antange tinkora bo. Inee! Inywe amanyinga y’abanto bataegerete obogima bwabo?” Ase ayio akaanga, tayanywa.
Ayio naro abanto abwo batato chituoni bakorete.
ⅩⅧ Abisai, momura omwabo Yoabu bw’omokuungu Seruya ere nigo amanyekanete ase baria batato; akarwania abanto amagana atato, akababeta ne riitimo riaye, akabaita, akaba nerieta rinene ase baria batato.
ⅩⅨ Ase baria batato ere nigo abwate ogosikwa okuya goetania abande, akaba omoraai obo, korende tareng’anetie na baria batato b’eritang’ani.
ⅩⅩ Benaya, mosinto o Yehoyada, nigo arenge omonto etuoni korwa Kabuseli. Ere agakora emeremo emenene, agaita abanto babere chituoni b’Abamoabu. Engaki ende, ekero ki’obokendu, na amagena y’embura atwete, agasoa engoro agaita endo aroro.
ⅩⅪ Boigo agaita Omomisiri orenge omonene obwate riitimo. Akamochiera nenyimbo, akamoura riitimo riare koboko kwaye, akamoita neritimo riria riaye omonyene.
ⅩⅫ Amang’ana aya naro Benaya, mosinto o Yehoyada, akorete; nere akaba n’erieta rinene buna abanto baria batato chituoni.
ⅩⅩⅢ Akanyora ogosikwa okuya ase egati ya baria emerongo etato, korende tareng’anetie na baria batato b’eritang’ani. Daudi akamobeka akaba omoreendi bw’obogima bwaye.
ⅩⅩⅣ Abande ba baria emerongo etato nabwo aba:
Asaeli, momura omwabo Yoabu, na Elihanani, mosinto o Dodo korwa Bethlehemu;
ⅩⅩⅤ Sama na Elika korwa Harodi;
ⅩⅩⅥ Helesi korwa Peleti, na Ira, mosinto o Ikesi, korwa Tekoa;
ⅩⅩⅦ Abieseri korwa Anatoti, na Mebunai korwa Husa;
ⅩⅩⅧ Salimoni korwa Ahohi, na Maharai korwa Netofa;
ⅩⅩⅨ Helebu, mosinto o Baana, korwa Netofa, na Itai, mosinto o Ribai, korwa Gibea, bw’egesaku gia Benjamini.
ⅩⅩⅩ Benaya korwa Piratoni, na Hidai korwa ase amagoko ang’e na Gaasi;
ⅩⅩⅪ Abi‐Aliboni korwa Araba na Asimaweti korwa Bahurimu;
ⅩⅩⅫ Eliaba korwa Saalaboni, na basinto ba Yaseni, na Yonathani;
ⅩⅩⅩⅢ Sama korwa Harari na Ahiamu, mosinto o Sharari, korwa Harari;
ⅩⅩⅩⅣ Elifeleti, mosinto bw’Ahasibai, omonto korwa Maaka; Eliamu, mosinto bw’Ahitofeli, korwa Gilo;
ⅩⅩⅩⅤ Hesiro korwa Karimeli na Paarai korwa Ariba;
ⅩⅩⅩⅥ Igali, mosinto o Nathani, korwa Soba na Bani korwa Gadi;
ⅩⅩⅩⅦ Seleki korwa Amoni na Naharai korwa Beroti, omobogoria ebirwanero bia Yoabu, omomura bw’omokuungu Seruya;
ⅩⅩⅩⅧ Ira na Garebu korwa Itiri;
ⅩⅩⅩⅨ na Uria Omohiti.
Bonsi nigo bareenge emerongo etato, na batan’obabere.