ⅩⅩⅦ
Ⅰ Abanto abange bakorire ebibe ase okorigia ebitoki; oyotagete koba omotenenku nemogwenerete arende amaiso aye.
Ⅱ Buna ere akong’u korusia egesigisa gekong’onteire ase egati ya amagena ase enyomba, boigo nakong’u korusia obong’ainereria korwa ase okogora n’okoonia.
Ⅲ Monto onde bwensi otatunyaneti okomoiroka Omonene, enyomba yaye nesirigwe keri keri.
Ⅳ Buna egechunchugo gekorusia eogoto, naboigo amang’ana akorwa ase omonwa bw’omonto agocheng’enenia amamocho aye.
Ⅴ Buna eriko rikorenga emeremo yomokori chinyongo, naboigo chinkwana chikomorenga omonto.
Ⅵ Buna okwama kw’amatunda gokoorokia buna omote orendire, naboigo amang’ana akorwa ase omonto akomororekania.
Ⅶ Tobaisa komotogia omonto otaragamba nere ekiagera omonto nigo akorengwa na amang’ana aria agokwana.
Ⅷ Ekero oraganie koba omuya nabo ogoikerania koba omuya, naboigo kweboyia obuya buna rituko riomochengo.
Ⅸ Kera enyoni nigo egotunyana chinyoni chi’omogwekano oye, naboigo nekeene kegotunyana baria bakogeikerania.
Ⅹ Buna endo ekoboera ching’iti chiria egotwara, naboigo ebibe bikoboera abakori amabe.
Ⅺ Chinkwana chi’abaanto bamoirogete Omonene nigo chire nobong’aini botambe, korende abariri nigo bakoonchoka buna omotienyi.
Ⅻ Ekero orenyore ase egati ya abanto abariri aye karue aroro,; korende obere ase egati yabaanto abang’aini.
ⅩⅢ Chinkwana chi’abaanto abariri nokogechia, ogoseka kwabo noboriania bw’ebibe.
ⅩⅣ Ogokwana kwabo nigo kogokora bwegose kegima na okoamererania kwabo nigo gokomokora omonto goticha amato.
ⅩⅤ Eriomana riabaanto abetogia nigo rikorenta ogoitana, nokorama kwabo nigo kore obosooku kogotegerera.
ⅩⅥ Omonto okorwa obobisi nigo ere agosiria obwegenwa bwonsi, na ase obogima bwaye bwonsi takonyoora omosaani omoganetie.
ⅩⅦ Ancha omosaani na obe omwegenwa ase are, korende onye kogosokia obobisi bwaye, tobaisa gotaara nere naende.
ⅩⅧ Ekiagera buna omonto agosiria omobisa, naye boigo gwasaririe obosaani nomoamate oo.
ⅩⅨ Buna ere enyoni etairane gocha koboko kwao ekero yaminchoirie, naboigo tokomonyoora omosaani oo naende.
ⅩⅩ Tomotunyana ekiagera ere ochiire are mono, ere ominyokire buna egesia kiaminchoirie korwa ase omotego.
ⅩⅪ Riote nabo riragwenigwe, na okoramwa kwaberwe; korende, oria osokirie obobisi tabaisa gosemeria kende gionsi.
ⅩⅫ Omonto okogosumera amaiso nigo arigetie gokora amabe, naende onde taiyo oranyaare komoremereria.
ⅩⅩⅢ Ekero omonto oyio are ase ore aye, nigo agokwana amang’ana amansu naende nigo akogookera aria aye okomoteebia. Korende ere nigo araonchore chinkwana chiaye na kogotega ase amang’ana ao.
ⅩⅩⅣ Ase obogima bwane bwonsi ningeechete amang’ana amange korende inche tingecheti ing’ana rinde rionsi buna ingeechete omonto onga buna oyio, Omonene boigo nigo amogeechete.
ⅩⅩⅤ Omonto okoruta rigena gochia igoro nigo akoriruta igoro ase omotwe oye omonyene. Oyoogoaka chinkundi nigo akweremaria ere omonyene.
ⅩⅩⅥ Oyokorema engoro nigo akogwa ime ere omonyene, naboigo oria ogotega omotego nigo ere akobwatwa nomotego oria.
ⅩⅩⅦ Omonto ogokorera abande bobe, ere nanyorwe nobobe naboigo takomanya ase obobe obwo bokomoruera.
ⅩⅩⅧ Omonto omwerori nigo akorama na gochaaya, korende egesusuro nigo kemoganyete buna endo.
ⅩⅩⅨ Baria bakogookera okogwa kwa baria bamoirogete Omonene, barabwo ina babwatwe nomotego naende ina banyoore obosareru obonene barabwo batarakwa.
ⅩⅩⅩ Ekeririanda n’okoberoroka nigo bire ebinto ebibe, korende abakori amabe nigo babibogoretie ebio bionsi.