Ⅰ Omosacha ore nomokuungu omuya nare negesio; ere namenye emiaka ara kabere ase engencho yaye. Ⅱ Omokungu omwegenwa nigo are omogooko ase omosacha oye; omosacha oyio nigo aramenye nomorembe emiaka yaye yonsi. Ⅲ Omokungu omuya nekemo kiebiegwa ebiya biogosesenia bakoegwa baria bamoirogete Omonene. Ⅳ Omonto buna oyio abe omotaka gose omonda, ase obogima bwaye bwonsi nigo akomenya nomorembe ase omoyo oye; na ase ebiro bionsi nigo are nobosio bosasogete. Ⅴ Enkoro yane nigo eirogete amang’ana atato, ne ria kane nigo rikongosa; chinkuma chimbe ime yomochie, omosangererekano bwa abanto ababe, na ogosoera kw’oborimo. Aya onsi nigo are amabe kobua amakweri. Ⅵ Korende nigo ere ring’ana riogoichania ekero omokungu oyomo agotwara ribero ase oyonde na gotwara oromeme rogosiarokera kera omonto. Ⅶ Omokungu omobe nabo anga richoki rigosionora rigoti, goteema komogambera nabo enga kobogoria riagaga rire nobosongo. Ⅷ Omokungu omotindu nigo akorenta obororo ekiagera ere tari konyara gokengera chinsoni chiaye. Ⅸ Omokungu omotayayi nigo akororekana ase amaiso aye naende nigo akomanyekana ase ebioge biaye. Ⅹ Kabe omotindi ase omoiseke oo okorigia gotwara obosibore bwaye omonyene, otakoreti boigo, nigo aresarie ase akabaga agake. Ⅺ Erende na amaiso aye atari n’obosooku naende tibwegosa ekero arakorentere obosooku. Ⅻ Ere naigore ebinama biaye ande onsi ase kera omonto omotagete buna omoeti ore nerang’o agwasamerera ase okonywa amaache ande onsi agoeta. ⅩⅢ Omokungu omuya nigo akomogookia omosacha oye na obomanyi bwaye bwamokora omosacha oye koba chinguru. ⅩⅣ Omokungu omokiriru nekeegwa korwa ase Omonene na tiriyo rigori riranyaare koreng’anigwa nere. ⅩⅤ Omokungu ore nekerengo nigo akomenta koba omonyakieni, kerengo kierigori tikeiyo keranyaare korengerwa omokungu oyio. ⅩⅥ Ekieni kiomokuungu omuya nobochenu bw’enyomba yaye nigo binga ogosaseria kwe risase igoro ase erioba ri’Omonene. ⅩⅦ Naende buna etaya egwoka igoro ase ekebekerero gi’echitaaya ase hekalu. ⅩⅧ Buna emetobwa yetaabu, igoro ase ebikaransero biaye bw’echifeta, nabo ere emerondo yaye emeronge igoro ase amagoro aye. ⅩⅩⅧ Nareo amang’ana abere akong’ichania ase enkoro yane, nering’ana ria gatato rikombeyia: omosigari otari na besa, abanto abang’aini bachaayire, nomonto ogotiga oboronge ochaaka gokora amabe. Omonene nigo aramoe egesusuro n’omoro. ⅩⅩⅨ Nakong’u mono ase omoonchoreria gocharoka amamocho, na omoonia kwebacha korwa ase ebibe.