Ⅰ Enkoro yane nigo egokerete amang’ana atato; amang’ana ayio are amaya ase obosio bw’Omonene na Mwanyabaanto: ekero abanto bare abamwabo baigwanaine, abanto basinyaine bare noboamate obuya, na omokungu n’omosaacha oye bamenyete n’omogooko. Ⅱ Enkoro yane nigo egechete abanto be chingencho isato, abanto abwo bagechirie nobogima bwabo; abasabereri abetakoori, omonda omonyaborimo, na omogaka omonyaka otari na semi. Ⅲ Onye tikwanyaarete korogota gento kende kiogosemia ekero kwarenge omosae, inaki oranyaare konyoora egento ase obogotu bwao? Ⅳ Nering’ana rigiya ase omogaka ore ne chimbuche igoro ase omotwe oye goetia ayare amaya nere oria ore n’emiaka emenge komanya buna agoteebereria. Ⅴ Obong’aini ase abagaaka, amorokererio agwenerete, na boigo amorokererio korwa ase abasike nering’ana rigiya kegima. Ⅵ Abanto abagotu nigo babegete egutwa yobomanyi, nogwetogia kwabo nase okomoiroka Omonene. Ⅶ Inche nimbateebie amang’ana kianda ayio angogetie ase omoyo one, ee nerinde ria ikomi boigo nimbariteebie: omonto ogogete ase engencho ya abana baye, omonto oyio okomenya goika orora ababisa baye bagochandeka na gosira, Ⅷ omosacha ore negesio giokomenya nomokuungu ore nechiseemi, ere oria otari koremia chiombe amo nechitigere ase omogondo oye, ere oria otana korentererwa noromeme rwaye, omonto otari gokorera omonto otaisaini, Ⅸ omonto ore negesio giokonyoora omosani omwegenwa, boigo omonto oria abanto bakogooka komotegerera. Ⅹ Inaki ere engencho enene omonto konyoora obong’aini! Korende tai aroro omonto omonene buna oria omoirogete Omonene! Ⅺ Omonto omoirogete Omonene tabwati ekerengo. Okomoiroka Omonene nigo kobuete amang’ana onsi.

ⅩⅢ Tiriri riote ribe buna riote rienkoro! Tiboiyo obobe buna obobe bw’omokuungu! ⅩⅣ Tikori ogoakwa okonene buna okw’omonto ore n’obororo. Tikori ogoakana egesiomba okobe buna koria kogokorwa n’omobisa. ⅩⅤ Tibori obosongo obobe buna obw’eng’iti na tikeri ekeririanda ekebe buna ekeririanda kiomobisa. ⅩⅥ Nigo ere aororo komenya n’endo amo n’eng’iti kobua komenya n’omokuungu omobe. ⅩⅦ Obobe bw’omokuungu nigo b’ogosaria ekieni kiaye, obosio bwaye bwaba buna obw’etokoro. ⅩⅧ Omosacha oye ekero akoria endagera bw’omoamate takomocha goita egekoe nobororo. ⅩⅨ Tibori obobe obonene buna obw’omokuungu bw’omonto; oyio nanyorwe n’obokong’u bwa abanyene ebibe. ⅩⅩ Omosacha omwororo komenya nomokuungu omonyariogi nabo egwekaine emechaando omogaka omogotu akonyoora ase okoriina egetunwa kere n’omosere bw’amaroba. ⅩⅪ Tobaisa kobwatwa nobonyakieni bwo omokungu gose gosanera obotenenku bw’omokuungu. ⅩⅫ Ekero omosacha akoraagerigwa n’omokuungu oye, nigo akomenya ase obosooku, obororo na ogochaaya. ⅩⅩⅢ Enkoro echaandegete, koborwa omosasoko boigo gokwa omoyo nigo bikorentwa n’omokuungu omobe. Omokungu otari komogokia omosacha oye ere nigo akorenta okobuneka chinengo amo nokogoya kw’amaboko ase omosacha oye. ⅩⅩⅣ Ebibe nigo biarentetwe nomokuungu na ase engencho yaye goika intwe twensi tokwe. ⅩⅩⅤ Buna koreng’ana ogotanga ekerama kegotwa tikegoiterera amaache, boigo tobaisa komwanchera omokungu omobe gokwana buna ere anchete. ⅩⅩⅥ Onye ere tagokora buna okomoteebia, moserie arue asore.