Ⅰ Omonto ore n’amaabera nigo akoa oyomwabo singo; gokoonya omwamate oo okwo nakwo oikerania ebirage. Ⅱ Kae omoamate oo singo ekero are n’okogania kwogokoonywa, n’ekero ogosaba singo, iraneria omonyene ase obwango. Ⅲ Onye kogoikerania emeremo ekorengete, rirorio nabo okonyara gosaba singo, n’oyio ogosaba singo ase okogania kwao ng’a goikeranigwe kera engaki. Ⅳ Abanto bande nigo bakagete ng’a ogosaba egento singo n’ekeegwa, na koretera obosooku baria babarierete eira. Ⅴ Omonto nanyunyunte okoboko kw’omonto onde goiko omoire singo, erio ochaka komonyerera abande igoro y’obotenenku bw’omoamate oye. Korende ase engaki y’ogoakana esira nario erio orache komanya. Oyio nigo arakane ase okwemurungania okonge mono na kwerora ng’a taetwa chingaki chisaine. Ⅵ Naende naisa komwaakana, nigo aranya komoa ’nkenke, ekiagera omosabi singo tari oyo bogwaakana. Onye tari konyara gwaakana omonyene singo, oyio rirorio omoibeire, naende obeire rirorio omobisare bw’oria omoete singo. Gose amoakane ase okoraama na koragereria; ribaga riokomosika nigo akomoakana ase okomochecheria. Ⅶ Ase engencho eyio abange tibarigetie gokabesa, nigo baoboete koriananigwa. Ⅷ Nonya nabo, kabe omoremereria ase omonto omotaka, gose tomotiga aganye ogokoonya kwao ase egeka egetaambe. Ⅸ Koonya omonto omotaka keria agaanetie ekiagera erio nario richiiko, tomotiga agende amaboko amasa. Ⅹ Korera chifeta chiao emeremo na ase ogokoonya omwana omino gose omosani oo, gose tobaisa gotiga ebesa yao eboosere abwo ase oyebisete. Ⅺ Kora emeremo ase obotenenku bwao koreng’ana n’ogochika kwa Nyasae erio naye n’onyore eng’eria ase obogima bwao kobua chitaabu. Ⅻ Ichoria ekegancha kiao ase okoa abataka, eyio nero eng’eria eragotoorie ase chingaki chigwenerete. ⅩⅢ Eng’eria eyio n’ekorwanerere bosio bw’omobisa oo, buya kobua enguba yo’gokumia amo n’eritimo ririto. ⅩⅣ Omonto omuya nabo arabe ’ntenenera ase omwamate oye. Korende omonto otari na bosoku nabo akomotiga gochia abuo igo ⅩⅤ Tobaisa kueba obuya bw’onto okobereire ’ntenenera, ekiagera oyio obekire obogima bwaye akong’u okoba aye. ⅩⅥ Korende ase omonto omokori amabe, nigo agosaria obotenenku bw’oria omoberete ’ntenenera, omonto atari korora ng’a n’egento kiengecho goaka ng’a mbuya mono, oyio nigo agotiga oria omokoonyete. ⅩⅦ Okobeka egento ’ntenenera gwaitire abanto abatenenku abange, na kwabanyegeirie buna omwaga omorito. ⅩⅧ Kobeka egento ’ntenenera kwabekire abanto abange b’engencho komenya buna abatami, abanto abwo nigo bakona koombogana ase chingongo chiande. ⅩⅨ Omonyabibe ogwancha koba omoteneneri o singo n’erorere amang’ana amakong’u, naarigie eng’eria ko bono tanyenyora, nigo arenyore ase obokong’u n’erichiko. ⅩⅩ Mokonye omwamate oo buna oranyare, korende bwerende kegima erio tobaisa kogochwa na kogwa ase amakweri. ⅩⅪ Okogania okonene kw’obogima na amache, chiaanga amo n’enyomba ase oranyare kwebisa. ⅩⅫ Mbuya koba omotaka kore n’enyomba yao omonyene, kobua koba n’endagera buna ey’abanda nyomba mwabande. ⅩⅩⅢ Isaneka n’egeke ekio ore nakio, erio nario abanto batanyagokwemurunganeria ng’a nigo bwanche ebinto biabo na koria ebigeri biabande. ⅩⅩⅣ Nigo ere egento kiobosoku koombogana korwa enyomba gochia eyende, aande onsi ase ore omogeni tokoigora monwa oo. ⅩⅩⅤ Nigo okoarigania omogeni kwaboa ekenyugwa, na onde tari okogoakera ng’a mbuya mono. Korende abanto nigo bagokwana amang’ana yokogechia buna ⅩⅩⅥ “Aye omorwa isiko! Inchwo gocha igi gaaiga oariganie emesa! Na onye kore na gento ng’aa ndie. ⅩⅩⅦ Kore omogeni genda bwoo erio omotigerere omonto bw’engencho. Momura omonto ngochare bwone aiga ninde nokogania kw’eribaga ase enyomba yane.” ⅩⅩⅧ Ekero okorinwa oboraro na koramwa igoro y’oboraro, ayio tari koremerereka ase omonto ore n’obong’aini.