Ⅰ Bono tiga tobatogie abanto b’esiko, abagaaka baito n’ebiare biaetire. Ⅱ Omonene nigo abaete esiko enene, akabakinia koba abanene korwa amatuko a kare. Ⅲ Mbareo baria baraete amarwoti abo, abanto abanene ase okobua kwabo; abatebereria baichire nobong’aini abararia b’obobani. Ⅳ Abange nigo baraete ebisaku ase ebirengererio biabo, bakaba nobong’aini amo nechiseemi ase okonyorera abanto obuya, bare ne chiseemi ase amang’ana na amorokererio abo. Ⅴ Nigo baroisetie chingeero ase obong’aini bwabo, bakaroisia emeino na koyeriika. Ⅵ Barabwo nigo barenge abatenenku bare nobonda obonge, boigo bamenyete n’obotoereru ase chinka chiabo. Ⅶ Abwo bonsi nigo basikire ase ebiare biabo, bakaba nobonene ase chingaki chiabo. Ⅷ Abande ase egati yabo, bagatiga erieta rigiya ase ense, na abanto bakararia chinkuma chiabo goika reero iga. Ⅸ Mbareo boigo abande baria batainyoiri, abwo bagendete bakaba buna baria batamenyete ase ense. Nabo banga buna baria bataiboretwe, barabwo amo na abana babo barwete magega. Ⅹ Korende baria bande nigo barenge abanto abaya, abwo amakora abo amaya atana kwebwa. Ⅺ Chinibo chiabo nigo chigotigara ase ababiare baabo, na oyio noro omwando obo. Ⅻ Ababiare baabo nigo bagotunyana okobwatana gwakoretwe ase bare, na ase engencho eyio barabwo inabagenderere gokora boigo botambe. ⅩⅢ Chinderia chiabo inachigenderere kare na kare, na esiko yaabo tegotinyigwa. ⅩⅣ Emebere yaabo nigo yatindegetwe ase omorembe, amarieta abo nigo agendererete kobao ekiare ekemo goika ekende. ⅩⅤ Abanto inabakwane obong’aini bwabo, nerisango ria abanto ndirarie chinkuma chiabo. ⅩⅥ Enoku nigo amogogetie Omonene, ere akairwa igoro. Ere akaba omogwekano omuya bw’okoorokia ebibe ase ebiare bionsi. ⅩⅦ Nuhu akarorekana koba omoikeranu na ore namasikani; ekero ogosirigwa gwachete, akaba omochakano omoyia o Mwanyabaanto. Ekiagera ngoetera asere abanto batigarete ase ense ekero etoigo yachete. ⅩⅧ Omonene agakora okobwatana amo nere gotakoera, egere ebitongwa tibibaisa naende gosirigwa ase enchera y’etoigo. ⅩⅨ Aburamu nigo arenge omogaka omanyekanete ase ebisaku ebinge, gose tarengeo omonto ore nesiko buna ere. ⅩⅩ Akabwatia amachiiko y’Omonene, nere Omonene agakora okobwatana nere, agaikerania ase omobere oye ekemanyererio giokobwatana okwo, boigo ekero Aburamu nigo atemetwe, akarorekana ere ore omoikeranu. ⅩⅪ Erio Omonene akamoriera chiira ogoteeba buna ebisaku bionsi inabisesenigwe goetera ase oroiboro rwaye; buna oroiboro rwaye inarobe nobonge buna oyo orotu rwense. Buna inababe abange buna ching’enang’eni na omwando obo buna orwaro oromo rwe enyaancha goika oronde, gochaakera ase orooche rw’Eufarati goika chinsinyo chi’ense. ⅩⅫ Boigo Omonene akamoa Isaka erio aikeranie eira eria eria ase engencho ya Aburamu Ise. Ogosesenigwa ase abanto bonsi nokobwatana kwaye, ⅩⅩⅢ akabibeeka ase Yakobo. Akamotenenia Yakobo ase ogosesenigwa kwaye, akamoa ense eria ebe eyaye ere omonyene na koyegaba ase egati yebisaku ikomi na bibere.