Ⅰ Yoshua mosinto o Nuni nigo arenge egeata ase esegi, nere nigo arenge buna erieta riaye, omotooria bwa abachoore ba Omonene, akabaakanera egesiomba ase ababisa abwo barenge kobarwania erio akabairaneria Abaisraeli omwando obo. Ⅱ Ere nigo abete nomogooko ekero aimogetie amaboko aye igoro, ekero arenge koimokia na koraga omoro oye gochia ase obomenyo bw’ebisaku. Ⅲ Ning’o naende omogwekaine konya ere atarabao? Ekiagera ere arwanete esegi y’Omonene. Ⅳ Inee, risase tiriatenenete ase okoimokererigwa kwa amaboko aye? Inee, rituko tirianyarete gotambeigwa rikarengana amatuko abere? Ⅴ Yoshua nigo amosabete Omonene Omobui ore n’Okobua, ekero ababisa bamoetananete korwa ase kera ensinyo. Ⅵ Nere Omonene ore n’Okobua, akamoiraneria akabatomera embura ere nechinguru ya amagena. Omonene agasaagana egesaku ase egetirimboko gia Beth-horoni akabasiria bonsi baria barenge komoengereria. Ekagera ebisaku bikerorera obuya bwebirwanero biaye, buna ere nigo arenge korwana ase obosio Omonene, ekiagera ere amotunyanete Omonene nenkoro yaye yonsi. Ⅶ Ase amatuko a Musa, Yoshua nigo arenge omwegenwa ere amo na Kalebu mosinto o Yefune, bagatenena bokong’u koengererania nomosangererekano, bakabatanga abanto tibakora ebibe, na gokiria okwemurungania kwa abanto abwo. Ⅷ Ase egati ya abanto chilifu amagana atano nomo (600,000) barenge ase orogendo, nabwo babere boka batigetwe bakabaraa abaaanto goika ase ense eria yaabo, ense yarenge goiteka obooke na amabeere. Ⅸ Omonene akamoa Kalebu okobua, nere akaba nakorokwo goika obogotu bwaye. Ⅹ Erio abanto bonsi b’egesaku kia Abaisraeli bakarora obuya bwokomotunyan’Omonene. Ⅺ Erio bakabwatia abagaambi, kera oyomo nechinkuma chiaye, barabwo tibang’ainegete komotiga Omonene na gosasiima emegwekano. Barabwo bakainyorwa emiaka yonsi ase chinkuma chiabo. Ⅻ Tiga emebere yaabo etware chinguru aaria ase batindegetwe, na amarieta abo abwo bamoirogete Omonene amenye goetera ase oroiboro rwabo. ⅩⅢ Samweli nigo anchetwe n’Omonene. Ekero arenge omobani Omonene agachaakia oborwoti, akabaaka amaguta abarai ba abanto. ⅩⅣ Akabagaambera emeganda ya abanto kobwatekana nogochika kw’Omonene, nere Omonene akabarenda abanto ba Yakobo. ⅩⅤ Ase obwegenwa bwaye akaenekiwa buna ere ekeene nomobani, ase amang’ana aye akaba omoringoria ogosemerigwa. ⅩⅥ Akamosaba Omonene Omobui, ekero ere aetananetwe na ababisa ase kera ensinyo, akamorwera Omonene ekeng’wanso ki’emanwa yeng’ondi. ⅩⅦ Erio Omonene akaruma korwa igoro, agakora eriogi riaye rikaigweka ase ogotitira okonene. ⅩⅧ Akabasiarera are abarai b’egesaku gia Turo, amo na abarai bonsi ba Abafilisiti. ⅩⅨ Ekero ere atararaara ase chitoro chiaye chi’omoerio, Samweli akaba kirori ase obosio bw’Omonene na omochore oye buna ere tanyaarete kobogoria enibo ya monto onde bwensi, gose nonya nenuga yebikoroto. Tabeteo omonto orenge aba komosoera. ⅩⅩ Akagenderera korwa obobani nonya nekero ere akuure akamobisoreria omorwoti igoro yomoerio oye; akarusia eriogi korwa ime ye embeera, akarua obobani ase ogosiria obobe bwa abanto.