Ⅰ Erio boigo akabwatia Nathani; oyio orenge omobani ase amatuko y’omorwoti Daudi. Ⅱ Koreng’ana buna amaguta yogokora ebing’wanso bi’omorembe agochoorwa na kogachwa ase emeremo y’Omonene, nabo Daudi aatananetwe korwa ase egati ya Abaisraeli. Ⅲ Ere agakora egosori ase chindo buna oyore ase chimbori na chitokoro buna oyore ase egati yechimbori. Ⅳ Ase obosae bwaye agaita rimonto akabaruseria abanto baye amachaaya yokorama kwaye. Akaruta rigena ase enduruche yaye akamoiyeria Goliato omwetogia. Ⅴ Ekiagera ere amosororete Omonene Nyasae nere agatenenia okoboko kwaye gwokorio, erio ere anyare komobua omobisa omonyanguru ase esegi na kobasegeta abanto baye. Ⅵ Abanto bakamotogia ase ogoita ababisa ikomi na komochengera ase amasesenigwa y’Omonene ekero abekeretwe egobia y’oborwoti. Ⅶ Akabaabusera are ababisa baye korwa chinsinyo chionsi na kobakiria Abafilisiti; agachitagora chisiiro chiabo goika reero iga. Ⅷ Ase kera ring’ana akorete, ere Daudi akaba okomotogia Omochenu Omonene. Akamwancha Omotongi oye na komoterera amatera yogotogia ase enkoro yaye yonsi. Ⅸ Akababeka abateri ase obosio bw’egesasiimero, barabwo banyaare komoteerera amateera amaya goetera ase amariogi abo amaya. Ⅹ Akayakora amatuko amanene koba amaseera, na koyarobereria chingaki chiaye ase omwaka omogima, ekero abanto barenge gotogia erieta richenu ri’Omonene, erio Hekalu egaichorwa namatera amaya gochaakera emambia ekero bogokiamoka. Ⅺ Omonene akamoruseria Daudi ebibe biaye, na gokinia okobua kwaye kare na kare; akamoa oboronge bw’okoba omorwoti, akabeka ekerogo kiaye kiobonene ime ya Israeli. Ⅻ Magega ya Daudi, omwana oye omong’aini akamenya nomorembe ase engencho yaye. ⅩⅢ Solomoni akagaamba ase engaki yomorembe. Nyasae akamoa ebisio bi’omorembe korwa chinsinyo chionsi, erio ere aagache enyomba ase esiko yerieta riaye, na koarigania Hekalu ekomenya ase chingaki chitakoera. ⅩⅣ Ekeene aye nigo kwarenge n’obong’aini aye Sulemani ekero kwarenge omosae! Nigo kwarenge goitororoka obong’aini buna orooche. ⅩⅤ Okamanyekana ase ense engima ase obomanyi bwao, ase emereng’anio nokogena. ⅩⅥ Erieta riao rigakuma goika ase ebisinga bie chinse chi’aare, abanto bakagwancha ase okobarentera omorembe. ⅩⅦ Ase amateera, emegwekano, emereng’anio na amorokererio aye, chinse chionsi chigatengechigwa na goichana. ⅩⅧ Ase esiko ye erieta ri’Omonene, oyio okorokwa Omonene Nyasae bw’Abaisraeli, ogasangereria chitaabu buna ebibanga n’echifeta buna ebioma bia Abaisraeli. ⅩⅨ Korende aye okoyorwa omobere oo ase abakungu, okaba omosomba bw’okogania kwao. ⅩⅩ Okabeeka ekemoa ase esiko yao, na goturutumba eamate yao goika okabarentera egesusuro abaibore bao, bagaichanigwa ase engencho yoboriri bwao. ⅩⅪ Goika oborwoti bogaatananekana ara kabere, oborwoti bw’okoamererania bogasoka korwa Efraimu. ⅩⅫ Korende Omonene tagotiga koba namaabera, gose gotiga emeremo yaye yonsi esareke; ere takobatugutera are abaibore ba Daudi, omochoore oye, gose gosiria egesaku kiaye ere oria anchete. Ase igo ere akamotigareria Yakobo ebitigari, naboigo Daudi omori bw’eamate yaye. ⅩⅩⅢ Solomoni agakwa buna omogaka oye, akamotiga oyomo ase abana baye koba omorai. Oyio nere Rehoboamu, oichire oboriri naende otarenge na bong’aini ere ase oborai bwaye akabakora abanto bagatananeka. Narengeo boigo Reoboamu mosinto o Nebati, oyio ogerete Abaisraeli bagakora ebibe, naboigo kobaraa Abaefraimu ase enchera y’ogokora ebibe. ⅩⅩⅣ Ebibe biabo bikamenta koba ebinge kegima goika bikagera barabwo bagaserigwa korwa ase ense yaabo. ⅩⅩⅤ Ekiagera barabwo bateemete gokora kera engencho yobobe goika Omonene akabaakania egesiomba.