Ⅰ Aye Omonene Nyasae, nagwakeire buya na kogotogia, omotooria one. Naribakire eriata riao. Ⅱ Ekiagera aye kwabeire omorendi n’omokoonyi one. Gwatooririe omobere one korwa ase amakweri, na korwa ase emeeto y’abanto abanyaborimo ababe. Korwa bosio bw’ababisa baane abwo barenge gochia gonsiria ogantooria erio okaba obotamero bwane. Ⅲ Ase engencho y’obonene bw’amaabera ao ogankoonya, korwa ase chinchera chia ababisa baane abwo batagete gonsiria ogantooria, na korwa ase baria barenge korigia obogima bwane, na korwa ase emechando eria naremereretie, aye ogantooria, Ⅳ na korwa ase omorero ore gwoka korwa chinsemo chionsi, oyio inche omonyene ntautete, Ⅴ na korwa emerindo y’amakweri, na korwa ase baria bakoraama bobe na goteeba amang’ana ’oborimo, na korwa ase abagenki b’echimeme chikorasa n’obosongo bw’amabe ogantooria. Ⅵ Konya naikigwe bosio ase obosio n’amakweri, n’obogima bwane konya bwaikire aang’e n’ogokwa. Ⅶ Ababisa baane konya bandomeirie korwa chinsemo chionsi n’erio tinarenge na monto ogonkoonywa. Ngasemeria ’nyore ogokoonya kwa Mwanyabaanto. Korende monto onde taankoonya. Ⅷ Korende, nonya nabo, ’nkainyora amaabera ao aye Omonene, nonya n’emeremo yao korwa kare na kare, ng’a aye nigo ogotooria baria bakomotamera, erio kwabarusia gati-gati y’echinchera chi’ababisa baabo. Ⅸ Nainche nkareta ogosaba kwane ase ore, erio ngasaba ng’a ontoorie korwa ase amakweri. Ⅹ Nkamoreera Omonene ngoteeba: “Aye Nyasae, naye Tata! Koranche, tontiga ase engaki y’emechando yane, ekero ’ntari na gokoonya konde gwonsi, tontuguta ekero ’ntari kwenyara bosio bw’ababisa baane. Ⅺ Nintogie erieta riao goika kare na kare, ningotererie ogoteera kw’ogogwakera buya” Ogosaba kwane ng’a koigweke ase ore; Ⅻ ekiagera ’ngwtoretie korwa ase obwoba bw’amakweri, erio okaang’a obosibore ekero naare ase aabe. Ase igo, ningwakere mbuya mono na kogotogia na gotogia erieta riao. ⅩⅢ Ekero naarenge omwana omoke, ekero konya ntaramanya kogenda, ase esara yane nigo nasabete maiso marore ng’a ’nyore chisemi. ⅩⅣ Ekero ’nteneine isiko y’Hekalu naamorigetie, na nimorigie amatuko onsi goika omoerio. ⅩⅤ Korwa okoiborwa kwane goika obogotu nche naamogokerete kegima ase omoyo one ime. Amagoro aane akabwatia enchera enyorooro; korwa obwana bwane akabwatia enchera yaye. ⅩⅥ Nigo nategete ogoto kwane ngategerera kegima erio ’nkamwaarigania chisemi, erio nainche ’nkenyoorera ogosemia okonene kegima. ⅩⅦ Erio ’nkagenderera komenya n’echisemi, n’oria onyororkererie obong’aini nimotogie kegima. ⅩⅧ Ekiagera inche nanachire ekiina ng’a nimenye koreng’ana n’echisemi, na niimbe n’erang’o enene ase ogokora ayare amaya, gose tinkoba na bosooku nonya ’ng’ake. ⅩⅨ Inche n’erwete mono kegima ase okwenyorera chisemi, na nkaba omong’aini kegima ase orogendo rwane. Erio ’nkarambora amaboko aane gochia igoro erio ngasaba, nkemurungania ng’a tinamanyete chisemi. ⅩⅩ Nkaroria obogima bwane gochia ase chisemi, erio nainche ’nkanyora chisemi. Korwa ase chisemi nkanyoora obong’aini korwa omochakano, na bono namanyire ng’a ninyoore ogokoonya korwa ase are. N’ere chisemi tagontiga nche bweka ntari n’okomanya kwaye. ⅩⅪ Nabeire n’eng’eria enene ekiagera nigo nasugetigwe n’okogania gw’okonyora chisemi, ekio nakio kiagerire nanyoorire obotenenku bwaye obonene. ⅩⅫ Omonene nigo ang’eete oromeme rwane buna ekeegwa, nainche nindokorere emeremo ase okomotogia ere omonyene. ⅩⅩⅢ Nchwo ase ’nde baria mwensi motamati gento, mosoe na goikaransa ase esukuru yane ime erio mosome chisemi. ⅩⅩⅣ Ninki mokwemurunganeria ng’a timomanyeti amang’ana aye, na nase ki emioyo yaino etari n’erang’o n’echisemi? ⅩⅩⅤ Nkaigora omonwa one ngateeba: “Enyoorere chisemi chia bosa, motari goakana gento kende gionsi.” ⅩⅩⅥ Kanya ebigoti biaino ’nse y’erikorogoto erio motige emioyo yaino enyoore chisemi; chisemi nigo chikokonyooreka ang’e kegima nase ore. ⅩⅩⅦ Rigereria morore ng’a nakorire emeremo emeke, korende nche nenyooreire omorembe omonene. ⅩⅩⅧ Nonya rigori riaye rire rinene buna chitaabu, inwe ng’a mwenyorere eng’eria y’chifeta. ⅩⅩⅨ Tiga emioyo yaino egokere amaabera a Nyasae, gose tari timwenyoorera obosooku, na mono ekero mokomotogia Omonene Nyasae. ⅩⅩⅩ Kora emeremo yaino bwaango engaki eria moire etaraika, Erio nario Omonene arabae eng’eria yaino ase engaki eria aganetie.