EGETABU GIA
BARUKU
Ogochaakera
Egetabu kia Baruku n’ogosangereria kwa amegerio ane amake amake ayio mono abekire ase Baruku, omoriki bw’omobani Yeremia (Yeremia 32:12; 36:4). Amegerio aya ayio arigetwe ase chingaki ao ao, ase omonwa bw’Ekeiberania nigo magega yaye abegetwe amo akaba okwegeria okomo.
Okobagwa kw’egetabu eke
Omogano bw’ogochaakera 1:1-14
Ogosaba kw’ogweitia n’ogotorigwa 1:15—3:8
Ogotogia ase ogosasiima 3:9—4:4
Okoremia na gokonya Yerusalemu 4:5—5:9
Ⅰ
OGOCHAAKERA
Baruku amo n’Abayahudi ime ya Babeli
Ⅰ Egetabu eke nigo kiarigetwe na Baruku mosito o Neria, mochokoro o Maseria, bw’ororeria rwa Zedekia, Hasadia, na Hilikia. Nigo kiariikeretwe aria Babiloni;
Ⅱ ase rituko riagatano na kabere omwaka o gatano korwa Ababeli baboerete Yerusalemu na koyosaria ase okoyosamba.
Ⅲ-Ⅳ Baruku agasoma amang’ana aya ayio ariigete ase obosio bw’omorwoti Yehoakini mosito o Yehoakimu omorwoti o Yuda, na gochia ase abanto bonsi abwo bamenyete aria Babiloni mbarabare ase oroche rwa Sudi. Kera oyomo agacha koigwa amang’ana aya kagosomwa-abanene, abana b’oborwoti, abagaaka, na abanto bonsi bo bokwenyara ao ao.
Ⅴ Ekero baigwete amang’ana aya bonsi bakarera, bakeng’ata na gosaba Omonene.
Ⅵ Erio bonsi bakarwa chitaabu chinyinge buna bare konyara,
Ⅶ erio chigatomwa gochia Yerusalemu gochia ase Yehoakimu Omokuani omonene mosinto o Hilkia mochokoro o Shallum, na gochia ase abakuani bande na gochia ase abanto bonsi abwo barenge nere aria Yerusalemu.
Ⅷ Ase rituko ria ikomi ase omotienyi o Siwani, Baruku akaira ebibekeroro ebichenu ebio biairetwe korwa ase Hekalu erio akaberania gochia Yuda. Ebibekerero ebio bie echifeta nigo biarosetigwe na n’omorwoti Sedekia mosinto o Yosia omorwoti o Yuda.
Ⅸ Nyuma y’omoruoti Nebukadinesaro koira omorwoti Yekonia o Yerusalemu ase obosomba aria Babiloni, amo na abarai bande abanene, abanto bande abwo babwate obomanyi ase emeremo y’oborosia, boigo n’abanto bande.
Ⅹ Abanto bakariika riruube ribwate amang’ana aya: Chibesa echi twabatomeire mogore etugo y’okoruegwa Ekeng’wanso kw’ogosambwa na keria giokorusia ebibe boigo na ubani, boigo mwegorere endagera y’okorugwa ekeng’wanso. Mobirwe ase egesasiimero ki’Omonene Nyasae,
Ⅺ mosabere omorwoti Nebukadinesaro o Babiloni n’omwana oye Belshaza bamenye obogima obotambe buna koreng’ana igoro ere.
Ⅻ Erio Omonene natoremie na gotoraa. Nebukadinesaro na momura oye Belshaza batorende, naintwe tobe abaigweri ase bare buna koreng’ana toramenye, erio barabwo bagokigwe naintwe.
ⅩⅢ Nigo tokobaboria motosabere Omonene Nyasae, ekiagera twakorire ebibe ase obosio bwaye, nere ogechiigwe ase tore.
ⅩⅣ Gaki soma egetabu eke twabatomeire naende mweitie ebibe biaino inwe abanyene ase Hekalu ase rituko ri’eritang’ani ri’omoyega bw’ebigutu boigo namatuko ande amachenu y’omosangererekano.
I. OGOSABA KW’ABAOSWA
Gweitia ebibe
ⅩⅤ Aya naro moratebe ekero mogweitia ebibe: Omonene Nyasae oito nomonyaboronge, korende intwe goika bono nigo totubire n’obosoku. Intwe twensi abanto ba Yuda boigo naba Yerusalemu,
ⅩⅥ Abarwoti baito, abanene baito, abakuani baito, ababani baito, n’echisokoro chiaito bonsi babekirwe ase obosoku,
ⅩⅦ ekiagera intwe twakorire ebibe ase obosio bw’Omonene Nyasae oito,
ⅩⅧ na togatiga komoigwera intwe titwamoigwerete gose komenya koreng’ana n’amachiiko aye.
ⅩⅨ Korwa chingaki chiria Omonene arusetie chisokoro chiaito aria Misiri goika rero iga, intwe twagendereire gotaba abegenwa ase are, na twabeire aboro komoigwera.
ⅩⅩ Korwa agwo kare ekero Omonene araete chisokoro chiaito korwa aria Misiri, erio atoe ense entenenku na entobu, ere agatoragereria goetera ase omosomba oye Musa. Na goika rero iga intwe nigo togendererete gochandeka ase okoragererigwa okwo.
ⅩⅪ Intwe tokanga koigwera ring’ana ri’Omonene Nyasae oito erio akwanete gocha ase tore goetera ase ababani. Korende intwe ntwensi togakora buna yatogwenerete na tokagenda chinchera chiaito chi’obobe. Togaonchokera chinyasae chinde na gokora ebinto Omonene agechete.