Ⅱ
Ⅰ Ase igo bono Omonene okorire ring’ana riria akwanete igoro ase tore, na igoro ase abagambi baito, abarwoti baito, abanene baito, boigo n’abanto na ba Israeli na Yuda.
Ⅱ Ande taiyo ense eng’ima ring’ana riana koba buna eri riabeire Yerusalemu, Omonene nigo akorete aria arigetwe ase amachiiko a Musa.
Ⅲ Amang’ana nigo abete amakong’u mono goikera omonto are koria abana baye.
Ⅳ Omonene agatoserebania, agatobeka ase amaboko y’echinse chinde echio chiatoetanaine, barabwo bagatorigereria na gotochaya mono.
Ⅴ Nigo twakorete ebibe mamincha y’Omonene Nyasae oito na tokanga komoigwera. Ase igo ense yaito ekabugwa ribaga yarenge ense yobobui.
Ⅵ Omonene Nyasae oito botambe nigo are omonyaboronge, korende intwe amo n’echisokoro chiaito nigo toichire n’obosaria bw’ebirengererio bwaito
Ⅶ Nonya Omonene otoete egesusuro buna ateebete;
Ⅷ intwe titwairanete gochia asare na gosaba buna totige ebirengererio biaito ebibe.
Ⅸ-Ⅹ Titwamoigwerete gose komenya koreng’ana n’amachiiko aye amachenu, goikera Omonene agatorentera egesusuro ekio atogacherete.
Ogosaba gw’okoborigwa
Ⅺ Bono aye Omonene Nyasae o Israeli aye kwarusetie abanto bao ase ense ya Misiri goetera ase okoboko kwao gw’echinguru, goetera ase ebikone, na ase chinguru chinene. Okaorokia chinguru chiao na koeagachera erieta goika rero iga.
Ⅻ Aye Omonene Nyasae oito intwe twakorire ebibe; twabeire aba totari abegenwa; twabeire totari koigwera amachiiko ao onsi.
ⅩⅢ Korende nigo tokogosaba togenderera kogechigwa naitwe. Aa gati yebisaku ase gwatoserebanetie, intwe twatigirwe ababoraka.
ⅩⅣ Igwa aye Omonene ogosaba gwaito kw’ogosorora; totorie ase engencho y’amasikani ao aye omonyene. Tiga baria batoirete ase omosomba batwanche.
ⅩⅤ Erio ense yonsi emanye buna aye Omonene naye Nyasae oito na buna aye gwachorire ense ya Israeli koba abanto bao.
ⅩⅥ Aye Omonene, Torigererie aa inse korwa agwo igoro orore ogwechanda gwaito. Igwa ogosaba gwaito.
ⅩⅦ Igora amaiso ao otorigererie. Abakuure batabwati obomoyo naende ase emebere yabo tibakogotogia gose gokwana igoro y’obuya bwao.
ⅩⅧ Korende abare moyo nabwo boka baragotogie na goitaberana n’ekeene kiao, nonya bachandegete mono, aboro, abare nenchara na emeuko.
ⅩⅨ Aye Omonene Nyasae, nigo togosaba otororere amabera, tari ase engencho ya gento kende kiya giakoretwe n’echisokoro chiaito.
ⅩⅩ Nigo gwaonchorete endamwamu yao n’obororo bwao gocha ase tore, buna koreng’ana gwatebete ekero abasomba bao ababani bakwanete ring’ana riao ase tore bagateeba,
ⅩⅪ kumba emegongo yaino mokorere omorwoti o Babiloni, nainwe momenye ase ense eria naete chisokoro chiaino.
ⅩⅫ Korende komorange koigwera ogochika kwane gwokomokorera,
ⅩⅩⅢ nindete omoerio amariogi onsi y’omogoko nemeyega ase emechie ya Yuda na Yerusalemu. Nonya namariogi y’emeyega y’echinyangi takoigwekana naende. Ense yonsi netigwe bosa etamenyiri;
ⅩⅩⅣ Korende intwe titwaigwerete ogochika kwao gwokomokorera omorwoti o Babiloni, erio aye ogaikerania emeroberio yao eyio gwakorete ekero gwakwanete goetera ase abasomba bao ababani, ekero gwatebete buna amauga y’abarwoti baito n’echisokoro chiaito nairwe korwa ase chimbera chiabo na gosiarerwa.
ⅩⅩⅤ Na ase ekeene bono amauga ayio atugutirwe ase riberera riamobaso na ase obokendu bwa botuko. Barabwo nigo bakwete ase emechando y’enchara, esegi, n’amarwaire.
ⅩⅩⅥ Ase engencho y’ebibe bi’abanto ba Israeli na Yuda, gwatigire Hekalu yao yabeire ritombe goika buna ere rero iga.
ⅩⅩⅦ Korende aye Omonene kwabeire omoremereria ase tore na gwatworokirie amabera amange,
ⅩⅩⅧ Buna kwariete eira goetera ase omosomba oo Musa ekero kwamochiigete ariike amachiiko ao ase obosio bw’Abaisraeli.
ⅩⅩⅨ Onye timokonyigwera’ aye ogateeba goika motigare abake mono ase abanto b’ebisaku agwo ase ndabaserebanie gochia.
ⅩⅩⅩ Nimanyete buna timokonyigwera, ekiagera inwe nabanyabigoti bikong’u. Korende ekero morairwe ase obosomba ase ense ende, imoiranere ibirengererio biaino.
ⅩⅩⅪ Erio momanye ng’a inche ninche Omonene Nyasae, erio nimbae enkoro yokogania komanya n’ebirengererio bi’okomanya.
ⅩⅩⅫ Aria ase ense y’obosomba montogie na kong’inyora.
ⅩⅩⅩⅢ Motige koba abanyabigoti bikong’u n’abanyabibe, ekiagera moinyore eki kiaberete chisokoro chiano ekero bangete koigwera Omonene.
ⅩⅩⅩⅣ Erio nimbairanie gochia ase ense eria nariete eira koa chisokoro chiaino, Aburaamu, Isaka, Yakobo, erio ebe eyaino naende. Nimbakore mobe abange timogokea naende.
ⅩⅩⅩⅤ Ninkore okobwatana gwa kare na kare nainwe; Nimbe Nyasae oino nainwe mobe abanto bane. Tinkobarusia naende inwe abanto ba Israeli korwa ase ense eyio nabaete.