Ⅲ
Ⅰ “Aye Omonene Omobui, Nyasae o Israeli, nigo togokorera intwe korwa ase omoyo ochandegete.
Ⅱ Toigwe aye Omonene, otororere amabera, ekiagera intwe twakorire ebibe ase ore.
Ⅲ Aye noo ore kare na kare korende intwe nigo togosira kare na kare.
Ⅳ Aye Omonene Omonguru, Nyasae bw’Abaisraeli, igwa ogosaba gwaito. Intwe titori abaya kobua abakuure. Chisokoro chiaito chigakora ebibe ase ore aye Omonene Nyasae obo. Bakanga gokoigwera ase igo intwe nigo tochandegete ase engencho y’ebibe biabo.
Ⅴ Toinyora amabe ayio chisokoro chiaito chiakorete agwo kare; ase chingaki chinga buna echi rengereria igoro y’obobui bwao n’erieta riao,
Ⅵ ekiagera aye naye Omonene Nyasae oito, naye intwe toratogie.
Ⅶ Gwatokorire twakoirokire, erio intwe togosabe aye. Aiga ase obosomba ntogotogie ekiagera intwe twatigire ebibe bi’echisokoro chiaito.
Ⅷ Gwatosiareire intwe ase chinse chinde, kwabakorire batochayire na gotoragereria. Nigo ogotoa egesusuro ase engencho y’ebibe bi’echisokoro chiaito ekero bakorete ebibe mamincha yao aye Omonene Nyasae.”
II. OGOTOGIA OBONG’AINI
Ⅸ Tegerera ogochika kw’obogima, aye Israeli!
Tega ogoto oigwe obong’aini.
Ⅹ Inaki yabete aye Israeli okenyora ase ense y’obosomba?
Na kobekwa ogotacheneka buna oria okwete?
Ⅺ Inaki yabete aye okabarwa koba oyomo bwa baria bakuure?
Ⅻ Nase engencho aye gwatigire ensoko y’omogima!
ⅩⅢ Onye nkwagendete ase chinchera chia Nyasae,
ang’a nigo kwamenyete n’omorembe goika kare na kare.
ⅩⅣ Eegerie korwa ase chisemi, obomanyi n’echinguru bikonyorekana.
Erio aye omanye ase oranyore obogima obuya obotambe,
oborabu bokorae boigo n’omorembe.
ⅩⅤ Onde taiyo ona konyora ase obong’aini bomenyete gose onde taiyo ona gosoa ase ekiage kiaye,
ⅩⅥ-ⅩⅦ Ngai bare abanene b’echinse,
baria bakoraa ching’iti ase chinguru?
Ngai bare baria bakogosoria n’echinyoni chia igoro baria bakwegachera
chifeta n’echitaabu echio abanto baganetie naende tibari goisaneka gochirigia?
ⅩⅧ Ng’ai bare baria baroberetie na gwechanda korigia enibo abwo emeremo yabo etatigete kemanyererio kende?
ⅩⅨ Bonsi abwo basirire basoire ase ense y’abakuure.
Abande bachire bairire ribaga riabo.
ⅩⅩ Ekegori ekeyia kiaiboirwe na komenya ase ense,
korende nonya nkerokio tikiamanyete enchera y’echisemi.
Tikiamanyete enchera y’obong’aini gose koboikera.
ⅩⅪ Nonya n’abana babo nigo basireretigwe n’obong’aini.
ⅩⅫ Bong’aini tibwanyorekanete gati y’abakanani,
boigo nonya na ba Edomu tibaboroche.
ⅩⅩⅢ Nonya bakorigia chisemi, enchera yobong’aini teranyorekana ase egati y’abaonchoreria
ba Merani na Tamani gose ase baria bagokwana igoro y’emegano,
tibaregera kende gionsi igoro y’obong’aini,
tibamanyeti kende gionsi igoro y’echinchera chi’obong’aini.
ⅩⅩⅣ Aye Israeli ngaki ore omonene enyomba ya Nyasae!
Inaki ore omonene aye ense y’Omonene!
ⅩⅩⅤ Nigo ere enene mono tebwati moerio;
nigo ere engare etanyare korengeka.
ⅩⅩⅥ Amamonto a kare noo aiboretwe aa;
abanto abanyanguru na abamanyi ase esegi.
ⅩⅩⅦ Korende Nyasae tabachorete babe abanto baye gose tabaorogeti chinchera chi’echisemi.
ⅩⅩⅧ Ase igo bagasira ase engencho batarenge n’obong’aini;
bagasira ase engencho y’oboriri bwabo abanyene.
ⅩⅩⅨ Ning’o orinete gochia igoro erio korigia obong’aini,
akaboreta korwa igoro ase amare?
ⅩⅩⅩ Ning’o onya gotara ase amache ime erio korigia obong’aini,
gose kobogora ase rigori ri’echitaabu.
ⅩⅩⅪ Monto onde taiyo omanyete enchera y’okogenda ase bore, gose omanyete enchera ekogenda ase bore.
ⅩⅩⅫ Oyo bweka omanyete obong’aini Nyasae,
na ere nigo amanyete ebinto bionsi. Goetera ase okomanya kwaye ere akabonyora.
Agakora ense korwa kare erio akayeichoria ebintongwa bionsi.
ⅩⅩⅩⅢ Ere nigo agotoma oborabu na borobwo bwamoigwera; akaborangeria naborobwo bokamoigwera.
ⅩⅩⅩⅣ Ching’enang’eni nigo chikobara ase abo ase omogoko, ere nigo agochirangeria na chirochio chiaitaba,
“Noo tore aa”. Nigo chikobara ase omogoko gochia ase oria ochitongete.
ⅩⅩⅩⅤ Oyo nere Nyasae oito, onde taiyo orareng’anigwe nere.
ⅩⅩⅩⅥ Nyasae nere omanyete enchera ekogenda ase okomanya
na akaa abasomba baye Abaisraeli abwo anchete obong’aini
ⅩⅩⅩⅦ Korwa chingaki echio kogenderera,
obong’aini bokarorekana ase ense na bokamenya na mwanyabaanto.