Ⅳ
Ⅰ Obong’aini n’egetabu ki’amachiiko a Nyasae,
borobwo n’erichiiko riria riramenye kare na kare.
Baria bonsi bakobwaterera obong’aini mbamenye,
korende baria barabotige mbakue.
Ⅱ Onchokera obong’aini inwe abanto ba Israeli na mobobwate.
Tara gochia ase chinchera chi’okobara kwaye.
Ⅲ Tobaisa koa monto onde bwensi obomanyi.
Ⅳ Mogoko ki ase intwe Abaisraeli;
ekiagera twaikire komanyigwa aria akomogokia Nyasae okoremia kw’Abaisraeli.
III. OKOREMIA ASE YERUSALEMU
Ⅴ Ee omoyo inwe abanto bane; abwo mokorenda erieta ria Israeli.
Ⅵ Inwe timwaonetigwe ase abanto b’ebisaku erio mosire,
korende nigo mwabegetwe ase amaboko ababisa baino ase engencho mwamogechetie Nyasae.
Ⅶ Ekero mwaruete ebingwanso ase ebirecha ribaga ria Nyasae nigo mwabeetie oria obatongete.
Ⅷ Mokeeba Nyasae o kare na kare oyio obarerete,
mokareta amagombo ase omochie o Yerusalemu oyio obarendete.
Ⅸ Omochie o Yerusalemu okarora endamwamu eyio yabacherete korwa ase Nyasae:
Ogateeba gochia ase emechie eria yayoetananete Rora obororo obwo Nyasae andeteire.
Ⅹ Narorire abana bane bakoirwa obosomba,
eyio Nyasae okare na kare abarenteire.
Ⅺ Inche nigo nabarerete ase omogoko,
korende bono nabatigire bagendire n’amariga y’obororo.
Ⅻ Monto onde tagokera ogochandeka kwane bono ase engencho inde omoboraka,
na abana bane abange bakure.
Nigo natigetwe buna omochie otamenyiri ase engencho bangete koigwera amachiiko a Nyasae.
ⅩⅢ Tibabwate masikani ase ebirage bia Nyasae nakomenya koreng’ana nokogania kwa Nyasae.
Bakanga koraagwa n’oboronge bwa Nyasae.
ⅩⅣ Inwe abaamate ba Siyoni inchuo morore buna Nyasae
o kare na kare atomire abana bane gochia obosomba.
ⅩⅤ Akabarentera ense korwa are,
ense etabwati masikani eyio egokwana ase omonwa omogeni
na etabwati masikani ase abagaka gose amabera ase abana.
ⅩⅥ Abanto abwo bakaira abana abamura na abaiseke abanchwa bane erio inche ngatigara omoboraka,
nigo inde inche bweka.
ⅩⅦ Abana bane abwo bare ase obosomba, kende tikeiyo ndakore erio mbakonye.
ⅩⅧ Oria bweka obarenterete egesusuro eke nere orabatorie korwa ase ababisa baino.
ⅩⅨ Genda inwe abana bane; menya obogima bwaino!
Bono natigaire inche bweka.
ⅩⅩ Naaboirie omwambaro oria nkobeka ase engaki y’omorembe,
neboirie buna omonto okorera.
Nindere gochia ase Nyasae o kare na kare chingaki chiane chionsi erio ange obokonyi.
ⅩⅪ Eremie inwe abana bane,
na rera gochia ase Nyasae erio abae obokonyi.
Ere nabakonye korwa ase ogochandwa, na korwa ase chinguru chi’ababisa baino.
ⅩⅫ Ninde n’ogosemeria buna Nyasae o kare na kare nabasibore bwango iga.
Omochenu, omotoria oino o kare na kare nandetere omogoko ekero arabarorere amabera.
ⅩⅩⅢ Nigo narerete na kweumia ekero mwairetwe,
korende Nyasae nabairanie gocha naende erio andetere omogoko.
ⅩⅩⅣ Buna korengana chinse echio chibaetanaine chiabaroche buna mokoirwa obosomba,
chirochio naende nchirore Nyasae o kare na kare ogocha ase obonene bwaye kobatoria.
ⅩⅩⅤ Abana bane remereria egesusuro kia Nyasae. Ababisa baino babachandire,
korende bwango iga nkobarora more bagosirigwa ase engencho mwaroreirwe amabera.
ⅩⅩⅥ Abana baane nigo nababegete ase obwanchani,
korende mogachora kogenda ase chinchera chimbe erio mokaimokigwa buna ching’ondi
chiabwatirwe na koirwa n’ababisa.
ⅩⅩⅦ “Remereria abana bane, na morere ase Nyasae monyore obokonyi.
Ere nigo abaete egesusuro korende tarabeba.
ⅩⅩⅧ Buna koreng’ana mweruete kogenda mamincha ya Nyasae,
bono inwe irana gochia ase are momokorere ara ikomi.
ⅩⅩⅨ Ere oria obareterete emechando eye nabatorie nakobaretera omochengo o kare na kare.”
ⅩⅩⅩ Eremie aye Yerusalemu.
Nyasae oria okoete erieta riao, nakoretere oboremu.
ⅩⅩⅪ Obobe n’obwabo baria bakorenterete emechando erio bakagosekerera ekero kwaguete.
ⅩⅩⅫ Emechando nechere emechie eria yairete abana bao buna abasomba.
Emechando nechere Babiloni omochie oria omerete abana bao.
ⅩⅩⅩⅢ Buna koreng’ana omochie oria ogogete na gochengera okogwa kwao,
nabo igo bono norere ekero oro omonyene oratigwe.
ⅩⅩⅩⅣ Ning’onchore ogwetogia kwaye kobe okorera na nindusie obonge bw’abanto baye abwo agwetogeria.
ⅩⅩⅩⅤ Inche Nyasae o kare na kare nintome omorero igoro ase are,
oyio orasambe ase amatuko amange.
Amatombe aye nabe obomenyo bw’ebirecha ase amatuko amange.
ⅩⅩⅩⅥ Rigeria gochia ensemo ya moocha morore omogoko Nyasae abarenteire.
ⅩⅩⅩⅦ Rora abana baino bairanire gocha inka, abana abwo bairetwe korwa ase more.
Basangererigwe bonsi amo korwa moocha na bosongo ase ogochika kwa Nyasae Omochenu.
Na bono nkoirana bare gocha inka bare n’omogoko ase obonene bwa Nyasae.