Ⅱ
Ⅰ Inche nigo inga egesicha gia Saroni gekorokwa rosi,
naende egesicha ekiya kie rikura.
(Omonyuomi)
Ⅱ Ee, koreng’ana buna egesicha ekiya kere ase egati y’amagwa,
naboigo omwanchi one are ase egati y’abaiseke.
(Omoriakari)
Ⅲ Koreng’ana buna omote bw’amapera osimekire ase egati y’emete y’orosana,
naboigo omwanchi one are ase egati y’abamura.
Nigo ngokirie goikaransa ase ekiriri kiaye,
na amatunda aye akanyansera.
Ⅳ Ere akang’ira ase enyomba y’omoyega,
na obwanchani bwaye nigo bore buna ebendera igoro yane.
Ⅴ Inyigotie na amasabibu amomo na ongokie na amapera,
ekiagera amaiga ’obwanchani anyarire.
Ⅵ Okoboko kwaye kwa bomosi nigo kore inse y’omotwe one,
na okwa borio nigo komboanetie.
Ⅶ Inwe abakungu ba Yerusalemu, nigo nkobasorora,
nkobatiania ase chingabi ne chinsune chi’orosana
ng’a timobaisa gotabobora obwanchani, gose koboichania,
goika bobe Engaki yaye yaikeranire.
Ogoteera Gwa Kabere
(Omoriakari)
Ⅷ Tegerera moigwe eriogi ri’omwanchi one!
Rora oyio ogocha!
Nigo agocharoka‐charoka igoro ase ebitunwa,
na gocharara ase ebigoro.
Ⅸ Omwanchi one nigo anga engabi gose ensune ensae.
Rora, bono nigo ateneine magega y’enyasi y’enyomba yaito.
Origereretie gocha ime goetera ase chitirisa,
goetera ase ekebao kiabekire ebitange.
Ⅹ Omwanchi ngokwana are na gonteebia.
(Omonyuomi)
Aye omwanchi one, nigo ore omuya,
imoka, inchwo togende,
Ⅺ ekiagera bono engaki y’etoigo yaerire,
boigo engaki y’embura yaerire ne mbura yachiire.
Ⅻ Ebisicha biasichire ase ense,
engaki y’amatera yaikire,
ee, eriogi ri’amatera ’amaruma riaigurwe ase ense yaito.
ⅩⅢ Emeko yachakire kwama amako,
na emesabibu yachakire gosicha,
nigo egotioka rimisu rigiya.
Aye omosani one omuya, imoka togende!
ⅩⅣ Aye riruma riane ore ase omwenya bw’egetare,
agwo ase obwebiso bw’egetare,
tiga indore obosio bwao,
naende inyigwe eriogi riao,
ekiagera eriogi riao neriansu,
na obosio bwao noboseera.
ⅩⅤ Tobwatere ebibwe, ebibwe biria ebike,
ebio bigosaria emegondo y’emesabibu,
korwa ekero emesabibu yaito yasichete.
(Omoriakari)
ⅩⅥ Inche nigo inde oyo bw’omwanchi one, nere noyone;
nigo akorisia riicho riaye ase egati y’ebisicha ebiya.
ⅩⅦ Ekero rigochia kogoroba na emerengari egochia gosira,
aye omwanchi one, onchoka gocha ase ’nde, ominyoke buna engabi,
gose buna ensune ensae igoro ase egetunwa kere chinchwara.