Ⅲ
Ⅰ Botuko ekero naraire borere bwane,
nkamorigia oria omoyo one bwanchete,
nkamorigia, korende tinamonyora.
Ⅱ “Erio nkaimoka nkagenda ase omochie,
ng’aeta ase chinchera chiaye na ase ebiooreri biaye,
nkarigia omwanchi bw’omoyo one.”
Nkamorigia, korende tinamonyora.
Ⅲ Ekero abarendi barenge goetanana omochie koyorata, bakanyoora inche,
na inche nkababooria, “Mwarora omwanchi bw’omoyo one?”
Ⅳ Ase obwango obwo naruete ase abarendi abwo,
nkanyora omwanchi bw’omoyo one.
Nkamotarera tinamotiga agende;
nigo namorentete mwa baba,
nkamosoyia gochia ase akanyomba gokorara.
Ⅴ Inwe abakungu ba Yerusalemu, nigo nkobasorora,
nkobatiania ase chingabi na ase chinsune chi’orosana
ng’a timobaisa gotabobora obwa’nchani gose koboichania,
goika bobe bwancheranire obonyene.
Ogoteera Kw’a Gatato
(Omoriakari)
Ⅵ Ngeto ki keria kegocha korwa ase erooro
kenga buna rikundesi ri’erioki?
Ninki eke keagete amaguta a manemane na ubani,
ebinto ebio bikoonigwa nabakori ebiasara.
Ⅶ Rora aaria, ekerogo gi’okobogoreria Sulemani,
geetananire nabasaacha emerongo etano nomo,
abare chituoni chi’Abaisraeli.
Ⅷ Abwo bonsi nigo beboeranetie emeyio ya birende,
na nigo bare abanto bamanyete korwana esegi.
Kera oyomo nigo abogoreti omoyio obirende,
orendete ase okogoswa kwa botuko.
Ⅸ Omorwoti Sulemani nigo eroiseretie ekerogo keria
korwa ase emete ya Lebanoni.
Ⅹ Amagoro aye kegotenenera nigo aroiseirie chifeta,
na ekiegeko kiaye nigo kiaroiseirie chitaabu;
egeikaransero kiaye nigo giatubire negetambaa kere monyinga.
Abakungu ba Yerusalemu nigo bagechaberete ime,
bare nomoyo bw’ogwancha.
Ⅺ Inwe abasubati ba Sayoni,
inchwo morore Sulemani omorwoti
obegeete ekiore keria ng’ina amobeekerete
ase rituko riria Sulemani akoreretwe enyangi,
rituko riria ri’omogooko bw’enkoro yaye.