Ⅳ
(Omonyuomi)
Ⅰ Aye omwanchi one, naki ore omoseera!
Naama! Nigo ore omoseera!
Korwa ime y’egietubo kiao ekieni ki’amaiso ao nigo kenga eki’amaruma;
etukia yao nigo enga buna riicho rie chimbori,
nigo chigotirimboka ase ebitirimboko bia Gileadi.
Ⅱ Amaino ao nigo anga ching’ondi chiaaberi chianachirwe amarionya,
chiarure gosibigwa chiarabire se,
chionsi nigo chikobiara chisare,
na manwa ende teri gokwa.
Ⅲ Ebikoba biao nigo binga eusi embariri,
omonwa oo nigo ore oyo bw’okogokia,
chinsea chiao chitubire ime ase egietubo kiao;
nigo chinga buna ebing’ese bie ritunda rikorokwa rikomomanga.
Ⅳ Rigoti riao nigo ringa buna omoorobiri o Daudi,
oyio oagachetwe nao ebirwanero bw’esegi biare kogachwa.
Agwo nao chinguba elifu eyemo chisungire,
chionsi nigo chire echi’abasikari bare chituoni.
Ⅴ Chimbeere chiao ibere nigo chinga buna chimanwa ibere
buna chisare chi’engabi
chikorisia agwo ase egati y’ebisicha ebiya.
Ⅵ Ekero bogochi koira na emerengari egochia gosira,
ningende ase egetunwa ase manemane ekoruerwa
na ase ekegoro ki’ogosambera ubani.
Ⅶ Aye omwanchi one, nigo ore omoseera bori,
tori na kemoa kende!
Ⅷ Aye omoriakari one, togende torue aa Lebanoni,
torue Lebanoni, togende komo.
Otirimboke korwa ase egechuria ki’egetunwa ki’Amana,
na ekia Seniri na Herimoni.
Orue ase amakuruma e chindo,
na ase ebitunwa chingo chimenyete.
Ⅸ Aye moiseke ominto, omoriakari one,
kwang’usire enkoro yane na kwangokirie,
okorigereria kw’amaiso ao kwang’usire enkoro yane,
ee, esonoi eyemo yoka ye chisonoi chia igoti riao yang’usire.
Ⅹ Aye moiseke ominto, omoriakari one,
obwanchani bwao naki bore obuya mono!
Naki bore obuya mono kobua edivai!
Ne rimisu ri’amaguta ao ogweaka nigo ribuete ebinsari bionsi!
Ⅺ Aye omoriakari one, ebikoba biao nigo bikonyororokia obooke;
obooke na amabeere nigo bire inse y’oromeme rwao.
Rimisu rie chianga chiao nigo ringa eria Lebanoni.
Ⅻ Moiseke ominto, omoriakari one, naye omogondo ogiteire,
naye ensoko y’amaache egiteire,
na entuboka emumekire na ebekire ekemanyererio.
ⅩⅢ Buna omogondo ore namakomomanga
aye nigo okwama amatunda amaya mono,
na ebisicha bikorokwa hena mbireo, na ebimeri bikorokwa narada,
ⅩⅣ na ebimeri bigosegwa safarani; boigo kalamusi,
na omodalasini, na emete yonsi ya ubani,
na manemane, na omogaka, amo nebinsari ebiya mono.
ⅩⅤ Aye nigo onga buna ensoko y’amaache are moyo ere mogondo,
naende nigo onga buna chindooche chikorwa Lebanoni.
(Omoriakari)
ⅩⅥ Aye embeo ekorwa sugusu, imoka!
Na aye eyekorwa Irianyi, inchwo!
Gusa igoro y’omogondo one,
tiga rimisu riaye rigiya rirurukigwe rirande.
Tiga omwanchi one ache ase omogondo oye,
arie amatunda are amaya mono.