Ⅴ
(Omonyuomi)
Ⅰ Aye moiseke ominto, omoriakari one, nasoire ase omogondo one,
ngosangereria inde manemane amo nebinsari biane bigotioka buya;
nkoria inde eriana amo nobooke bwane,
nkonywa inde edivai yane amo namabeere aane.
(Abakungu ba Yerusalemu)
Inwe abasani, ragera na monywe!
Inwe abanchani, kanywe mono goika moichorwe nobwanchani!
Ogoteera Gwa Kane
(Omoriakari)
Ⅱ Inche nigo narenge indaire, korende enkoro yane nigo yategesetie.
Igwa! Omwanchi one oyio ogokongonta egesieri ogontura.
(Omonyuomi)
Moiseke ominto, omwanchi one,
riruma riane na omoikeranu one, inyigorere!
Inyigorere, ekiagera omotwe one otoorire riime,
na etukia yane yanyiire nembura ya botuko.
(Omoriakari)
Ⅲ Narusirie eanga, inee, inyebeeke naende?
Nesibirie amagoro, inee, inyabeeke eubi naende?
Ⅳ Erio omwanchi one akabeeka okoboko kwaye ase ekebao,
erio nkaba nomosasoko omonene ime ase enkoro yane.
Ⅴ Nkaimoka gochia koigorera omwanchi one,
amaboko aane akanyororokia manemane,
na ebiara biane bigatonyia manemane
ekero nabwatete echabi yegesieri.
Ⅵ Ngachia koigorera omwanchi one,
korende nkanyora ng’a ochiire.
Omoyo one okairianyeka ekero akwanete.
Nkaba nkomorigia, korende tinamonyorete.
Nkamorangeria, korende taitabete.
Ⅶ Ekero abarendi barenge goetanana omochie koyorata, bakanyoora inche,
bakang’aka chingoma;
bakang’ura egetambaa gi’okwambara,
abarendi baria barendete chindwaki.
Ⅷ Inwe abasubati ba Yerusalemu, nigo nkobasorora
ng’a mokonyora omwanchi one,
momoteebie ng’a amaiga ’obwanchani anyaarire.
(Abakungu ba Yerusalemu)
Ⅸ Aye ore omoseera kobua abakungu bonsi,
inee, omwanchi oyio oo, naki abuete abanchi bande?
Ee, omwanchi oyio oo, naki abuete abanchi bande,
goika gwatosoroire iga?
(Omoriakari)
Ⅹ Omwanchi one nigo are omorabu se okomeka‐meka, naende omobariri;
nigo are nogwatananekana korwa ase abanto chilifu ikomi.
Ⅺ Omotwe oye nigo ore omuya onga etaabu echenire,
etukia yaye nigo ere omosamugoku bw’obwari;
nigo ere emwamu ti buna amarionya ’ekegonkoru.
Ⅻ Amaiso aye nigo agwekaine amaruma are ase chindooche,
ee, nigo anga amaruma asibigwe namabeere,
naende nigo anga amagena akomeka‐meka achokire buya.
ⅩⅢ Chinsea chiaye nigo chinga buna ebigondo bi’ebimeri bi’ebinsari,
bigotioka rimisu rigiya.
Ebikoba biaye nigo binga buna ebisicha ebiya,
nigo bigotonyia manemane.
ⅩⅣ Amaboko aye nigo anga buna etaabu ebombire buya,
echabeire amagena akomeka‐meka.
Omobere oye nigo onga buna amaino e chinchogu aroisirie buya,
na gochaberwa namagena e rigori rinene akorokwa safiro.
ⅩⅤ Amagoro aye nigo anga chisiiro chi’amagena amarabu se akomeka‐meka,
abeekire ase chinterekerero chi’echitaabu chingiya.
Okororekana kwaye nigo konga buna okwa Lebanoni,
ekieni kiaye nigo kere ekiya buna eki’emecharake,
ⅩⅥ Chinkwana chiaye nigo chire chinyansu mono,
chingencho chiaye chionsi nigo chire echi’ogosanerwa mono.
Inwe abasubati ba Yerusalemu,
naboigo omwanchi one are, oyio ore omosani one.