RIRUUBE RI’ERITANG’ANI RIA PAULO OMOTOMWA ASE
TIMOTHEO
Ogochaakera
Timotheo, omosae omoke korwa Esia enke nigo arenge omwana bw’Omogiriki na ng’ina n’Omoyahudi oreenge. Ere nigo abeete omosani na omobwatani o Paulo ase emeremo yokoraria enchiri ase chinse chia isiko. Riruube eri rie ritang’ani ria Paulo nigo ribwate amaganio atato.
Ritang’ani, nogokuurera igoro y’amorokererio y’oborimo ase ekanisa. Amorokererio ayio nigo abwatekaine ne chingeencho chia Abayahudi na chiria chire mamincha ya chirochio, aya nigo arenge gokwanera okwegena ng’a ense eye tomenyete n’embe naende nigo omonto aranyare gotooreka goetera ase okwemanyia chiseemi chia bobisi ase ogotaria chindaagera gete naende boigo gotanywoma. Boigo riruube eri nigo ribwate ogoteebereria igoro yoborai bw’Ekanisa n’ogosasiima ase okoorokia chimbwa chimogwenerete omorai bw’Ekanisa amo na abakoonyi ase emeremo yabo. Omoerio Timotheo nkworokererigwa are chinchera chiokoba omokoreri omuya o Yeso Kristo naboigo aria atakeire gokora ase kera ekegori kia abegeni baria atenenerete.
Okobagwa kw’egetabu eke
Obweng’e bw’Egetabu eke 1:1-2
Ogotebereria igoro y’ekanisa na abaraai baye 1:3—3:16
Ogotebereria ase Timotheo igoro y’emeremo yaye 4:1—6:21
Ⅰ
Ⅰ Korwa ase Paulo, omotomwa o Kristo Yeso ase ogochika kwa Nyasae, Omotooria oito, na Kristo Yeso, ogosemeria gwaito,
Ⅱ gochia ase aye Timotheo, omwana one bori ase okwegena:
Obuya na amaabera, na omorembe bikorwa ase Nyasae Tata, na ase Kristo Yeso, Omonene oito.
Ogokuurera kw’ogweatanana korwa ase okworokereria kw’obong’ainereria
Ⅲ Buna nakoboretie ekero nare kogenda Makedonia, otigare Efeso, erinde okanie abande tiborokereria okworokereria konde okoao,
Ⅳ gose tibategerera emegano ao ao, gose ebinimboria bie chisokoro bitakoera. Ayio onsi nigo akorenta okoamererania, gose tari goikerania emeroberio ya Nyasae eyio emanyekanete ase okwegena.
Ⅴ Bono ekerenga ki’ogochika oko nakio eke, ng’a babe nobwanehani bokorwa ase chinkoro chindabu, ne chinkoro chitari kobagaambia, na okwegena gotari nobong’ainereria.
Ⅵ Abande bamochete ayio, batantanire na koonchokera ogokwana kwa bosa.
Ⅶ Naende nigo banchete koba aborokia b’amachiiko, korende tibamanyeti ayabagokwana, gose amang’ana aria bakomigereria ne chinguru.
Ⅷ Twamanyire ng’a amachiiko namaya, onye omonto okoyakorera buna agwenerete gokorerwa,
Ⅸ na omanyete ng’a amachiiko tabekiri ase omonto omooronge. Korende nigo abekire ase abasaria ba amachiiko, na abatari koigwera, ase abatari aba Nyasae, na abanyabibe, ase abatari abachenu, baria bare b’ense eye, ase abaiti abaise gose abang’ina, na abaiti bande,
Ⅹ ase abatomani, na abasacha abagwesaria ase abasacha, ase abakoiba abanto na kobaonia, ase abanyaborimo, na abakoria chimuma chi’oborimo. Na korir’abe ing’ana rinde rionsi ritabwataini nokworokereria kw’obogima,
Ⅺ koreng’ana nenchiri y’obonene bwa Nyasae, oyore ogosesenigwa okonene, eye inche negenirwe koyeraria.
Ogoaka ng’a mbuya mono ase amaabera
Ⅻ Namoakeire Kristo Yeso, Omonene oito, oyombeegete chinguru, ng’a mbuya mono, ekiagera andoche ng’a nigo inde omwegenwa. Akambeeka ase obosomba bwaye,
ⅩⅢ nonya ritang’ani nareenge komorama na komochaanda, naboigo, nareenge omochege. Korende ere akandorera amaabera, ekiagera nakorete bo ase ogotamanya, na ase ogotegena,
ⅩⅣ na obuya bwo Omonene oito bwamentekanire mono amo nokwegena na obwanchani ebire ime ase Kristo Yeso.
ⅩⅤ Ring’ana eri neri’ekeene, rigwenerete gwancherwa kegima, ng’a Kristo Yeso nigo achete ase ense gotooria abanyene ebibe, na ase abwo inche noyo bw’eritang’ani.
ⅩⅥ Korende nkanyora amaabera ase engencho eyio, ng’a ase ’nde inche ritang’ani Yeso Kristo aorokie oboremereria bwaye bwonsi, erio imbe ekiorokererio ase abwo baraache komwegena ase okonyora obogima bwa kare na kare.
ⅩⅦ Ase Omorwoti o kare na kare, oyotakonyorekana nogosareka, oyotakororekana, nere Nyasae bweka, ase are ere ogosika na obonene kare na kare. Amina.
ⅩⅧ Timotheo, omwana one, ogochika oko nakoeire, koreng’ana namang’ana y’obobani akwanetwe igoro yao, erinde ase ayio orwane esegi ere engiya.
ⅩⅨ Obe nokwegena na enkoro etari gokogaambia, ebio abande babisereirie are, na ase amang’ana y’okwegena basirire.
ⅩⅩ Ase abwo mbareo Humenayo na Alekisanda, abwo nabaeire Saitani, erinde borokererigwe tibarama Nyasae.