Ⅱ
Okworokereria igoro y’ogosaba
Ⅰ Gaaki, ritang’ani ase amang’ana onsi nabasoroire ng’a okoboria, na ogosaba, na okogaramera amo nokoiraneria Nyasae ng’a mbuya mono, bikoreke ase engencho y’abanto bonsi,
Ⅱ ase engencho y’abarwoti, na bonsi abaeire okobua, erinde tonyaare koba nobogima bw’oboitongo na obw’omorembe, na ase amang’ana onsi koba ne chingeencho chi’obonyasae, na echi’ogosikana.
Ⅲ Eri nerigiya, naende ndiancheire ase obosio bwa Nyasae, Omotooria oito,
Ⅳ oyorigetie abanto bonsi batoorigwe, banyaare komanya onsi ayare ay’ekeene.
Ⅴ Inaki Nyasae noyoomo, na omobwatania gati ya Nyasae na Mwanyabaanto noyoomo, omonto oria Kristo Yeso
Ⅵ ere oyobweruete omonyene koba embooria ase engencho ya bonsi. Igoro y’ayio oborori borentwe ekero engaki yaye eraike.
Ⅶ Ase engencho y’ayio nkaragwa imbe omworokia, na omotomwa, erinde inyorokie abanto b’Ebisaku amang’ana y’okwegena na ekeene; nigo ngokwana ekeene, tindi gokwana oborimo.
Ⅷ Nigo nganetie abasacha basabe kera aase, bakoimokia amaboko amachenu, batari nendamwamu, gose na tang’u‐tang’u.
Ⅸ Naboigo nabakungu beboyie chianga chi’ogosika, babe aberiiti na abaya, tari abakomina chituukia, gose kobeeka etaabu ne chiruuru, gose chianga chie rigori rinene,
Ⅹ korende bakore ogokora okuya, buna egwenerete abakungu abakoorokia ng’a mbare ne chingeencho chi’obonyasae.
Ⅺ Tiga omokungu eorokererie ase ogokira, na ase ogosika gwonsi.
Ⅻ Ting’eti omokungu ribaga ri’okworokereria, gose kogaambera omosacha, korende nemogwenerete akire,
ⅩⅢ ekiagera Adamu nere otongetwe ritang’ani, na magega yaye Hawa.
ⅩⅣ Na Adamu tang’ainetwe, korende nomokuungu ong’ainetwe, na igo akaba omomochi.
ⅩⅤ Korende omokungu natoorigwe goetera ase okoibora abana onye okogeenderera ase okwegena, na obwanchani, na obochenu amo nobweriiti.