Ⅰ Ekero baigete ase omochie a Kaserini oyio ore magega yomochie o Ninawi, Ⅱ Rafaeli agateeba “Tobia nomanyete buna twatigete iso; Ⅲ neganeirie totang’anere mokao toroisie enyomba magega abande bataracha. Ⅳ Tobaisa kweba koimokia enkoro eria y’enswe.” Erio Tobia na Rafaeli bagatang’ana inka boigo n’esese ya Tobia ekababwatia. Ⅴ Ase chingaki echio Ana nigo aikaransete arigereretie gochia nchera gose narore omwana oye. Ⅵ Erio akamorora ogocha! Na agateebia Tobiti ase omogooko “Rora omwana oo oywo gocha n’omosani oye!” Ⅶ Magega bataramoikera Tobiti, Rafaeli agateebia Tobia “Ngokoenekeria inde buna iso nkorora are na amaiso aye. Ⅷ Aye bono nigo okoimokia enkoro eria y’enswe oyebeeke ase amaiso aye erio eriogo rirwe ororo risibie ebinto biria ebirabu bire ase amaiso aye erio ere anyare korora naende.” Ⅸ Ana akaminyokera omwana oye akamoboania akamonyunyuta akamoteebia, Bono ase engencho nakororire kore moyo naende omwana one nabo ngokwa, erio akaiyeria amariga y’omogooko. Ⅹ Erio Tobiti nere akaimoka agaeta korwa ase omorangwa omagega. Ⅺ Tobia nao abwate enkoro eria y’enswe koboko kwaye, akaminyokera ise. Agaaka ise eriogo riria ase amaiso aye akamoteebia “Tata tokwa omoyo.” Ⅻ Magega yaye akarusia ebinto biria ebirabu biarenge ase amaiso a ise ⅩⅢ namaboko aye abere erio Tobiti akarora omwana oye erio akamoboania namaboko aye abere. ⅩⅣ Agachaaka korera ogoteeba, “Nakororire omwana one! Aye n’omwana one oyio ore oborabu bwa amaiso ane.” Erio agateeba, Nyasae atogigwe boigo n’erieta riaye na abamalaika bonsi abachenu. ⅩⅤ Ere ondeterete emechando eye korende naende ondoreire amaabera narorire naende omwana one Tobia! Erio Tobia agasoa nyomba ase omogooko akamotogia Nyasae ase eriogi rinene. Erio agateebia ise buna orogendo rwaye rwarenge orw’ogosesenigwa, naende buna oratire chitaabu chiria, boigo buna anywomire Sara mosubati o Ragueli oyio ore nchera ange goika Ninawi. ⅩⅥ Bono Tobiti ase omogooko agatogia Nyasae erio agasoka kogenda koarigania moka momura oye korwa ase ebiita bi’omochie o Ninawi. Ekero abanto ba Ninawi baroche Tobiti kagotara ore nechinguru na atari koraua na monto onde, bagakumia mono. ⅩⅦ Tobiti akabateebia bonsi buna Nyasae amororerire amaabera erio omogwenia onyara korora naende. Magega yaye Tobiti bakaumerana na Sara moka momura oye, akamoarigania agateeba, “Nakoariganirie omwana one, tiga Nyasae atogigwe oyio ogwanchera goika aiga. Tiga iso asesenigwe, boigo n’mwana one Tobiti nere asesenigwe, naye boigo osesenigwe omwana one! Soa nka mwao twakoariganirie ase omogooko n’ebisio omwana one!” Rituko erio rikaba eriomogooko ase Abayahudi bonsi barenge Ninawi. ⅩⅧ Ahika na Nadau abaigwa ba Tobiti bagaacha kogoka amo na Tobiti. ⅩⅨ Ase omogooko bakagokera enywomo ya Tobia ase amatuko atano na abere, na ebiegwa ebinge bikaruegwa.