Ⅰ Magega y’omoyega bw’enyangi, Tobiti akarangeria omwana oye Tobia akamoteebia “Goika aye oakane omosani oo oyio mwagendete komo eng’eria yaye naende omomente kende igoro.” Ⅱ Tobia akaboria ise “Tata, ’naki ndamwakane engeria eng’ana? Neisa koba nekeng’ese ki’enibo eria twarentete inche tingokumia. Ⅲ Ere ondaire goika inka buya; nere ogwenetie mokane, agakonya goikia chitaabu chiria aiga buya na bono okogwenirie, inki ndamoe ase ayio onsi?” Ⅳ Tobiti akamoteebia, nigo aisaine eken’gese kia biria bionsi agokonya konyora. Ⅴ Bono Tobia akarangeria Rafaeli akamoteebia, “Bono aye ira ekengese ki’enibo eria yonsi gwankonya konyora ee nero eng’eria yao!” Ⅵ Korende Rafaeli akarangeria Tobiti na Tobia ensemo akabateebia, “Motogie Nyasae; morarie amakumia aye ase abanto bonsi ase engencho y’aaya ayio abakoreire. Motogie na koribaaka erieta riaye, rareria abanto bonsi amaya a Nyasae buna egwenerete gose inwe timorosa gokora ayio. Ⅶ Negwenerete korenda obobisi bw’ omorwoti, korende amakorwa a Nyasae goika ararigwe kera ase buna egwenerete. Kora amaya nainwe timokonyora bobe bonde. Ⅷ Mbuya gosasiima Nyasae ase enkoro y’ekeene na gokoonya abataka, kobua koba omonda otari omwegenwa. Mbuya gokoonya abataka kobua kwegachera chitaabu. Ⅸ Ogokoonya abataka nigo gokorusia omonto ase amakweri na komosibia ebibe biaye bionsi. Baria barakonye abataka nigo barasesenigwe n’obogima obuya. Ⅹ Korende baria bagokora ebibe na amabe nigo bakwerentera emechaando barabwo abanyene.” Ⅺ “Bono nkobateebia inde ekeene ntari kobabisa kende. ’Nabateebia ng’a mbuya kobisa obobisi bw’omorwoti, korende aya Nyasae goika ararigwe kera ase buna egwenerete. Tobiti! Ⅻ Aye ekero mware gosaba na Sara chingaki chiria, ninche naigwete ogosaba kwaino ase obosio bwa Nyasae omochenu na kera ekero kware gotindeka abakuure ninche nare koira amang’ana ao ase Nyasae. ⅩⅢ Bono aye ekero gwatigete endagera yao kware koria okagenda gotindeka omonto okwete, Nyasae nigo antomete ngoteeme. ⅩⅣ Boigo nere ontomete ’nchiche gokogwenia boigo na gokonya moka momura oo Sara. ⅩⅤ Inche Rafaeli oyomo bw’ Abamalaika baria batano na babere abwo baikaransete ase obosio bw’Omonene omochenu bakomokorera botambe.” ⅩⅥ Tobiti na Tobia bakoboa mono bakagwa inse bagatuba amaiso abo bare nomoondoko. ⅩⅦ Korende Rafaeli akabateebia, timwoboa, mobe n’omorembe. Motogie Nyasae botambe. ⅩⅧ Okoba kwane ase more tari ogwancha kwane korende n’ogwancha kwa Nyasae. Ere nere moganeirie gotogia ase obogima bwaino bwonsi. Nere moganeirie kobaaka. ⅩⅨ Inwe nigo mokagerete buna nigo mwandoche ginkoria endagera, korende nase okororekana tari bo yare. ⅩⅩ Ase igo bono inwe motogie na komoakera mbuya mono Omonene Nyasae. Bono inche ’nkoirana inde gochia ase oria ontomete korwa igoro. Riika amang’ana ayio onsi akoregete. ⅩⅪ Erio Rafaeli agasira tibamorora naende. ⅩⅫ Bono barabwo bagachaaka gotogia Nyasae ase amateera, bakamotogia ase engencho ya amakora aye amanene ayio akorerete abamalaika baye ekero abakokererete.