Ⅰ Aiga nao amang’ana y’ogwaka mbuya mono a Tobiti aererete. Ⅱ Tobiti agakwa n’omorembe ore n’emiaka 112, agatindekwa n’masikani ariaa Ninawi. Ere nigo arenge n’emiaka 62 ekero abete omouko. Ekero agwenetigwe, akagenderera komenya n’mogoko na akagenderera gokoonya abataka na gotogia Nyasae ase obuya bwaye. Ⅲ Ekero arenge ange gokwa akarangeria omwana oye Tobia akamoa oboseemia obo: Ⅳ Omwana one imokia abanto bao ogende goika ense ya Media ase obwango mono ase engencho ninyegenete ring’ana ria Nyasae erio akwanete goetera ase Omobani oye Nahumu igoro y’omochie o Ninawi ngoikerana rire. Kera egento abasomba ba Nyasaena ababani ba Israeli bakwanete igoro y’omochie bwa Asuru na Ninawi goika geikerane ase chingaki chiaye. Kende tikeri bakwanete keraonchoke. Inwe mobe buya aria Media kobua kobera Asuri gose Babuloni. Inche ninyegenete ng’a kera egento Nyasae akwanete goika geikerane, na ing’ana rinde rionsi tiriyo ase ayio abanetwe riraonchoke. Abaminto bamenyete aria ase ense ya Israeli mbabarwe bonsi nakoirwa are korwa ase ense eria engiya mono. Ense yonsi ya Israeli netigare bosa, emechie ya Samaria na Yerusalemu netigwe bosa, n’Hekalu ya Nyasae nesambwe n’omorero na gotigara ritombe. Ⅴ Erio Nyasae narorere abanto baye amaabera naende abairanie gochia ase ense ya Israeli. Mbaagache naende Hekalu yaye buya korende tekoba ngiya buna eria y’eritangani goika engaki yaye yaikire. Korende magega yayio abanto bonsi ba Israeli mbairane korwa obosomba baagache buya naende omochie o Yerusalemu ase obonene bwaye bwonsi, buna koreng’ana ababani ba Israeli batebire. Ⅵ Erio abanto bonsi ense engima mbatooreke na komoiranera Nyasae. Mbasarie chinyasae chiabo echio chiare kobang’aina erio basasiime Nyasae bw’ekeene. Ⅶ Abaisraeli bonsi abwo bairetwe obosomba rituko erio mbainyore Nyasae. Bonsi ’mbasangererekane aria Yerusalemu agwo ase ense ya Aburaamu nakoyeira ebe eyaabo. Bonsi baria abamwanchete Nyasae ase ekeene mbagoke, korende baria bagokora ebibe nobosaria mbasirigwe korwa ase ense. Ⅷ Bono abana baane nkoborokereria inde enchera yane. Mokorere Nyasae nomoyo bw’okwerwa nagokora aria are amaya ase obosio bwaye. Ⅸ Egeria abana baino gokora ayare amaya botambe gokoonya abataka, na komotogia Nyasae botambe n’enkoro yokwerwa. Ⅹ Bono omwana one aye ong’anyie korwa aa Ninawi tobaisa komenya aroro. Rituko riria oratindeke nyoko, oboina bwaye bobe ensemo ase obwane, kogokora komotindeka rituko erio erio ong’anye korwa omochie oyo ekiagera osarekire. Oinyore onsi aria Nadabu akorerete Ahika oyio orenge ise moke na nere omorendete. Nigo atagete gotindeka Ahika kare moyo korende Nyasae akamosiria ase obosio bwa Ahika ase engencho y’komocha kwaye. Ase ngencho yobuya bwaye, Ahika agatoreka korwa ase omoeto oria konya Nadabu amobekeire. Ⅺ Bono abana baane, mwarorire obuya b’ogokoonya abataka boigo mwarorire buna amakweri aganyererete abwo bagokorera abande bobe. Bono omoyo one nkobutoka ore. Erio barabwo bakamobeka akarara borere bwaye. Tobiti agakwa na agatindekwa n’amasikani. Ⅻ Ase egeka egeke mokaye nere agakwa. Tobia akamotindeka ang’e n’omosacha oye. Erio Tobia akaimokia mokaye n’abana baye bagachaaka orogendo gochia Media. Bakagenda Goika Ekbatana bakamenya aroro ase Ragueli ise biara Tobia. ⅩⅢ Tobia akarenda Ragueli na Edina ase emiaka y’obogotu bwabo na akabaa amasikani amanene. Ekero bakwete akabatindeka aiga Ekbatana ase ense ya Media. ⅩⅣ Tobia agakwera Ekbatana ore n’emiaka 117. ⅩⅤ Magega atarakwa oroche buna omochie o Ninawi osiretigwe. Akarora buna abanto ba Ninawi bairetwe obosomba n’omorwoti Ahusuero aria ase ense ya Media. Tobia agaakera Nyasae mbuya ase engencho yokoa abanto ba Ninawi boigo na ab’Ashuru egesusuro.