Ⅷ
Ⅰ Magega yokoria endagera, abaibori ba Sara bakaira Tobia ase enyomba yokorara aria ase Sara arenge.
Ⅱ Tobia akainyora oboseemia bwa Rafaeli erio akaigora akabuko karia ase agachete enkoro eria y’enswe ne rini akabibeeka ase ubani yare gosambwa bigachaka korwa erioki.
Ⅲ Rimisu riaye rigaseria ekerecha keria korwa ase Sara kegatama gochia Misiri. Rafaeli agakebwatia gochia aroro agakebwata akagesiba amaboko na amagoro.
Ⅳ Bono Tobia agatigara ere bweka na Sara ase enyomba eria y’okorara ekero abaibori ba Sara bachiete korara na ebisieri bionsi biasiekirwe. Erio akaimoka korwa borere agateebia Sara mokaye “Omwanchi imoka tosambe Omonene atororere amaabera na gotorenda buya.”
Ⅴ Sara akaimoka erio Tobia agachaaka gosaba ogoteeba “Otogigwe aye Nyasae bwe chisokoro chiaito, erieta riao ritogigwe kare na kare, igoro ekoimokererie igoro boigo nebitongwa biao bionsi bigotogie goika kare na kare.
Ⅵ Naye gwatongete Adam na Hawa mokaye abe omokonyi oye. Mwanyabaanto bonsi nigo barwete ase aba babere, naye gwatebeete buna teri buya omosacha koba ere bweka; tiga tomokorere omonto okomokoonya onga buna ere.
Ⅶ Ase igo nkoira ’nde mosubati ominto oyo tari ase engencho yokogania kw’omobere, korende nigo ngokora bo ase omoyo omorabu. Otororere amaabera na gotorenda goika togote tore amo.”
Ⅷ Bonsi babere bakairaneria “Amina! Amina!”
Ⅸ Erio bakagenda korara. Ekero baraire Ragueli agatura abakori emeremo baye bakagenda bagachaaka korema oboina,
Ⅹ ekiagera ere nigo arengereretie na goteeba ase omoyo oye “Kero kende oyo nere nabo agokwa erio abanto batosekerere na gotochecheria!”
Ⅺ Ekero bakorire korema oboina Ragueli akairana nyomba agateebia mokaye,
Ⅻ “Toma omokori emeremo oyomo omosubati arore gose Tobia moyo are Onye okuure mbuya tomotindeke abanto bataramanya.”
ⅩⅢ Bono barabwo bagatongia etaya bakaa omosubati oria omokori emeremo, ekero aigora egesierie ki’enyomba aria ase Tobia na Sara baraire akabanyora bareire chitoro chindito.
ⅩⅣ Akairana agateebia Ragueli na Edina buna Tobia moyo are.
ⅩⅤ Erio Ragueli agatogia Nyasae ogoteeba, “Obakwe kare na kare aye Nyasae one bw’obuya.
ⅩⅥ Obakwe ase engencho aye kwangokirie. Ring’ana riria naoboete tiribeti korende aye gwatororeire abamera amange.
ⅩⅦ Obakwe ase engencho kwabaroreire amaabera abana aba babere abwo bare abana abamoima ase abaibori babo. Aye Omonene obaichorie obuya bwao na kobaa obogima bw’omorembe no’omogooko.”
ⅩⅧ Erio Ragueli agachiika abakori emeremo baye batube oboina boria magega botarakia.
ⅩⅨ Ragueli agateebia mokaye aroisie emegati, nere akagenda bweri agachora chiombe ibere neching’ondi inye korwa ase riicho riaye akaa omokori emeremo achinyenye erio bakore omoyega.
ⅩⅩ Erio akarangeria Tobia akamoteebia “Aye tori kogenda seino goika chichuma ibere chiaerire. Nigo orabe igaa torie na konywa amo erio aye ogokie omwana one magega yemechando aeteire.
ⅩⅪ Magega yechichuma ibere, aye noire ekeng’ese ki’enibo yane na koira Sara goika ase abaibori bao. Ekero inche na Edina torakwe, ekeng’ese keria kende giatigara aye nokeire. Amang’ana ayio na y’ekeene. Gochakera bono iga inche niiso na Edina ’nyoko, buna tore abaibori ba Sara!”