Ⅰ Magega yayio Tobia akarangeria Rafaeli akamoteebia, Ⅱ “Oyominto Asaria, imokia abasomba baane nechingamia ibere ogende goika Rage ase Gaeli omoe riruube riria ri’obwatana erio ere akoe chitaabu chiria naende oche nere ase omoyega bw’enywomo yane. Ⅲ Inyora ng’a tata ominto nigo agendererete kobara amatuko yokoirana kwane na ing’ise goetenia rituko nonya nerimo nigo arabe nobwoba obonene. Ⅳ Bono aye noroche amang’ana Ragueli arire eira goikerania nainche namigirwe mono neira eye yaye!” Ⅴ Bono Rafaeli akagenda goika Rege akaraara nyomba mwa Gabaeli erio akaa Gabali riruube riria ri’okobwatana boigo akamoteebia buna Tobia omwana o Tobiti ’nkonywoma are naende omoariganirie ase omoyega. Ase obwango Gabaeri akareta emebuko yabwate chitaabu yasibire na kobekwa ekemanyererio akaa Rafaeli. Ⅵ Rituko riare kobwatia Rafaeli na Gabaeli bakaboka mambia chuni bagachaaka orogendo gochia ase omoyega bw’enyangi ya Tobia na Sara. Ekero baigete ase enka ya Ragueli, bakanyora Tobia oikaransete ase emesa y’omoyega, erio agwo Tobia akaimoka agakwania Gabaeli. Ekero bakwananetie, Gabaeli akaiyeria amariga yomogooko akabaganeria amaya akabateebia “Aye nomwana omuya o iso oyio ore omonto omuya bw’amasikani ase amang’ana onsi! Tiga Nyasae Omobui agoichorie ebisio bia igoro aye amo n’omorugi oo amo n’abaibori b’omorugi oo. Tiga Nyasae ore igoro atogigwe oyio onyancheire narorire ekieni kebwekaine eki’omoigwa one Tobiti.”