Ⅰ Abanto bonsi baria batamanyeti Nyasae nigo bare abariri nonya korwa ime. Abanto abwo barorire ebinto ebiya bireo, korende basinyirwe komwancha Nyasae ore moyo. Ere nigo okorigereria ebitongwa biaye korende birobio tibimomanyeti ere oyio ore omoroisia obo. Ⅱ Barabwo nigo bakagete buna chinyasae echio chikogambera ense n’omorero, gose embeo, gose emerindo, gose ebitongwa bikoiruruka ase embeo. Ⅲ Abanto nigo bagogetigwe n’obuya bw’ebinto ebio, bakabikagera koba chinyasae, korende anga nabo bamanyete buna ebinto ebio mbiabwate omonyene, oyio obietanetie bionsi. Oyio nere omochakano bw’obuya na nere omontongi o bionsi. Ⅳ Bono ase engencho abanto bagokumeria chinguru chi’ebitongwa ebio, nebagwenerete kwegera korwa ase ebintongwa ebio buna oria obitongete nabwate chinguru mono. Ⅴ Buna obuya bw’ebitongwa bore obonene, bono Mwanyabaanto nagwenerete kweegeria igoro y’omotongi oye. Ⅵ Kero kende banto aba tibari nakomocha. Naro eranyarekane buna nigo bakagerete buna Nyasae bare korigia korende tibamonyora. Ⅶ Barobwo nigo baetananire n’ebitongwa bia Nyasae, bakabirigereria buya na omoerio oye bakabirora nga nigo bire ebiya na bakabiegena. Ⅷ Nonya nigo tibakonyara kwerwanerera buna tibari na komocha. Ⅸ Korende onye bare n’okobua gw’okomanya ayio onsi, nonya n’okoringoria ense, ngaki rende batamanyete oria ore Omonene bw’ebinto ebi bionsi. Ⅹ Korende baria bataisaini kende, mbaria bagosemeria ebinto bikwete, baria bakoroka ebinto biria birosirie n’amaboko a Mwanyabaanto chinyasae: ebinto biria bie chitaabu biria biroisirie buya, emegwekano y’echingiti gose amagena atari nangencho. Ⅺ Omogechi emete nigo akogecha emete eria ebwenerete, erio orusia amasabo aye, erio oroisia buya egento kebwenerete korwa ase omote oria. Ⅻ Erio oira ebingese biria biatigara oroiseria endagera oria oigota. ⅩⅢ Korende nabo akorusia ekengese ekemo keria getaisaini kende, ekio kebandegete naende kebochogete chingoro chinyinge, ere okeroisia buya chingaki atimogete goika kiabwenera buya kiaba omobwekano o Mwanyabaanto; ⅩⅣ gose omobwekano o ngiti ende yonsi. Nigo akogiaka erangi embariri na gotuba buya chingoro chiria chionsi. ⅩⅤ Erio akaroisia ase gete agiya ase enyasi erio osunga omobwekano oria aroro, ⅩⅥ nigo agokora aya onsi ase engencho ere amanyete buna oyio n’omobwekano bosa otanyare gwetenenera korende nigo oganeirie gokonywa. ⅩⅦ Korende ere tari koba n’obosoku ekero agochaka gosasiima omobwekano oyo otari na bomoyo ochaka koyoteebia igoro y’enywomo yaye boigo n’abana baye. ⅩⅧ Bono ere nigo agochaka gosaba igoro y’obogima obuya, obomoyo korwa ase omobwekano oyo otari moyo, nigo agosaba obokonyi korwa ase egento eke getabwati bomanyi, ogesaba orogendo oruya egento ekio getanyare kogenda nonya ngake! ⅩⅨ Ere nigo agosaba okonyora okuya korwa ase emeremo yaye, korwa ase egento ekio amaboko aye atabwati nguru chinde!