Ⅰ Omoika oo oyio otari gokwa nigo ore ase ebinto bionsi. Ⅱ Ase igo aye nigo okorongeyia baria bagokomochera ase enchera y’obwororo; nigo okobainyoria na kobakuurera igoro yaria bakomocheire, erio batige obobe bwabo na kogosemeria aye Omonene. Ⅲ Boigo nonya mbaria bamenyete ase ense yao enchenu, nigo kwabagechete ase engencho bare gokora amang’ana yokogechia mono: nigo bare gokora oborogi n’ogosasiima gotare koronge; Ⅳ aye nigo kwabagechete ase engencho bare gokora amang’ana y’okogechia mono: Ⅴ nigo bare konyenya abana batari na amaabera, bakaria chinyama na manyinga y’abanto buna ekengwanso; barabwo bagasoa ase ogosasiima okobe kwa bobisi, Ⅵ na goita abana abwo batare na nguru chi’ogwetanga korwa ase bare. Ase ogwancha kwao abanto abwo bagasirigwa n’abagaaka baito; Ⅶ erio ense eyio aye bwanchete goetania chionsi ebe obomenyo bw’abaanto abwo babwenerete koba abasomba bao. Ⅷ Korende nonya naba aye nigo kwabarorerete amaabera ase engencho barabwo n’abanto bao. Nigo gwatomete chinchoke chigatangana omoganda bw’abarwani esegi erio chibasirie ngora ngora. Ⅸ Anga nabo gwancherete abanyaboronge basirie abanyabibe ase esegi; gose anga nabo kwabasiretie ase ogwanchera ching’iti chintindi chibaboere, gose goetera ase ring’ana riao erimo ritindi. Ⅹ Korende aye okabagambia ng’ora ng’ora okabaa ribaga kwangama; nonya aye kwamanyete nga nigo bare gokora ebibe bobisi: nigo barenge ababurukanu korwa okoiborwa kwabo naende tibarenge goonchoreria embwa yabo. Ⅺ Barabwo nigo baragereirie korwa kare, gose tari ase engencho kwamoirogete monto onde bwensi erio tikwabaa egesusuro ase engencho y’ebibe biabo. Ⅻ Ningo oranyare gotenena na koamereria ay’ogokora, gose nongo oranyare gotanga okogambigwa? Ningo oragosoere buna gwasiririe chinse echio gwatongete? Ningo oratenene bosio bwao koegerera abanto abwo ababe? ⅩⅢ Nyasae ende taiyo otatiga aye oria okorigereria okogania kw’abaanto bonsi, nase ngo obwenerete koorokia buna kwagambire bobe; ⅩⅣ gose morwoti onde tari gose omogambi oranyare kogosoera ekero kwaeire monto onde bwensi egesusuro. ⅩⅤ Ase engencho aye n’omonyaboronge na nigo okogamba ebinto bionsi buya, tikwana kogambia monto onde bwensi ase chinguru. ⅩⅥ Okobua kwao n’ensoko y’oboronge bwao; nigo okororera abanto bonsi amaabera ekiagera aye Omonene o bonsi. ⅩⅦ Onye bwanyabaanto gakoba n’echitangutangu ase okobua kwao, bono aye nigo okoorokia chinguru chiao na kobaa egesusuro baria bamanyete okobua kwao korende tibagokora buna aye origeti. ⅩⅧ Nonya kobwate okobua okonene, aye nigo okogambia ase obwororo; na nigo ogotogambera ase oboremereria obonene ekiagera aye nore n’okobua gwokogambia ngaki ende yonsi origetie. ⅩⅨ Ase ogokora kwao kwaorokereirie abanto bao buna omonyaboronge naganeirie koba obwororo. Kwaeire abana bao ogosemeria okonene, ekiagera ekero abanto bamochire aye nigo okobaa okobua gw’okwangama. ⅩⅩ Aye nigo kwarendete na nigo kwarenge omoremereria ase okoa ababisa b’abaanto bao egesusuro nonya baganeirie gokwa; nigo kwabaete ribaga rinene gotiga obobe bwabo. ⅩⅪ Korende abanto bao aye omonyene okabaa egesusuro egetindi, nonya konya kwariereite chisokoro chiaito eira ase amang’ana amaya. ⅩⅫ Bono aye nigo ogotoa egesusuro, korende nigo ogosusura ababisa baito mara chiribu ikomi na goetania erio ekero toragambie toinyore obuya bwao na ekero tokogambigwa tosemerie kwaberwa. ⅩⅩⅢ Bono baria bamenyete chinchera chimbe, nigo kwabachandete korengana n’echinchera chiabo chi’okogechia. ⅩⅩⅣ Nigo basirerete are ase amamocho, bagasasiima ebingiti biria nonya n’ababisa babo bachayete; nigo bangainegete buna abana abariri. ⅩⅩⅤ Ase igo aye okabaa egesusuro ase engencho y’obobe bwabo, na egesusuro kiao gekabakora bakarorekana buna abanto abariri. ⅩⅩⅥ Nigo kiarenge egesusuro ekiororo, korende baria batari koigwa ogokuurerwa kwa Nyasae nigo baganeirie konyora egesusuro ki’endamwamu ya Nyasae. ⅩⅩⅦ Ekero baetwe egesusuro n’echingiti chiria barogete chinyasae bakainyora buna Nyasae nere Nyasae bw’ekeene nere oria oria bangire komanya. Ase igo bakaegwa egesusuro egetindi.