Ⅰ Obongaini nigo bwabakonyete abanto abwo bare koraua n’omobani omochenu. Ⅱ Bagaeta ase erooro ase abanto batamenyete bakaagacha chiema chiabo ase monto onde konya ataraeta. Ⅲ Bakabua ababisa babo na kobabua baria barenge koamererania nabarabwo. Ⅳ Ekero erang’o yabariete nigo bakoreerete, aye okobaa amache korwa ase egetare bakanywa erango yabo egasira. Ⅴ Amaakwa aria kwaete ababisa babo agakonya abanto bao ase emechando. Ⅵ Ribaga ri’amache amaya agotirimboka buya amache agaonchoka akaba amanyinga. Ⅶ Ase engencho ababisa baria baruete ogochika buna abana b’abaanto bao baitwe, aye okaa abanto bao amache amange. Ⅷ Okaorokia goetera ase erango yabo chingaki chiria buna aye kwaete ababisa babo egesusuro. Ⅸ Ekero batemetwe nonya bare koegwa egesusuro ase amaabera, bakerorera buna abanyabibe bachandetwe ekero kwabagambetie n’endamwamu. Ⅹ Okabakuurera buna omoibori agokuurera abana baye. Korende akaenekia abanyabibe abwo buna omorwoti omotindi akogambia. Ⅺ Baria barenge are boigo nabarenge ange bonsi bagachandeka. Ⅻ Bakaiyeria amariga ara kabere ekero bainyorete aria abanyorete. ⅩⅢ Ekero baigwete buna egesusuro kiao nigo giakonyete abanto bao, bagateeba buna aye Omonene naye gwakorete ayio onsi. ⅩⅣ Nonya konya bachayire oyio agwo ritangani konya otugutirwe na gotigwa, magega yayio onsi nigo bamokumetie, ekero baigwete erango enene goetania abasaria. ⅩⅤ Ase engencho y’oboriri n’ebirengererio biabo ebibe ebio biabasiretie, bagasasiima ching’iti n’emegwekano yogosamimwa, aye okabaretera ebitongwa bitaisaini kende bibae egesusuro, ⅩⅥ mbamanye ng’a omonto nigo akoegwa egesusuro ase ebinto biria biria akorete nabio ebibe ⅩⅦ Ase okoboko kwao gwechinguru, ogatonga ense korwa ase kende getare, kwabeire botambe omonyanguru nabo kware kobaretera chingangau gose chindo chintindi, ⅩⅧ gose ching’iti chintindi mono echio chitanya kobao, gose ching’iti echio chikoeyana omoika bw’omorero, gose chiria chikoeyana erioki ririto chiria chigosaria, gose chikorusia amariga y’okoondokia. ⅩⅨ Ching’iti echi nigo chiare echi’okoondokia mono nonya tichiare goita omonto, nigo chiare kororekana chi’okondookia mono. ⅩⅩ Korende aya tarenge ay’engencho. Nabo kware kobarigia ase ekeene kiao nakobaita bakwe, korende aye gwachorire gokora kera egento ase ekerengo. ⅩⅪ Aye nabo okoorokia chinguru chiao buna oragani, na onde taiyo oratenene mamincha yao. ⅩⅫ Ase ore ense engima nigo enga buna enyeke eyemo ase eratiri; nigo enga buna entonyi yerimi ria mambia. ⅩⅩⅢ Korende aye n’omonyamaabera ase bonsi ekiagera aye n’omobui o bionsi; aye tori korigereria ebibe b’abaanto bao, nigo okobaa chingaki erio baangame. ⅩⅩⅣ Aye nigo bwanchete ebinto bionsi bire ase ense, gose tibwangeti kende ase ebio gwatongete. Anga tigwatongete kende onye ndiria okiangete. ⅩⅩⅤ Gento kerabe moyo onye aye togwancha? Ngaki keragenderere kobao onye tikwagetongete? ⅩⅩⅥ Gwancheire ebinto bionsi bibe oo aye Omonene.