Ⅰ Obong’aini nigo bwarendete oria otongetwe bw’eritang’ani, tata bw’ense, oria otongetwe ere bweka magega y’abande bonsi. Obong’aini bokabotoria korwa ase okomocha kwaye; Ⅱ obongaini bokamoa chinguru chi’okogambera ebitongwa bionsi. Ⅲ Korende omonto oyomo omomochi agaeatanana korwa ase obongaini ase engencho y’obororo bwaye, ere agasira ase engencho aitete momura omwabo ase engencho y’endamwamu yaye. Ⅳ Ase engencho y’omonto oyio etoigo egacha ase ense, korende nainse ase engencho y’obong’aini agatoreka. Obong’aini bokaraa omonto oyomo omonyaboronge agetanga korwa ase etoigo. Ⅴ Ekero chinse chiaigwananete ase ogokora amabe, obongaini bogakonya omonto oyomo oyio omoirogete Nyasae n’moyo oye bwonsi. Ase obongaini omonto oyio akabwata amachiiko a Nyasae nonya ngoika komorwa omwana oye oyio anchete mono. Ⅵ Ekero abanyabibe bare gosirigwa, obongaini bogakonya omonto oyomo omonyaboronge ekero omorero oruete igoro na gosiria emechie etano korende ere agakonyeka. Ⅶ Nonya ngoika reero iga oboene bw’ogosaria kwabo nigo gokororekana: ense eyio nigo ere erooro na nigo ekorwa erioki; emete y’aroro nigo ekwama amatunda korende takoba rinde, rigena ri’omonyo nao riteneine gotoinyoria igoro y’omonto otegenete. Ⅷ Abanto b’emechie eyio nigo bangete obongaini, tibari goatanana amaya na amabe. Goetania igo bebire oboriri bwabo erio okobugwa kwabo tikwebwa rinde. Ⅸ Korende obongaini bogakonya baria baborigeti. Ⅹ Omonto oyomo ekero are gotama korwa ase endamwamu ya momura omwabo, obongaini nigo bwamoraete buya. Nigo bwamworogeti oborwoti bwa Nyasae na komworokereria amang’ana amachenu. Obongaini bokamobuera ase emeremo yaye; na bokamoiborera amatunda y’emeremo yaye. Ⅺ Ekero abachandi baye batagete koira enibo yaye ase obounereria, obongaini bokamokonya ere agatenenka. Ⅻ Obong’aini bokamorenda korwa ase ababisa baye na baria bamoboerete. Ase esegi yarenge endoro obongaini bokamoa obobui, erio akamanya nga obuya nigo bore n’echinguru kobua bionsi. ⅩⅢ Nainde ekero omonto oyomo omonyaboronge aonetigwe gochia ase obosomba, obongaini nigo bwamotangete korwa ase ebibe. Obong’aini nigo bwarenge nere ase echera, ⅩⅣ ekero arenge echera, obongaini bokamokonya erio akaegwa okobua igoro ase omorwoti erio akamokora koba omonene ase abanene baye. Baria bamosoerete bakarorekana koba abanyaborimo, nere akanyora amasikani a kare na kare. ⅩⅤ Obong’aini bogatoria abanto abachenu batarenge na komocha abwo bairetwe ase ense engeni eyio yabakorete koba abasomba. ⅩⅥ Obong’aini bogasoa ime y’omonto oyomo Omonene, na ase okobua akabarwania abarwoti abwo barenge kwobonyia. ⅩⅦ Obong’aini bokaa abanto ba Nyasae engeria y’emerebo yabo; obongaini bokabaraa ase enchera yogokumia bokoba ase bare egekengere ase omobaso na oborabu ase chingaki chia botuko. ⅩⅧ Obong’aini bokabatambokia enyancha embariri, bokabaraa gati gati y’amache amange, ⅩⅨ Korende bokabasiria ababisa babo ase amache bokarusia emebere yabo ase emerindo ya nyancha. ⅩⅩ Ase igo abanyaboronge bagachecheria abanyabibe bagatera na gotogia erieta riao richenu, ee aye Omonene bonsi bakagotogia ase engencho kwabarwanererete. ⅩⅪ Obong’aini bokaigora emenwa yechisokoro chiaito bagakwana, boigo na gokora chimeme chi’abana abake gokwana buya.