Ⅰ Aye Nyasae bw’echisokoro chiaito, Omonene omonyamaabera! Ase ring’ana riao nigo gwatongete ebinto bionsi. Ⅱ Ase obongaini bwao ogatonga omonto abitenenere bionsi biria gwatongete, Ⅲ amenye ense ase omoroberio na obongaini, na gokorera ekeene ase omonyo omuya. Ⅳ Nigo ngogosaba onge obongaini obwo bore ensemo yekerogo kiao ki’obonene; tobaisa konyanga inche gati y’abasomba bao. Ⅴ Inche n’omosomba oo, omwana bw’omosomba oo omosubati, omonto omoreu otari na kobua konde, tindi na nguru komanya igoro y’amachiiko ao gose okogambigwa. Ⅵ Neisa koba omonto ore omoikeranu, onye tabwati obongaini bokorwa ase ore, oyio nigo are bosa. Ⅶ Nigo gwanchorete koba obogambi bw’abaanto bao, oborwoti bw’abana bao abamura na abaiseke. Ⅷ Nigo gwanchigete inyagache Hekalu ase egetunwa egechenu kiao, boigo n’egesasiimero ase omochie oyio gwachorete koba obomenyo bwao, omobwekano bwe’eema eria kwaroisetie kare. Ⅸ Obong’aini nigo bore naye; na nigo bomanyete ogokora kwao; nigo bwarenge naye ekero gwatongete ense. Obong’aini nigo bomanyete aria agokogokia na aria are amaronge korengana n’amachiiko ao. Ⅹ Toma obongaini korwa agwo igoro ase achenu korwa ase ekerogo kiao ki’amaabera egechenu erio obongaini obwo bomenye amo nainche na gokora emeremo amo nainche erio inyare kwegera aria agokogokia. Ⅺ Ekiagera obongaini mbomanyete amang’ana onsi, borobwo mbondae buya ase ogokora kwane; na omochenu bwaye mbondende. Ⅻ Ogokora kwane ngwacheranwe, erio ningambie abanto bao ase ekeene na ninganie koba ase ekerogo ki’obonene gia tata one. ⅩⅢ “Ningo oramanye ebirengererio bia Nyasae? Gose ningo oramanye emeroberio yaye? ⅩⅣ Ebirengererio bia Mwanyabaanto tibisaini kende nonya nechisemi chiabo nigo chigosiria. ⅩⅤ Ase engencho emebere eye yaito egokwa nigo ekongaina emioyo yaito. Omobere oroisirie korwa ase amaroba nigo ere egurube ase ebirengererio ebiikeranu. ⅩⅥ Nigo togokagera bosa igo ase amang’ana y’ense; naria are ange naitwe titokoyanyora totagiramoreti. Ningo rende oranyare kwegera aria are igoro? ⅩⅦ Onde taiyo oranyare kwegera obosemia bwao aye Nyasae, onye aye tokomoa obongaini na gotoma Omoika Omochenu korwa agwo ase ore igoro. ⅩⅧ Nabo chinchera chi’abaanto ase ense chiabegetwe buya, bakabwata aria agokogokia erio bagatorigwa ase engencho y’obong’aini.”