Ⅰ Chinguru chi’obong’aini nigo chigosoa kera ase ense eye na kobeka kera egento ase omoroberio omuya. Ⅱ Nigo nanchete obongaini nkaborigia korwa chingaki chi’obosae bwane; nigo nabwate okogania koira obongaini koba omwanchi one, nigo nangusegete mono n’obuya bwaye. Ⅲ Obong’aini nigo bokoira ogotogia kwaye kw’eritang’ani ase okomenya na Nyasae, n’Omonene o bionsi nigo anchete obongaini. Ⅳ Obong’aini nigo bomanyete amang’ana yogokumia a Nyasae na nigo bogokora emeroberio yaye. Ⅴ Onye enibo n’egento giokaganerigwa ase obogima obo, obotenenku ninki korenganigwa n’obongaini bokomenta amang’ana onsi? Ⅵ Onye obomanyi n’egento giokaganerigwa koba nakio, kende tikeri kiya goetania obongaini obwo bokoroisia bionsi. Ⅶ Inee, aye mbwanchete ekeene? Bono engeria y’emeremo yobongaini nokoba nembwa engiya, koba nobomanyi boke, ekeene noboremu. Ase obogima kende tikeri kiya goetania ebi. Ⅷ Inee, aye notagete koba nobomanyi obonge? Obong’aini nigo bomanyete amang’ana a kare na boigo naria agochia gocha; nigo bomanyete keria abanto barengereretie na boigo nigo bomanyete koganyana abanto ase emechando yabo. Nigo bomanyete ebikone bia Nyasae na buna emegano yense egendereretekoba. Ⅸ Bono inche nigo nachorete komenya n’obongaini, ’namanyete buna mbong’e obosemia obuya na kombeka chinguru chingaki chi’obororo n’emechando. Ⅹ Ase engencho y’obong’aini ninsikwe na abanto ekero bakuomerana, nonya n’abagaaka mbansike nonya kinde omosae. Ⅺ Nigo bararore buna okonacha kwane ase amang’ana nigo kore okwaboronge, nonya nabagaambi mbaansike. Ⅻ Ekero ndabe gikirete ntari gokwana, nigo baranganye goika nkwane, na ekero ndakwane nigo barantegerere. Ninsa gokwana ase chingaki chintambe, nigo barantegerere buya. ⅩⅢ Ase engencho y’obong’aini nigo ndaegwe ogotakwa, na baria barache magega yane mbanginyore botambe. ⅩⅣ Nigo ndame nokobua ase abanto b’ebisaku; ⅩⅤ baria bakoraa ase chinguru nigo baranyiroke ekero baraigwe igoro yane. Gati y’abanto baane nigo ndabe omobui na omonyanguru ase esegi. ⅩⅥ Ekero ngosoa nyomba nigo ngotimoka amo nobongaini, ekiagera bororo tibori ase okomenya naborobwo korende n’omogooko bwoka. ⅩⅦ Ekero nkorengereria amang’ana aya ase omoyo one ime na ase ebirengererio biane, buna ogotakwa nigo gokonyorekana ase obongaini, ⅩⅧ buna baria banchete obongaini nigo bakonyora omogooko botambe, na baria bagokora emeremo yaye nigo bakonyora enibo etari koera, na baria bagokwana naborobwo nigo bakoba abang’aini, na baria bakobwatia amang’ana aye nigo bakonyora amasikani; bono nigo natarire goeta nkorigia obongaini obo. ⅩⅨ Ekero narenge omwana nigo narenge n’ebiegwa biria biokoiboreranigwa, nigo nabete n’egesio koba n’enkoro engiya, gose ase enchera ende nigo narenge omuya, ngasoa ase omobere omuya. ⅩⅩ Korende nkamanya nga tikonyora obongaini onye tinkoegwa na Nyasae; na ekero namanya buna Nyasae nabo akong’a n’ekemanyererio kiobong’aini. Ase igo nigo nasabete Omonene n’omoyo one bwonsi nkamosorora ngoteeba: