Ⅰ Inche Mwanyabaanto ogokwa buna abande, omoiborwa korwa ase omonto oria bw’eritang’ani oyio otongetwe korwa ase riroba. Nigo narosetigwe ’nkaba omobere ase enda ya mama ase engaki y’emetienyi kianda, magega yokoroisigwa goetera ase embego y’omonto na goetera ase omogooko bw’enywomo. Ⅱ Ase emetienyi ekobwatia kianda, magega konaroisigwe korwa ase embego y’omonto ase omogooko bw’enywomo. Ⅲ Ekero naiboretwe ngachaka koeyana embeo eyio ere oo nkagwa inse ase riroba erio rimbwekaine, egento kw’eritang’ani nakorete n’okorera buna abande. Ⅳ Inkaboigwa chianga chi’abana, ’nkarendwa ase enchera engiya. Ⅴ Morwoti onde taiyo ochagete komenya ase enchera ende engao; Ⅵ ekiagera bonsi nigo bagocha ase ense goetera ase enchera eyemo na barwa ase ense goetera enchera eyemo. Ⅶ Bono inche ngasaba nkaegwa obosemia; Ngasaba Nyasae ere akanga enkoro y’obong’aini. Ⅷ Nigo naganetie obongaini kobua ebirogo na obonene, nkarora obonda koba egento bosa ekero bokorenganigwa na obongaini. Ⅸ Tinabwekanetie obongaini gento kende gionsi ki’erigori rinene, ekiagera etaabu yonsi ere ase ense nigo enga buna amaroba, ne chifeta mbosa ase obongaini. Ⅹ Nigo nanchete chisemi kobua ekieni na okoba buya, nigo nanchete obongaini obo kobua oborabu bw’erisase, ase engencho oborabu bwaye tibori korima nonya ngake. Ⅺ Amaya onsi nigo angicherete nonya n’obongaini; ase obosio bwaye nigo nanyorete enibo etari kobareka. Ⅻ Nigo nagokerete aya onsi ekiagera andeterete obongaini; korende timanyeti buna obongaini nabwo obogima bwa ayio onsi. ⅩⅢ Nigo negerete ntari nabwoba boigo nkaegeria ntari kwemurungania; timbiseti banto obotenenku bwaye. ⅩⅣ Obong’aini n’eniibo etari koera ase abanto; baria bakwenyorera obongaini nigo bakoba abasani ba Nyasae; ere nigo akoenekia onsi aria bakwegera korwa ase are. ⅩⅤ Nigo ngosaba Nyasae ankonye inkwane korengana buna aganetie, nebirengererio biane bibwekane naria negeire. Nyasae omonyene nere omoteneneri bw’obong’aini; ere nigo akobamochia baria bare abang’aini. ⅩⅥ Intwe nigo tore ase amaboko aye amo namang’ana aito, chisemi chiaito boigo nonya noboroisia bwaito. ⅩⅦ Ere nere ongeire obongaini mono goetenia ebitongwa bionsi: Inee ense ninki na bionsi ebireo ninki biroseirie, ⅩⅧ Omochakano bwe chingaki, omoerio oye, na gati gati yaye, ogonchoreria gwechingaki n’ebiro, ⅩⅨ okobwatana kw’emiaka nechingenangeni. ⅩⅩ Onyegeirie igoro yebitongwa bire moyo biria, ching’iti chi’orosana, chinguru chi’omoika, okobua ne chinguru chia Mwanyabaanto, ebimeria ao ao boigo nemeri yebimeri n’eki egokorerwa. ⅩⅪ Negeire igoro y’amang’ana abisekanete boigo naria are maiso marore, ase engencho chisemi echio chire omworokia bw’ekeene chianyorokereirie. ⅩⅫ Ase obongaini nore oo omoika bwechisemi n’obochenu; omoika bwoka okweorokia ase chinchera chinyinge, omwororo mono oyio okomenya ase obuya; ebirengererio ebiya, ebiororo na bitagosareka; ebio bigwancha amaya, boigo bitari gosinywa gokora kende; ⅩⅩⅢ bire ebiororo na bianchete abanto; omoyo omoikeranu, oria okwegeneka na otari na bwoba bonde; ebio bibwate chinguru na okobua gwokorora onsi; oria ogweta ase kera oyobwate ebirengererio, bire ebikeranu na obongaini bwa igoro mono. ⅩⅩⅣ Obong’aini nigo bokogenda bwango kobua orogendo ronde rionsi; nigo bore obuya na nigo bogosoa ime ase kera egento. ⅩⅩⅤ Obong’aini n’Omoika bw’echinguru chia Nyasae, nokoenekia gwe chinguru na obonene bwa Nyasae bw’echinguru; ase igo kende gionsi getari gechenu tikegosoa nonya ngake. ⅩⅩⅥ Obong’aini n’oborabu bwa Nyasae bwa kare na kare, ekerore ekerabu ki’ogokora kwa Nyasae na omobwekano bw’obuya bwaye. ⅩⅩⅦ Nonya obongaini bore obomo nabo bogokora kende gionsi, tibori goonchoka nonya bogokora kera egento ase oboyia. Ase ebigori bionsi nigo bogosoa ase emioyo y’abachenu na kobakora abasani ba Nyasae na ababani. ⅩⅩⅧ Ase engencho Nyasae nigo anchete omonto ore n’obongaini. ⅩⅩⅨ Obong’aini nobuya goetenia omobaso na goetenia ebiombe biechingenangeni; nigo bore obuya goetenia oborabu bwa mobaso. ⅩⅩⅩ Ekiagera magega yomobaso obotuko nigo bogosoa, korende obobe tibogoetania obongaini.