Ⅰ Tegerera inwe abarwoti moigwe, inwe abagaambi be’ense yonsi maya aya. Ⅱ Integerere inwe aba mokogambera emeganda ya’banto n kwegokia ase chinse chionsi. Ⅲ Obonene more nabwo nigo mwaetwe n’Omonene; boigo n’okobua gwonsi nigo mwakonyorete ase Nyasae Omonene. Ere narenge emeremo yaino na koringoria emeroberio yaino. Ⅳ Ekiagera buna abakoreri ase oborwoti bwaye, tibwagambete buya, onye timokobwatia amachiiko, gose kobwatia emeroberio ya Nyasae; Ⅴ nabachere ng’ora na kobaa egesusuro egetindi, ekiagera egesusuro egetindi nigo kogochera baria bare nokobua. Ⅵ Abanto bande abake mbaaberwe ase engencho y’amaabera; korende baria bare n’okobua mbaegwe egesusuro egetindi. Ⅶ Ase engencho Omonene o bonsi tamoirogeti monto onde bwensi, obonene bw’omonto tibokogera anyore ogwanchereria; nere omonyene obatongente bonsi, abanene n’abake, na nigo akorigereria okogania kwa bonsi atari gwanchereria. Ⅷ Korende baria bare n’obonene mbaringorigwe mono. Ⅸ Bono inwe abarwoti igwa amang’ana ane, bono eegerie koba n’obong’aini timocha komocha. Ⅹ Baria batenererete amang’ana y’obochenu mbancherwe koba abachenu. Boigo na baria begerigwe ayio mbanyore enchera yokwerwanerera engaki y’ekina. Ⅺ Bono twara erango ase amorokerio ane; kabe n’okogania ase aro erio abaorokereri mobe n’amasikani. Ⅻ Obong’aini nigo bokoraba tibokorima. Baria banchete omong’aini nigo bakoborora bwango, boigo na baria bakoborigia nigo bakobonyora. ⅩⅢ Obong’aini nigo bogotanga kweorokia ase baria babotagete. ⅩⅣ Ekero okoboka mambia chuni korigia obong’aini aye togochandeka; nigo okobonyora bokoganyete gesieri kiaye. ⅩⅤ Gotegerera obong’aini buya n’okonyora chisemi chindonge. Koraborigie botuko na mobaso togochandeka. ⅩⅥ Obong’aini botambe nigo bokorigia baria baisaine; ekero bogocha nigo bokoerokia ase bare ase enchera y’obwanchani, nigo bokoba nabarabwo ase kera ebirengererio. ⅩⅦ Omochakano bw’obong’aini nogotwara erango kwegerigwa; gotwara erango ase okwegera n’ogwancha obong’aini. ⅩⅧ Ogwancha obong’aini n’okobwata amachiiko aye; okobwata amachiiko aye n’koenekerigwa komenya kare na kare. ⅩⅨ Okomenya obogima bwa kare na kare nigo gokorenta omonto ange na Nyasae. ⅩⅩ Ase igo erango y’okonyora obongaini nigo ekoraa omonto gochia ase oborwoti. ⅩⅪ Bono inwe abarai b’abaanto, onye mogokerete ebinto biaino bi’erigori n’ekemanyererio ki’obonene igoro ase abanto, sika obong’aini erio momenye kare na kare. ⅩⅫ Nimbateebie obongaini ninki na omochakano oye norori. Tinkobabisa kende gionsi, nimbateebie omogano oye bwonsi korwa omochakano oye, nakobateebia buya amang’ana aye ntari gotiga enkeene gionsi. ⅩⅩⅢ Endamwamu embe tekoba mogisangio one, ekiagera obongaini tibori kogenda amo n’endamwamu. ⅩⅩⅣ Obonge bw’abang’aini n’ogotoreka ase ense, omorwoti omong’aini nigo akoa abanto baye oborendi. ⅩⅩⅤ Ase igo bono mwegere korwa ase amang’ana ane nainwe monyore okonyora okuya.