Ⅰ Ase rituko erio omonyaboronge natenene n’oboremu ase obosio bwa baria bare komochanda boigo na baria basiereretie emeremo yaye. Ⅱ Ekero baramorore nigo baratengechigwe na koondoka mono, mbakumie mono buna atorigwe barabwo batarochi. Ⅲ Barabwo mbaangame nagweitia ase emioyo yabo bagoteeba, Ⅳ “Oyo noria tware gochecheria, tokamorora koba bosa; ekeene intwe nigo twarenge abariri. Nigo twakagerete buna ere nebarimo, na ekero akwete titwamweete masikani. Ⅴ Inaki ekonyarekana bono ere are n’abana ba Nyasae na gotwara ribaga gati y’abachenu! Ⅵ Korende intwe twangete chinchera chia boronge! Titwamenyete ase oborabu bw’ekeene, gose borabu bwaye tibwatobarerete. Ⅶ Intwe nigo twaichire n’obobe n’obosareku; nigo tware goetenana ase erooro totabwateti nchera, gose titwamanyete enchera y’Omonene. Ⅷ Okweimokereria gwaito igoro ninki gwatokonyire? Ngeria ki twanyorire ase obonda togwetogeria? Ⅸ Ebio bionsi biaetire buna omorengari; buna egento okoigwa naende kweba. Ⅹ Buna emeri ekwamereria emerindo nyancha, korende ekero yaetire teri gotiga nchera, gose tokobwatia orore ase yaetera gati gati yemerindo. Ⅺ Gose buna enyoni ekoiruruka ase embeo etari gotiga kemanyererio kende gionsi ase egoetera; ero nigo egoaka aka embeo inke inke ase chimbaba chiaye, ero nigo egoeta ase embeo korende teri gotiga kemanyererio ase yaetire. Ⅻ Boigo nonya nensara ekero yarutirwe nigo egoeta ase embeo korende teri gotiga enchera ase embeo, gose monto onde tokomanya ase yaetera. ⅩⅢ Boigo naitwe magega kotwaiboirwe, nigo togosira na titori gotiga kemanyererio kende ki’obuya, korende nigo togosira ase obobe bwaito intwe abanyene.” ⅩⅣ Ogosemeria kw’omonyabibe nigo konga buna embeo; nigo konga buna riuro rikoirwa n’emerindo; nigo rigwatananwa buna erioki bosio bw’embeo, rigoeta nagotainyorwa buna omogeni bwe rituko erimo. ⅩⅤ Korende abanto abaya nigo bakomenya kare na kare nengeria yabo nigo ere ase Omonene; ee Nyasae Omonene nere okobaakana. ⅩⅥ Ase igo barabwo mbanyore engeria eng’ikeranu n’egutwa ekomekameka ase okoboko kw’Omonene, ekiagera ere nabatube ase okoboko kwaye gw’okorio na kobakengera okoboko kwaye gw’echinguru. ⅩⅦ Omonene naorokie obwanchani bwaye obonene buna ebirwanero bi’esegi erio aboyie abanto baye barwanie ababisa baye. ⅩⅧ Ekeene nkebe buna engoba y’egekuba, okogaambigwa gw’ekeene nkobe buna ekegogwa kia motwe. ⅩⅨ Obochenu mbobe buna enguba yaye. ⅩⅩ Natieri endamwamu yaye enene buna omoro, na ense yonsi nebwaterane nere korwania ababisa abwo batabwati semi. ⅩⅪ Enkoba neche rimo rioka igoro ase amare buna chinsara korwa ase obota. ⅩⅫ Embura y’amagena nebachere buna chinsara n’eritimo; amacha anyancha nache ase obororo ase engencho yabo, nechindoche nchibasiri chitari n’mabera. ⅩⅩⅢ Embeo entindi neche ase engencho yabo, nakobairurukia gochia are buna ekembugambugu. Obone mborete ogosira ense yonsi; ogokora okobe nkonyegeri abanene b’ense.