Ⅰ Mbuya gotwara erieta rigiya kobua abana ekiagera aye noinyorwe na Nyasae n’abanto bonsi kare na kare. Ⅱ Obuya bwao mboe abanto omobwekano omuya bakobwatia erio ekero orarwe oo abanto babe bagokoinyora. Kera rituko rigoeta nigo orabe gokobekerwa egutwa y’obobui. Ⅲ Korende oroiboro rw’abaanto abange abwo batamosigeti Nyasae tibaisani kende, abana babo tibakoba n’oboroso obuya tibakoira emeri are. Ⅳ Nabaisa kobeka amato, nigo arabe aye egeka egeke barabwo nigo baranyegerigwe n’embeo nagotogoka. Ⅴ Chinsagia chiabo nigo chirabuneke chitaraba, boigo nonya n’amatunda abo takwama ariegwe nigo arabe bosa. Ⅵ Abana baiboire ase oboamate botari obuya mbabe kirori ase abaibori babo rituko ri’ekiina. Ⅶ Korende abanyaboronge neisa koba bakuure nigo barabe n’omorembe. Ⅷ Obogotu tibori gosikwa ase engencho y’amatuko gose obonge bw’emiaka; Ⅸ korende obongaini n’obogima obuya n’ekemanyererio ki’omongaini; ebi nigo bigocha n’obogotu. Ⅹ Narengeo omonto omogogeti Nyasae na Nyasae akamwancha, ekero amenyete gati y’abanyabibe, Nyasae akamoira igoro. Ⅺ Nigo amonganyetie erio obobe tiboonchora ebirengererio biaye gose obongainereria tibosiria omoyo oye. Ⅻ Omonguso bw’obobe nigo ogotuuma amaya takororekana; monto takorora nonya ingana rinde igiya bosio bwaye; omorindo bw’ ogosanera nigo ogosiria ebirengererio bi’omonto otamanyeti kende. ⅩⅢ Ere nigo akoretwe koba omochenu ase ekero egeke, erio akamenya emiaka emenge. ⅩⅣ Omoyo oye nigo omogogetie Omonene erio akamwayereria akamorusia ase ense y’obobe. Abanto bakarora ring’ana eri korende tibamanya engencho yaye; tibamanya ring’ana eri erimo; ⅩⅤ buna Nyasae n’obuya o; omonge bw’amaabera; ere nigo akorenda baria bare abaye. ⅩⅥ Omonto omonyaboronge oikire gokwa nagambie abwo bare moyo batamoirogeti Nyasae. Omosae oyio obeire omochenu nabasokie abanto abagotu abwo batamoirogeti Nyasae. ⅩⅦ Abanyabibe mbarore omonyaboronge ogokwa korende tibakomanya emeroberio y’Omonene ase omonto oyio, boigo tibakomanya nase ki Omonene ababekire buya. ⅩⅧ Mbachecherie ogokwa kw’omonyaboronge, korende Omonene nabaseke. Barabwo ekero barakwe tibagotindekwa namasikani; nonya nabakuure tibakobasika. ⅩⅨ Omonene nabatugute inse nakobakiria kiri; nabanyegerie korwa ase oboroso bwabo erio batigare bosa nagosoka ase obororo. Monto onde taiyo arabainyore rinde. ⅩⅩ Abanyabibe mbagambigwe ase obobe n’obwoba ekero ebibe biabo birabarwe, ogokora kwabo okobe nkobagambie ase obosio bwabo.