Ⅲ
Omoerio bw’abanyaboronge
Ⅰ Korende abanto abaronge nigo bare ase amaboko a Nyasae mechando ende yonsi tekobanyora.
Ⅱ Noboririri korengereria buna abanyaboronge nigo bagokwa ogokwa kw’oboriri.
Ⅲ Okorwao kwabo nigo kwarorekanete ase tore buna n’emechando korende ekeene abanyaboronge nigo bare n’omorembe.
Ⅳ Nigo torakagere buna nigo banyorire egesusuro, korende nigo bare n’ogosemeria gw’ogotakwa.
Ⅴ Nigo baetwe egesusuro ake, korende bono mbaegwe ekeegwa ekenene, ekiagera Nyasae nigo abatemete akanyora buna nabo bakomenya ase are.
Ⅵ Akabateema buna etaabu ebekire ase omorero, na akabaarigania buna ekengwanso kw’ogosambwa.
Ⅶ Chingaki chi’okoegwa egutwa nigo bagocha komekameka buna chinsase ase obonyansi obwomo.
Ⅷ Mbagambie na kogambera chinse chionsi n’Omonene nabe omorwoti obo goika kare na kare.
Ⅸ Bonsi baria bamwegenete Nyasae mbamanye ekeene kiaye; bonsi baria bare abegeeni ase are mbamenye ase are n’obwanchani, ekiagera ere nigo akobaa obuya na kobarorera amaabera abachoore baye, na nigo akobarigereria buya abwo achorire.
Omoerio bw’abanyabibe
Ⅹ Korende abanyabibe mbaegwe egesusuro kobwatekana n’ebirengererio biabo ebibe, ekiagera barabwo nigo bangete koigwera Omonene na bagachaya gokora amaya.
Ⅺ Bonsi baria bagochaaya obosemia gose chisemi nigo bakomenya obogima obobe; tibabwati gosemeria konde, ogwechanda kwabo tigokobakonya kende boigo n’ogokora kwabo n’okwabosa.
Ⅻ Abakungu babo nigo bare abariri na abana babo n’ababe.
ⅩⅢ Abanto b’oroiboro rwaye mbaragererigwe.
Okonyora kw’obuya
Nasesenirie omokungu omogomba oyotana gokora obotomani oyio nanyore engeria ekero Nyasae agocha kogambia chinkoro chia Mwanyabaanto.
ⅩⅣ Boigo nasesenirie omosacha osaririe obosacha bwaye ekiagera ere nache kogoka onye tanya gosaria ogochika kw’Omonene. Ekiagera ere ebeete omwegenwa, nanyore ekeegwa ekiya mono ki’obogima bwa kare na kare gwetania konyora abana.
ⅩⅤ Ase engencho obomaene nigo bonga omote oyio okwama amatunda y’ogokumia. Obong’aini nigo bonga obori ore moyo oyio oranyare gokinia amato amayia kera engaki.
ⅩⅥ Abana b’abatayayi nigo barakwe bare abake boigo n’oroiboro rwabatayayi ndosirigwe kegima.
ⅩⅦ Nabaisa komenya amatuko amange goika bagote, okogota kwabo nigo korabe okw’obosoku.
ⅩⅧ Baise gokwa bare abasae tibakoba nagosemeria, na onde taiyo orabaremie engaki y’ekina.
ⅩⅨ Ekiagera abanto batari koigwera nigo barakoore bobe.