Ⅰ Abanyabibo nigo bakorengereria na gokwana ase chinkoro chiabo iga obogima bwaito nobwenge na obw’emechando, ekero amakweri agocha nchera teiyo toretange naro monto onde taiyo oranyare korusia oyonde ase abakure. Ⅱ Nigo twaiboretwe ase egesio, ekero torakwe nigo erabe buna titwarenge oo riinde. Omoika oito nigo onga buna erioki rigosira, ebirengererio biato nigo bire bosa Ⅲ Ekero enkoro yatigire goaka emebere yaito nigo egoonchoka yaba riibu nomoyo oito nigo ogosira buna embeo. Ⅳ Ase ekero egeke twebwe na onde taiyo orainyore emeremo yaito, obogima bwaito mbweete buna riire gose buna ritaturi rigweta gati y’omobaso. Ⅴ Amagima aito nigo anga buna omorengari, na ekero torakwe titokoirana korwa aroro. Rituko ri’ogokwa gwaito nigo rirobeirie na onde taiyo oraritange. Ⅵ Ase igo tiga twegokie na kende gionsi ekiya kere ase ense, twegokie nebitongwa bionsi. Ⅶ Tiga tweigoti ase okonywa edivai y’erigori na manukato boigo twerigerie amaua. Ⅷ Twechabere amaua magega atarasusana. Ⅸ Kera oyomo asange ase omoyega na totige ebimanyererio bw’emegoko yaito kera ase, ekiagera obwo nabwo obogima. Ⅹ Omotaka naba omuya goika tomochande, boigo titokororera ababoraka amaabera gose gosika omogaka obwate chimbuche. Ⅺ Chinguru chiaito nachio ekeorekererio gw’ekeene oyotari nechinguru tabwati kende. Ⅻ Omonto omonyaboronge n’emechando ase tore, ere nigo akoba mamincha y’ayatogokora, nigo bagototogonyera ekero twasaririe amachiiko a Musa, ase igo tiga tobasirie. ⅩⅢ Omonto omuya nigo akorigia komomanya Nyasae na bweroka omwana bw’Omonene. ⅩⅣ Omonto onga buna oyio nigo are egetango ase tore. ⅩⅤ Nonya nase okomorigereria nigo are egurube ase tore ase engencho nigo amenyete enchera engao korwa ase abanto bande. ⅩⅥ Ere nigo agotorora buna abanto abakorekanu na kende gionsi togokora tikeri kiya. Nigo akwerora buna Nyasae niise boigo nana kwegena buna abanyaboronge nabwo boka bagokwa bare n’omogooko. ⅩⅦ Bono intwe tiga torore gose amang’ana aye nayekeene, tiga torore ayaramonyore ekero arakwe. ⅩⅧ Onye ekeene ere n’omwana o Nyasae, Nyasae namokonye nakomorusia ase chinchera chi’ababisa baye. ⅩⅨ Ase igo bono tiga tomoteme tiga tomobere abatindi na kobachanda torore oberemereria bwaye. ⅩⅩ Tiga tomonachere ekiina kiogokwa kw’obosoku ekiagera buna ateeba Nyasae namotorie. ⅩⅪ Nabo abariri bakorengereria iga korende nigo bakong’aineka ase obobe bwabo. ⅩⅫ Tibamanyeti emeroberio ya Nyasae ya bobisi barabwo tibanya gotwara okogania komenya obogima obuya botari na mamocho. ⅩⅩⅢ Nyasae nigo atongete Mwanyabaanto ase omogwekano oye omonyene bamenye kare na kare ⅩⅩⅣ Korende ase engencho yendamwamu ya Saitani, ebibe bigasoa ense na bonsi baria bare ensemo ya Saitani nigo bagokwa.